[1] ᐹᓬ ᑳ ᑭᐸᐦᐅᑲᐃᐧᔮᐣ ᙭ ᒋᓴᐢ ᐅᐦᒋ, ᒥᓇ ᑎᒪᑎ ᑭᒋᐋᐧᒥᓇᐤ ᐁ ᒪᓯᓇᐦᐊᒫᑖᕽ ᐹᐃᓬᐃᒪᐣ ᑳ ᓵᑭᐃᑖᕽ ᓂ ᐃᐧᒋ ᐊᑐᐢᑫᒫᑲᓂᓈ,
[2] ᒥᓇ ᐋᐹᔭ ᓂᑕᐁᐧᒫᓈᐣ, ᒥᓇ ᐋᕒᑭᐸᐢ ᓂ ᐃᐧᒋ ᓄᑎᓂᑫᒫᑲᓂᓈᐣ, ᒥᓇ ᐅᑕᔭᒥᐦᐋᐊᐧᐠ ᑭᑭᕽ ᑳ ᐊᔮᒋᐠ;
[3] ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭.
[4] ᓂ ᓇᓈᐢᑯᒪᐤ ᓂ ᑭᓭᒪᓂᑐᑦ ᑳᑭᑫ ᐁ ᒫᒥᐢᑯᒥᑖᐣ ᓂᐟ ᐊᔭᒥᐦᐋᐃᐧᓂᕽ,
[5] ᐁ ᐯᑕᒫᐣ ᐁ ᐋᑐᑖᑲᐧᕽ ᑭ ᓵᑭᐦᐃᐁᐧᐃᐧᐣ ᒥᓇ ᑭ ᑖᐯᐧᔦᔨᑕᒧᐃᐧᐣ ᑳ ᐃᓯ ᐋᐧᐸᐦᑕᐊᐟ ᑳ ᑎᐯᔨᐦᒋᑫᐟ ᒋᓴᐢ ᒥᓇ ᑳ ᐃᓯ ᐋᐧᐸᐦᑕᐊᒋᐠ ᑲᐦᑭᔭᐤ ᐅᑲᓈᑎᓯᐊᐧᐠ;
[6] ᐊᓂᒪ ᐁ ᐃᓯ ᐅ ᐃᐧᒉᐋᐧᑲᓂᑐᕽ ᑭ ᑖᐯᐧᔦᔨᑕᒧᐃᐧᓂᕽ ᑭᑕ ᑭ ᑲᐢᑭᐃᐁᐧᐠ, ᐁ ᑭᐢᑫᔨᑖᑲᐧᕽ ᑲᐦᑭᔭᐤ ᒥᔪ ᑫᑲᐧᐩ ᑳ ᑭᑭᐢᑳᑯᔭᐣ, ᙭ ᐃᓯ.
[7] ᒋᑫᒫ ᒥᐢᑕᐦᐃ ᒪᒪᐦᑖᑯᓯᐃᐧᐣ ᒥᓇ ᒥᔪᑎᐁᐃᐧᐣ ᓂ ᑭ ᐊᔮᐣ ᑭ ᓵᑭᐦᐃᐁᐧᐃᐧᐣ ᐅᐦᒋ ᒋᑫᒫ ᐅᑌᐦᐃᐋᐧᐊᐧ ᐅᑲᓈᑎᓯᐊᐧᐠ ᑭ ᑭ ᒥᓇᐃᐧ ᒪᐢᑲᐃᐧᓯᑖᐋᐧᐣ ᓂᒋᐋᐧ.
