[1] ᓂᒋᐋᐧᒥᑎᐠ ᐁᑳᐃᐧᔭ ᑭᑭᓇᒧᐠ ᐅ ᑖᐯᐧᔦᔨᒥᑯᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᑳ ᑎᐯᔨᑕᕽ ᑭᐢᑌᔨᑖᑯᓯᐃᐧᐣ ᐁ ᑲᑫᑭᓈᔦᑯᐠ ᐊᔨᓯᔨᓂᐊᐧᐠ.
[2] ᒋᑫᒫ ᑭᐢᐱᐣ ᐱᐦᑐᑫᒋ ᑭ ᒫᐊᐧᒋᐃᑐᐃᐧᓂᐋᐧᕽ ᐊᔨᓯᔨᓂᐤ ᐅᓴᐃᐧᓱᓂᔮᐤ ᐊᒐᓂᓴ ᐁ ᑭᑭᐢᑲᐋᐧᐟ ᐁ ᒥᔪ ᑭᑭᐢᑳᒋᑫᐟ, ᐁᑯᑕ ᒫᑲ ᒥᓇ ᐯ ᐱᐦᑐᑫᒋ ᐁ ᑭᑎᒫᑭᓯᐟ ᐊᔨᓯᔨᓂᐤ ᐁ ᒫᔨ ᑭᑭᐢᑳᒋᑫᐟ;
[3] ᐁᑯᓯ ᑭ ᑭᐢᑌᔨᒫᐋᐧᐤ ᐊᓇ ᑳ ᒥᔪ ᑭᑭᐢᑳᒋᑫᐟ ᑭᐟ ᐃᑖᐋᐧᐤ ᒫᑲ, ᐅᑕ ᐊᐱ ᐃᑕ ᐁ ᒥᔮᐧᓯᐠ ᐊᐱᐃᐧᐣ; ᐁᑯᓯ ᒫᑲ ᑳ ᑭᑎᒫᑭᓯᐟ ᓈᐯᐤ ᑭᐟ ᐃᑖᐋᐧᐤ, ᓂᐸᐃᐧ ᐁᑯᑕ ᐊᐦᐳ ᓂᐟ ᐊᐢᐱᓯᑌᓯᒧᓂᕽ ᐊᐱ;
[4] ᓇᒪ ᒋ ᐱᑐᐢ ᑭᐟ ᐃᓯ ᐅ ᒥᑐᓀᔨᒋᑲᓈᓈᐋᐧᐤ ᒥᓇ ᑯᔭᓱᐋᐧᓈᐋᐧᐤ ᐁ ᒪᒋ ᒥᑐᓀᔨᒋᑲᓀᔦᐠ?
[5] ᓇᑐᐦᑕᒧᐠ ᑳ ᓴᑭᐦᐃᑕᑯᐠ ᓂᒋᐋᐧᒥᑎᐠ; ᓇᒪ ᒋ ᑭᓭᒪᓂᑐ ᑭ ᓇᐊᐧᓱᓀᐤ ᐊᓂᐦᐃ ᑳ ᑭᑎᒫᑭᓯᔨᐟ ᐊᐢᑭᕽ ᐃᐧᔭ ᐃᓯ ᑭᑕ ᐁᐧᔪᑎᓯᔨᐟ ᑖᐯᐧᔦᔨᑕᒧᐃᐧᐣ ᒥᓇ ᑭᑕ ᐊᑎ ᐊᔮᔨᐟ ᐊᓂᒪ ᐅᑌᓇᐃᐧᐃᐧᐣ ᑳ ᑭ ᐊᓱᑕᒪᐋᐧᐟ ᐊᓂᐦᐃ ᑳ ᓵᑭᐦᐃᑯᐟ?
[6] ᒫᑲ ᑭᔭᐋᐧᐤ ᑭ ᑭ ᐱᐁᐧᔨᒫᐋᐧᐤ ᑳ ᑭᑎᒫᑭᓯᐟ ᐊᔨᓯᔨᓂᐤ. ᓇᒪ ᒋ ᑳ ᐁᐧᔪᑎᓯᒋᐠ ᑭ ᑭᑎᒪᐃᑯᐋᐧᐊᐧᐠ ᒥᓇ ᑭᐟ ᐃᓯᑖᐯᐸᐃᑯᐋᐧᐊᐧᐠ ᐅᔭᓱᐁᐧᐊᐧᐱᐃᐧᓂᕽ?
