<James ᒉᒥᐢ 4

[1] ᑖᓂᑌ ᐁᐧᒋᐸᔨᑭ ᓇᑐᐸᔨᐃᐧᓇ ᒥᓇ ᓄᑎᓂᑐᐃᐧᓇ ᐃᑕ ᑳ ᐊᔮᔦᐠ? ᓇᒪ ᒋ ᐁᑯᑕ ᐅᐦᒋᐸᔨᐊᐧ ᑭ ᒥᔦᐧᔨᑕᒥᐃᓱᐃᐧᓂᐋᐧᕽ ᑳ ᓄᑎᓂᑐᒪᑲᑭ ᑭᔭᐃᐧᐋᐧᕽ?

[2] ᑭ ᒪᒋ ᒧᐢᑕᐁᐧᔨᑌᓈᐋᐧᐤ ᐁᑯᓯ ᓇᒪᐃᐧᔭ ᑭᐟ ᐊᔮᓈᐋᐧᐤ; ᑭ ᓂᐸᑖᑳᓈᐋᐧᐤ, ᒥᓇ ᑭ ᒧᐢᑕᐃᐧᓇᒫᑳᓈᐋᐧᐤ, ᐁᑯᓯ ᓇᒪᐃᐧᔭ ᑭ ᑭ ᑳᒋᑎᓀᓈᐋᐧᐤ; ᑭ ᓄᑎᓂᑳᓈᐋᐧᐤ ᒥᓇ ᑭ ᓇᑐᐸᔨᓇᐋᐧᐤ; ᓇᒪ ᑫᑲᐧᐩ ᑭᐟ ᐊᔮᓈᐋᐧᐤ ᒋᑫᒫ ᐁᑳ ᐁ ᓇᑐᑕᒣᐠ.

[3] ᑭ ᓇᑐᑌᓈᐋᐧᐤ, ᓇᒪᐃᐧᔭ ᒫᑲ ᑭ ᒥᔨᑲᐃᐧᓈᐋᐧᐤ, ᒋᑫᒫ ᐁᑳ ᑲᐧᔭᐢᐠ ᐁ ᐃᓯ ᓇᑐᑕᒣᐠ, ᑭᑕ ᒣᐢᑎᓇᒣᐠ ᑭᔭᐋᐧᐤ ᑭ ᒥᔦᐧᔨᑕᒥᐃᓱᐃᐧᓂᐋᐧᕽ.

[4] ᑭᔭᐋᐧᐤ ᐅᐱᓯᑳᐧᑎᓯᐢᑲᐠ ᓇᒪ ᒋ ᑭ ᑭᐢᑫᔨᑌᓈᐋᐧᐤ ᑳ ᐅᑐᑌᒥᑕᒥᕽ ᐊᐢᑭ ᐁᐊᐧᑯ ᐁ ᐸᑳᐧᑎᐦᐟ ᑭᓭᒪᓂᑐ? ᐊᐃᐧᔭᐠ ᒫᑲ ᐃᐧ ᐅᑐᑌᒥᒋ ᐊᐢᑭ ᐃᓯᐃᓱ ᐅ ᐸᑳᐧᑖᑲᓇ ᑭᓭᒪᓂᑐ.

[5] ᐊᐦᐳ ᒋ ᑭᐟ ᐃᑌᔨᑌᓈᐋᐧᐤ ᐱᑯᓇᑕ ᑭᐦᒋ ᒪᓯᓇᐦᐃᑫᐃᐧᐣ ᐁ ᐱᑭᐢᑫᐧᒪᑲᕽ? ᐊᓂᐦᐃ ᐊᐦᒑᐦᑲᐧ ᑳ ᑭ ᐅᓯᐋᐟ ᑭᑕ ᑭᑭᐢᑳᑯᐋᐧᔭᕽ ᑲᐢᑫᔨᑕᑦ ᒋ ᐃᓴᐋᓇᑫᔨᒧᐃᐧᓂᕽ?