[8] ᐁᑯᓯ ᒫᑲ ᐋᑕ ᐁ ᐊᔮᔮᐣ ᐁᑯᔨᑯᕽ ᓱᑫᔨᒧᐃᐧᐣ ᙭ ᐃᓯ ᑭᑕ ᓯᑭᒥᑖᐣ ᐊᓂᒪ ᑳ ᓇᐃᐸᔨᐠ,
[9] ᐁᔨᐁᐧᕽ ᓵᑭᐦᐃᐁᐧᐃᐧᐣ ᐅᐦᒋ ᓇᐊᐧᐨ ᑭ ᑳᑭᓯᒧᑐᑖᑎᐣ ᒋᑫᒫ ᓂᔭ ᐹᓬ ᐁ ᑭᓭᔨᓂᐃᐧᔮᐣ ᒥᓇ ᐁᑲᐧ ᐁ ᑭᐸᐃᑳᓱᔮᐣ ᙭ ᒋᓴᐢ ᐅᐦᒋ;
[10] ᑭ ᑳᑭᓯᒧᑐᑖᑎᐣ ᓂᐟ ᐊᐋᐧᓯᒥᐢ ᐅᐦᒋ ᑳ ᑭ ᓂᐦᑖᐃᐧᑭᐊᐠ ᐁ ᒣᑳᐧ ᒪᒫᒋᑲᐧᐱᓱᔮᐣ, ᐋᓀᓯᒪᐢ,
[11] ᐊᓇ ᑲᔮᐢ ᐁᑳ ᓈᐣᑕᐤ ᑳ ᑭ ᐃᑖᐸᒋᐃᐢᐠ ᒫᑲ ᐁᑲᐧ ᑳ ᐋᐸᒋᐃᑯᔭᕽ ᑖᐱᐢᑯᐨ ᑭᔭ ᒥᓇ ᓂᔭ;
[12] ᐊᓇ ᑳ ᓯᐯᐧᑎᓴᐊᐧᐠ ᑳᐃᐧ ᑭᑕ ᓈᑎᐢᐠ ᐃᐧᔭ ᑫᐦᒋᐋᐧᐠ ᐁᐊᐧᑯ ᒣᐧᒧᐦᐨ ᓂᑌᐦ;
[13] ᐁᐊᐧᑯ ᓂ ᑭ ᓄᐦᑌ ᑲᓇᐁᐧᔨᒫᐤ ᑭᑕ ᐊᑐᐢᑫᐢᑕᒫᐢᐠ ᐁ ᐸᒥᐃᐟ ᐅᒪ ᒪᒫᒋᑲᐧᐱᓱᐃᐧᓂᕽ ᒥᔮᐧᒋᒧᐃᐧᐣ ᐅᐦᒋ:
[14] ᒫᑲ ᓇᒪᐃᐧᔭ ᑫᑲᐧᐩ ᓂ ᐃᐧ ᐃᑐᑌᐣ ᐁᑳ ᑭᔭ ᐁ ᑭᐢᑫᔨᑕᒪᐣ; ᑭ ᒥᔪᑐᑕᒧᐃᐧᐣ ᐁᑳ ᑭᑕ ᐃᓯᓈᑲᐧᕽ ᑖᐱᐢᑯᐨ ᐊᔨᓵᐨ, ᒫᑲ ᒥᑐᓂ ᑌᐯᔨᒧᐃᐧᓂᕽ.
[15] ᒋᑫᒫ ᒫᐢᑯᐨ ᐁᐊᐧᑯ ᐅᐦᒋ ᐊᒋᔭᐤ ᑳ ᑭ ᐸᐢᑫᐃᐧᔨᐢᐠ ᑭᑕ ᐊᔮᐊᐧᐟ ᑳᑭᑫ;
[16] ᓇᒪᐃᐧᔭ ᒫᑲ ᐁᑲᐧ ᑖᐱᐢᑯᐨ ᐊᑐᐢᑫᔮᑲᐣ ᒫᑲ ᐊᔨᐋᐧᐠ ᐃᔨᑯᕽ ᐃᐧᔭ ᐊᑐᐢᑫᔮᑲᐣ, ᐁ ᐅᒋᐋᐧᒥᕽ ᑳ ᓵᑭᐃᐦᐟ, ᓂᔭ ᐅᑎ ᐅᓵᑦ, ᒫᑲ ᐋᐧᐃᐧᐢ ᑭᔭ ᐃᐧᔮᓯᕽ ᐃᓯ ᒥᓇ ᑳ ᑎᐯᔨᐦᒋᑫᐟ ᐃᓯ.