[7] ᓇᒪ ᒋ ᐹᐢᑖᒧᐃᐧ ᐱᑭᐢᑳᐧᑕᒪᐧᐠ ᐊᓂᒪ ᑭᐦᒋ ᐃᐧᔪᐃᐧᐣ ᑳ ᐃᓯ ᐃᐧᔨᑲᐃᐧᔦᐠ?
[8] ᒫᑲ ᑭᐢᐱᐣ ᑎᐱᑐᑕᒣᑯ ᐊᓂᒪ ᑭᒋ ᐅᔭᓱᐁᐧᐃᐧᐣ ᑳ ᐃᑕᐢᑌᐠ ᑭᐦᒋ ᒪᓯᓇᐦᐃᑫᐃᐧᐣ, ᑭ ᑲ ᓵᑭᐦᐋᐤ ᑭᐦᒋ ᐊᔨᓯᔨᓂᐤ ᑖᐱᐢᑯᐨ ᑭᔭ, ᑭ ᒥᔪᑐᑌᓈᐋᐧᐤ;
[9] ᒫᑲ ᑭᐢᐱᐣ ᑭ ᑲᑫᑭᓂᑳᓈᐋᐧᐤ, ᑭ ᒪᒋᑐᑌᓈᐋᐧᐤ, ᒥᓇ ᑭ ᑫᒋᓈᐃᑯᓈᐋᐧᐤ ᐅᔭᓱᐁᐧᐃᐧᐣ ᐁ ᐊᐧᓂᑐᑕᒣᐠ.
[10] ᒋᑫᒫ ᐊᐃᐧᔭᐠ ᑫ ᑲᓇᐁᐧᔨᑕᒧᑫᐧ ᒥᓯᐁᐧ ᐅᔭᓯᐁᐧᐃᐧᐣ ᒫᑲ ᐯᔭᑲᐧᔭᐠ ᐸᐦᑭᓯᑭ, ᑲᐦᑭᔭᐤ ᐊᑖᒥᒫᐤ.
[11] ᒋᑫᒫ ᐊᓇ ᑳ ᑭ ᐃᑌᐧᐟ, ᓇᒪᐃᐧᔭ ᑭ ᑲ ᐱᓯᑲᐧᑎᓯᐣ, ᑭ ᐃᑌᐧᐤ ᒥᓇ, ᓇᒪᐃᐧᔭ ᑭ ᑲ ᓂᐸᑖᑳᐣ. ᑭᐢᐱᐣ ᒫᑲ ᐁᑳ ᐱᓯᑳᐧᑎᓯᔭᓂ ᒫᑲ ᓂᐸᑖᑫᔭᓂ ᑭ ᐱᑯᓀᐣ ᐅᔭᓱᐁᐧᐃᐧᐣ.
[12] ᐁᑯᓯ ᐃᓯ ᐱᑭᐢᑫᐧᐠ ᒥᓇ ᐁᑯᓯ ᐃᑐᑕᒧᐠ ᑖᐱᐢᑯᐨ ᐊᔨᓯᔨᓂᐊᐧᐠ ᑫ ᐅᔭᓯᐋᑎᑯᒋᐠ ᑎᐯᔨᒥᓱᐃᐧ ᐅᔭᓱᐁᐧᐃᐧᐣ.
[13] ᒋᑫᒫ ᐅᔭᓱᐁᐧᐃᐧᐣ ᓇᒪᐃᐧᔭ ᑭᑎᒫᑭᓈᐠ ᐊᓇ ᐁᑳ ᐊᐃᐧᔭ ᑳ ᑭᑎᒫᑭᓇᐋᐧᐟ; ᒫᑲ ᑭᑎᒫᑭᓈᑫᐃᐧᐣ ᒪᒥᒋᒧᒪᑲᐣ ᐁ ᓵᑯᒋᑖᒪᑲᕽ ᐅᔭᓱᐁᐧᐃᐧᐣ.