[6] ᒫᑲ ᐃᐧᔭ ᒣᑭᐤ ᐊᐊᐧᓯᒣ ᓂᓱᑲᒫᑫᐃᐧᐣ. ᐁᑯᓯ ᒫᑲ ᑭᐦᒋ ᒪᓯᓇᐦᐃᑫᐃᐧᐣ ᐃᑌᐧᒪᑲᐣ, ᑭᓭᒪᓂᑐ ᓇᑳᐢᑲᐁᐧᐤ ᑳ ᑭᐢᑌᔨᒧᔨᐟ ᒫᑲ ᒥᔦᐤ ᐅ ᓂᓱᑲᒫᑫᐃᐧᐣ ᑳ ᑕᐸᑌᔨᒧᔨᐟ.

[7] ᑕᐸᑌᔨᒧᑐᑖᕽ ᒫᑲ ᑭᓭᒪᓂᑐ; ᒫᑲ ᓇᑳᐢᑳᕽ ᒪᒑᔭ ᐁᑯᓯ ᑭ ᑲ ᑕᐸᓯᐃᑯᐋᐧᐤ.

[8] ᑭᓯᐋᐧᐠ ᓈᑎᕽ ᑭᓭᒪᓂᑐ ᐁᑯᓯ ᑭᓯᐋᐧᐠ ᑭ ᑲ ᐯ ᓈᑎᑯᐋᐧᐤ. ᐯᑭᑖᐠ ᑭᒋᐦᒋᐋᐧᐊᐧ ᑭᔭᐋᐧᐤ ᐅᒪᒑᑎᓯᐊᐧᐠ; ᒥᓇ ᑲᓈᒋᑖᐠ ᑭᑌᐦᐃᐋᐧᐊᐧ ᑭᔭᐋᐧᐤ ᓂᓴᐧᔭᐠ ᑳ ᐃᑌᔨᑕᒣᐠ.

[9] ᑭᔮᑦ ᑭ ᑲ ᑯᑕᑭᑖᓈᐋᐧᐤ ᒥᓇ ᑭ ᑲ ᐱᑫᐧᔨᑌᓈᐋᐧᐤ ᒥᓇ ᑭ ᑲ ᒫᑐᓈᐋᐧᐤ; ᑭᔮᑦ ᑭ ᐸᐱᐃᐧᓂᐋᐧᐤ ᐱᑫᐧᔨᑕᒧᐃᐧᓂᕽ ᑭᑕ ᐃᓯ ᑫᐧᐢᑭᓂᑳᑌᐤ ᒥᓇ ᑭ ᒪᒪᐦᑖᑯᓯᐃᐧᓂᐋᐧᐤ ᑯᓯᑫᐧᔨᑕᒧᐃᐧᓂᕽ ᐃᓯ.

[10] ᑕᐸᑌᔨᒧᐃᓱᐠ ᐁ ᐃᓯ ᑭᑖᐸᒥᑯᔦᐠ ᑳ ᑎᐯᔨᐦᒋᑫᐟ ᐁᑯᓯ ᑭ ᑲ ᐅᐱᓂᑯᐋᐧᐤ.

[11] ᐁᑳᐃᐧᔭ ᒪᒋ ᐋᔨᒧᒥᑐᐠ ᓂᒋᐋᐧᒥᑎᐠ. ᐊᓇ ᑳ ᒪᒋ ᐋᔨᒧᒫᐟ ᐅᒋᐋᐧᒪ ᐊᐦᐳ ᑳ ᐅᔭᓱᐊᐧᑖᐟ ᐅᒋᐋᐧᒪ ᒪᒋ ᐋᔨᒧᑕᑦ ᐅᔭᓱᐁᐧᐃᐧᐣ ᒥᓇ ᐅᔭᓱᐋᐧᑕᑦ ᐅᔭᓱᐁᐧᐃᐧᐣ; ᒫᑲ ᑭᐢᐱᐣ ᐅᔭᓱᐋᐧᑕᒪᓂ ᐅᔭᓯᐁᐧᐃᐧᐣ ᓇᒪᐃᐧᔭ ᑭᐟ ᐃᑐᑌᐣ ᐅᔭᓱᐁᐧᐃᐧᐣ ᒫᑲ ᑯᔭᓱᐋᐧᐣ.