[17] ᑭᐢᐱᐣ ᒫᑲ ᓂ ᐃᐧᒉᐋᐧᑲᐣ ᑭᐟ ᐃᑕᑭᒥᐣ, ᐅᑎᐣ ᑖᐱᐢᑯᐨ ᓂᔭ ᐁ ᐅᑎᓂᔭᐣ.
[18] ᒫᑲ ᑭᐢᐱᐣ ᓈᐣᑕᐤ ᑭ ᑭ ᐃᓯ ᐊᐧᓂᑐᑖᐠ ᐊᐦᐳ ᓈᐣᑕᐤ ᑫᑲᐧᐩ ᑭ ᒪᓯᓇᐦᐊᒫᐠ ᓂᔭ ᐁᐊᐧᑯ ᐊᑭᑕᒪᐃᐧᐣ;
[19] ᓂᔭ ᐹᓬ ᓂ ᒪᓯᓇᐦᐁᐣ ᓂᒋᐦᒋ ᐅᐦᒋ, ᓂ ᑲ ᑎᐸᐁᐣ; ᐋᑕᐃᐧᔭ ᒫᑲ ᑭᑕ ᑭ ᐃᑌᐧᔮᐣ ᑭᔭ ᑭ ᒪᓯᓇᐦᐊᒪᐃᐧᐣ ᑭᔭ ᑫᐦᒋᐋᐧᐠ ᑳ ᐃᓯ ᐊᔮᔭᐣ.
[20] ᐁᐦᐁ ᓂᒋᐋᐧ, ᑭᔮᑦ ᒪᒪᑖᑯᐦᐃᐣ ᑳ ᑎᐯᔨᐦᒋᑫᐟ ᐃᓯ; ᒥᔪᑌᐦᐁᐦᐃᐣ ᙭ ᐃᓯ.
[21] ᐁᑳ ᐁ ᐊᓯᐁᐧᔨᑕᒫᐣ ᑭ ᓇᓇᐃᑕᒧᐃᐧᐣ ᑭ ᒪᓯᓇᐦᐊᒫᑎᐣ ᐁ ᑭᐢᑫᔨᑕᒫᐣ ᑭᑕ ᐃᑐᑕᒪᐣ ᐊᔨᐋᐧᐠ ᐃᔨᑯᕽ ᐊᓂᒪ ᑳ ᐃᑌᐧᔮᐣ.
[22] ᒫᑲ ᒥᓇ ᑲᐧᔮᒋᑕᒪᐃᐣ ᐃᑕ ᑭᑕ ᐃᐧᑭᔮᐣ; ᒋᑫᒫ ᓂᐟ ᐃᓯ ᐸᑯᓭᔨᒧᐣ ᑭᐟ ᐊᔭᒥᐦᐋᐃᐧᓂᐋᐧᐊᐧ ᐅᐦᒋ ᑭᑕ ᐸᑭᑎᓂᑲᐃᐧᔮᐣ ᑭᑕ ᐋᐧᐸᒥᑕᑯᐠ.
[23] ᐁᐸᑊᕒᐋᐢ ᑳ ᑭᑭ ᑭᐸᐃᑳᓱᔮᐣ ᙭ ᒋᓴᐢ ᐃᓯ ᑭᐟ ᐊᑕᒥᐢᑳᐠ;
[24] ᐁᑯᓯ ᒥᓇ ᒫᕒᐠ, ᐋᕒᐃᐢᑖᕒᑲᐢ, ᑎᒫᐢ, ᓬᐅᐠ, ᓂ ᐃᐧᒋ ᐊᑐᐢᑫᒫᑲᓇᐠ.
[25] ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᑭ ᑲ ᐃᐧ ᐃᐧᒉᐃᑯᐋᐧᐣ ᑭᐟ ᐊᐦᒑᐦᑯᕽ. ᐋᒣᐣ.