[14] ᑖᓂᓯ ᑫ ᐃᑖᐸᑕᕽ ᓂᒋᐋᐧᒥᑎᐠ, ᑭᐢᐱᐣ ᐊᔨᓯᔨᓂᐤ ᐃᑌᐧᒋ ᐁ ᐊᔮᐟ ᑖᐯᐧᔦᔨᑕᒧᐃᐧᐣ ᐁᑳ ᒫᑲ ᐊᔮᒋ ᐊᑐᐢᑫᐃᐧᓇ? ᑭᑕ ᑭ ᒋ ᐱᒫᒋᐃᐟ ᑖᐯᐧᔦᔨᑕᒧᐃᐧᐣ?
[15] ᑭᐢᐱᐣ ᐅᒋᐋᐧᒥᒫᐤ ᐊᐦᐳ ᐅᑕᐁᐧᒫᐃᐧᒫᐤ ᒧᓭᐢᑲᑌᒋ ᒥᓇ ᑭᐧᑕᒫᒋ ᑕᐦᑐ ᑭᓯᑳᐤ ᒥᒋᐃᐧᐣ,
[16] ᐁᑯᓯ ᐯᔭᐠ ᑭᔭᐋᐧᐤ ᑭᐟ ᐃᑖᐋᐧᐤ, ᓂᔮ ᐯᔭᑕᑫᔨᒧᐃᐧᓂᕽ, ᑭ ᑲ ᐃᐧ ᑭᓱᓯᐣ ᒥᓇ ᑭ ᑲ ᐃᐧ ᑭᐢᐳᐣ; ᐁᑯᓯ ᒫᑲ ᓇᒪᐃᐧᔭ ᑭ ᒥᔮᐋᐧᐊᐧᐠ ᐊᓂᐦᐃ ᑳ ᑭᐧᑕᒫᒋᐠ ᐃᐧᔭᐃᐧᐋᐧᕽ; ᑖᓂᓯ ᑫ ᐃᑖᐸᑕᕽ?
[17] ᐁᑯᓯ ᐃᓯ ᒫᑲ ᑖᐯᐧᔦᔨᑕᒧᐃᐧᐣ, ᑭᐢᐱᐣ ᐁᑳ ᐊᑐᐢᑫᐃᐧᓇ ᐊᔮᑳᐧᐃᐧ, ᓂᐳᒪᑲᐣ ᐃᐧᔭ ᑫᐦᒋᐋᐧᐠ.
[18] ᒋᑫᒫ ᐊᔨᓯᔨᓂᐤ ᑭᑕ ᐃᑌᐧᐤ, ᑭᐟ ᐊᔮᐣ ᑖᐯᐧᔦᔨᑕᒧᐃᐧᐣ ᓂᔭ ᒫᑲ ᓂᐟ ᐊᔮᐣ ᐊᑐᐢᑫᐃᐧᓇ; ᐋᐧᐸᐦᑕᐃᐣ ᑭ ᑖᐯᐧᔦᔨᑕᒧᐃᐧᐣ ᐱᐢᑭᐢ ᒥᓇ ᑭᐟ ᐊᑐᐢᑫᐃᐧᓇ ᐁᑯᓯ ᓂᔭ ᓂᐟ ᐊᑐᐢᑫᐃᐧᓇ ᑭ ᑲ ᐅᐦᒋ ᐋᐧᐸᐦᑕᐃᑎᐣ ᓂ ᑖᐯᐧᔦᔨᑕᒧᐃᐧᐣ.
[19] ᑭ ᑖᐯᐧᑌᐣ ᐁ ᐯᔭᑯᐟ ᑭᓭᒪᓂᑐ; ᑲᐧᔭᐢᐠ ᑭᐟ ᐃᑐᑌᐣ; ᒪᒑᔭᐠ ᒫᑲ ᐃᐧᐢᑕᐋᐧᐤ ᑖᐯᐧᑕᒪᐧᐠ ᐁᑯᓯ ᑲᑳᐧᐃᔭᑫᔨᑕᒪᐧᐠ.
[20] ᒫᑲ ᑭ ᑲ ᑭᐢᑫᔨᑌᐣ ᒋ ᑭᔭ ᐊᔨᓯᔨᓂᐤ ᑳ ᑭᐢᑌᔨᒧᔭᐣ, ᑖᐯᐧᔦᔨᑕᒧᐃᐧᐣ ᐁᑳ ᐁ ᐃᐧᒉᑐᒪᑲᕽ ᐊᑐᐢᑫᐃᐧᓇ ᓇᒪ ᑫᑲᐧᐩ ᐅᐱᑭᑖᒪᑲᐣ?