[12] ᐯᔭᑯ ᐱᑯ ᑳ ᒣᑭᐟ ᐅᔭᓱᐁᐧᐃᐧᐣ ᒥᓇ ᑳ ᐅᔭᓱᐁᐧᐟ, ᐊᓇ ᐅᑎ ᑳ ᑲᐢᑭᑖᐟ ᑭᑕ ᐱᒫᒋᐦᐃᐁᐧᐟ ᒥᓇ ᑭᑕ ᓂᓯᐊᐧᓈᒋᐦᐃᐁᐧᐟ; ᐊᐁᐧᓇ ᒫᑲ ᑭᔭ ᑳ ᐅᔭᓱᐋᐧᑕᐟ ᑭᒋ ᐊᔨᓯᔨᓂᐤ?

[13] ᐁᑲᐧ ᒫᑲ ᑭᔭᐋᐧᐤ ᑳ ᐃᑌᐧᔦᐠ, ᐊᓄᐦᐨ ᑳ ᑭᓯᑳᐠ ᐊᐦᐳ ᐋᐧᐸᐦᑭ ᓂ ᑲ ᐃᑐᑖᓈᐣ ᐅᒪ ᐅᑌᓈᕽ, ᐁᑯᓯ ᐁᑯᑕ ᐯᔭᐠ ᐊᐢᑭ ᓂ ᑲ ᐊᔮᓈᐣ, ᓂ ᑲ ᐊᑖᐦᑐᓈᐣ, ᓂ ᑲ ᑲᐢᑭᒋᑳᓈᐣ;

[14] ᐁᑯᓯ ᐁᑳ ᐁ ᑭᐢᑫᔨᑕᒣᐠ ᑖᓂᓯ ᑫ ᐃᑭᕽ ᐋᐧᐸᐦᑭ. ᑫᑲᐧᐩ ᐃᐧᔭ ᑭ ᐱᒫᑎᓯᐃᐧᓂᐋᐧᐤ? ᒋᑫᒫ ᑭᔭᐋᐧᐤ ᑖᐱᐢᑯᐨ ᐱᑭᓭᔮᐤ ᐊᒋᔭᐤ ᐱᑯ ᑳ ᓄᑲᐧᕽ ᐁᑯᓯ ᐁᑳ ᑳ ᐊᑎ ᓄᑲᐧᕽ.

[15] ᒋᑫᒫ ᑭ ᑲ ᐃᑖᐧᓈᐋᐧᐤ, ᑭᐢᐱᐣ ᑳ ᑎᐯᔨᐦᒋᑫᐟ ᐃᑌᔨᑕᑭ ᓂ ᑲ ᐱᒫᑎᓯᓈᐣ ᒥᓇ ᐅᒪ ᓂ ᑲ ᐃᑐᑌᓈᐣ ᐊᐦᐳ ᐊᓂᒪ.

[16] ᒫᑲ ᐁᑲᐧ ᑭ ᒪᒪᐦᑖᑯᓯᓈᐋᐧᐤ ᑭ ᑲᑭᐦᒋᒧᐃᐧᓂᐋᐧᕽ; ᑲᐦᑭᔭᐤ ᐁᑯᑐᐃᐧ ᒪᒪᐦᑖᑯᓯᐃᐧᐣ ᒫᔮᑕᐣ.

[17] ᐊᓇ ᒫᑲ ᑳ ᑭᐢᑫᔨᑕᕽ ᑭᑕ ᒥᔪᑐᑕᕽ ᐁᑳ ᒫᑲ ᑳ ᐃᑐᑕᕽ ᐁᐊᐧᑯ ᑳ ᒪᒋᑐᑕᕽ.