[21] ᓇᒪ ᒋ ᐁᑊᕒᐁᐊᑦ ᑯᑖᐃᐧᓇᐤ ᑭ ᑲᐧᔭᐢᑳᐧᑎᓯᐊᐧᑭᒫᐤ ᐊᑐᐢᑫᐃᐧᓇ ᐅᐦᒋ ᐊᓂᒪ ᐁ ᑭ ᐸᑭᑎᓈᐟ ᐊᐃᓴᑲ ᐅᑯᓯᓴ ᐸᑭᑎᓈᓱᐃᐧᓈᐱᐢᑯᕽ?
[22] ᑭ ᐋᐧᐸᑌᐣ ᒫᑲ ᑖᐯᐧᔦᔨᑕᒧᐃᐧᐣ ᐁ ᑭ ᐊᑐᐢᑫᒪᑲᓂᔨᐠ ᐅᐟ ᐊᑐᐢᑫᐃᐧᓂᕽ ᐁᑯᓯ ᐊᑐᐢᑫᐃᐧᓈ ᐅᐦᒋ ᑖᐯᐧᔦᔨᑕᒧᐃᐧᐣ ᐁ ᑭ ᒪᒥᑐᓂᑖᕽ;
[23] ᐁᑯᓯ ᑭᐦᒋ ᒪᓯᓇᐦᐃᑫᐃᐧᐣ ᑭ ᑎᐱᐸᔨᐤ ᑳ ᐃᑌᐧᒪᑲᕽ, ᐁᑊᕒᐁᐊᑦ ᒫᑲ ᑭ ᑖᐯᐧᑕᐁᐧᐤ ᑭᓭᒪᓂᑐᐊᐧ ᐁᑯᓯ ᑲᐧᔭᐢᑳᐧᑎᓯᐃᐧᐣ ᑭ ᐃᑕᑭᑕᒪᐋᐧᐤ; ᑭ ᐃᑖᐤ ᒫᑲ ᑭᓭᒪᓂᑐ ᐅᑐᑌᒪ.
[24] ᑭ ᐋᐧᐸᑌᓈᐋᐧᐤ ᒫᑲ ᐊᑐᐢᑫᐃᐧᓇ ᐊᔨᓯᔨᓂᐤ ᐁ ᐅᐦᒋ ᑲᐧᔭᐢᑳᐧᑎᓯᐊᐧᑭᒥᐦᐟ ᓇᒪᐃᐧᔭ ᐱᑯ ᑖᐯᐧᔦᔨᑕᒧᐃᐧᐣ ᐅᐦᒋ.
[25] ᒥᓇ ᓇᒪ ᒋ ᐁᑯᓯ ᐅᐱᓯᑳᐧᑎᓯᐃᐧᐢᑫᐧᐤ ᕒᐁᐋᑊ ᑭ ᑲᐧᔭᐢᑳᐧᑎᓯᐊᐧᑭᒫᐤ ᐊᑐᐢᑫᐃᐧᓇ ᐅᐦᒋ ᐊᓂᒪ ᐁ ᑭ ᐱᑐᑲᐋᐟ ᐅᓇᑕᐋᐧᑖᐊᐧ ᒥᓇ ᐱᑐᓯ ᒣᐢᑲᓇᐤ ᐁ ᑭ ᐃᓯ ᓯᐯᐧᑎᓯᐋᐧᐟ?
[26] ᒋᑫᒫ ᑖᐱᐢᑯᐨ ᒥᔭᐤ ᐁᑳ ᐊᐦᒑᕽ ᐁ ᑭᑭ ᐊᔮᐟ ᑳ ᓂᐳᒪᑲᕽ, ᐁᑯᓯ ᐃᓯ ᒥᓇ ᑖᐯᐧᔦᔨᑕᒧᐃᐧᐣ ᐁᑳ ᐁ ᑭᑭ ᐊᔮᑭ ᐊᑐᐢᑫᐃᐧᓇ ᓂᐳᒪᑲᐣ.