[1] ᒫᑲ ᐃᐧᔭ ᐃᐢᐱ ᑫ ᐅᑎᐦᒋᐸᔨᐠ ᒥᓇ ᐁ ᐃᐢᐱᑖᔭᐊᐧᕽ, ᓂᒋᐋᐧᒥᑎᐠ, ᓇᒪᐃᐧᔭ ᑭ ᓇᑕᐁᐧᔨᑌᓈᐋᐧᐤ ᑫᑲᐧᐩ ᑭᑕ ᒪᓯᓇᐦᐊᒫᑲᐃᐧᔦᐠ.
[2] ᒋᑫᒫ ᑭᔭᐋᐧᐤ ᒥᑐᓂ ᑭ ᑭᐢᑫᔨᑌᓈᐋᐧᐤ ᐅ ᑭᓯᑳᑦ ᑳ ᑎᐯᔨᐦᒋᑫᐟ ᑭᑕ ᐅᑎᐦᒋᐸᔨᔨᐠ ᑖᐱᐢᑯᐨ ᑭᒧᑎᐢᐠ ᐁ ᒣᑳᐧ ᑎᐱᐢᑲᔨᐠ.
[3] ᐁ ᒣᑳᐧ ᑕᓯᑕᑭᐠ ᐯᔭᑕᑫᔨᒧᐃᐧᐣ ᒥᓇ ᐊᐧᐋᐧᓇᐢᑫᐃᐧᐣ, ᐁᑲᐧ ᓯᓯᑯᐨ ᓂᓯᐊᐧᓈᑎᓯᐃᐧᐣ ᑫ ᐅᑎᐦᑎᑯᒋᐠ, ᑖᐱᐢᑯᐨ ᐃᐧᓴᑫᔨᑕᒧᐃᐧᐣ ᐃᐢᑫᐧᐤ ᐁ ᐃᐧ ᐋᐧᐸᒫᐊᐧᓱᐟ; ᐁᑯᓯ ᓇᒪᐃᐧᔭ ᑭᑕ ᑭ ᑕᐸᓯᐊᐧᐠ.
[4] ᒫᑲ ᑭᔭᐋᐧᐤ, ᓂᒋᐋᐧᒥᑎᐠ, ᓇᒪᐃᐧᔭ ᐊᐧᓂᑎᐱᐢᑳᕽ ᑭᐟ ᐊᔮᓈᐋᐧᐤ, ᐁᐊᐧᑯ ᑭᓯᑳᐤ ᑭᑕ ᓴᐢᒋᐃᐧᔨᑯᔦᐠ ᑖᐱᐢᑯᐨ ᑭᒧᑎᐢᐠ:
[5] ᒋᑫᒫ ᑲᐦᑭᔭᐤ ᑭ ᑭ ᓂᐦᑖᐃᐧᑭᐃᑯᓈᐋᐧᐤ ᐋᐧᐢᑌᐤ, ᒥᓇ ᑭᓯᑳᐤ: ᓇᒪᐃᐧᔭ ᑭᔮᓇᐤ ᐃᐧᔭ ᐁ ᑎᐱᐢᑳᐠ ᑭᐟ ᐊᔮᓈᓇᐤ, ᐊᐦᐳ ᐊᐧᓂᑎᐱᐢᑳᕽ;
[6] ᐁᑯᓯ ᒫᑲ ᐁᑳᐃᐧᔭ ᓂᐹᑖᐠ ᑖᐱᐢᑯᐨ ᑯᑕᑲᐠ, ᒫᑲ ᐊᓴᐋᐧᐱᑖᐠ ᒥᓇ ᐊᔮᑳᐧᒥᓯᑖᐠ.
[7] ᒋᑫᒫ ᐊᓂᑭ ᑳ ᓂᐹᒋᐠ ᐁ ᑎᐱᐢᑳᔨᐠ ᓂᐹᐊᐧᐠ; ᒥᓇ ᐊᓂᑭ ᑳ ᑭᐢᑫᐧᐯᒋᐠ ᐁ ᑎᐱᐢᑳᔨᐠ ᑭᐢᑫᐧᐯᐊᐧᐠ.
[8] ᒫᑲ ᑭᔮᓇᐤ ᑭᔮᑦ, ᐃᐧᔭ ᐁ ᑭᓯᑳᐠ ᐁ ᐃᐧᒋᐃᐁᐧᔭᕽ, ᐊᔮᑳᐧᒥᓯᑖᐠ, ᐁ ᐳᓯᐢᑲᒪᕽ ᐊᓂᒪ ᒫᐢᑭᑲᓈᐱᐢᐠ ᑖᐯᐧᔦᔨᑕᒧᐃᐧᐣ ᒥᓇ ᓵᑭᐦᐃᐁᐧᐃᐧᐣ; ᒥᓇ ᑭᑕ ᑭᑲᐢᑐᑎᓀᔭᕽ, ᑳ ᐃᑕᑌᔨᑕᒥᕽ ᐱᒫᒋᐦᐅᐃᐧᐣ.
[9] ᒋᑫᒫ ᑭᓭᒪᓂᑐ ᓇᒪᐃᐧᔭ ᑭᓯᐋᐧᓯᐃᐧᓂᕽ ᑳ ᑭ ᐃᑕᑭᒥᑯᔭᕽ, ᒫᑲ ᑭᑕ ᐊᔮᔭᕽ ᐱᒫᒋᐦᐅᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᐅᐦᒋ,
[10] ᑳ ᑭ ᓂᐳᐢᑕᒫᑯᔭᕽ, ᐁᑯᓯ, ᑭᐢᐱᐣ ᐁ ᑯᐢᑯᐢᑳᔭᕽ ᐊᐦᐳ ᐁ ᓂᐹᔭᕽ, ᑭᑕ ᐃᐧᒋ ᐱᒫᑎᓯᒫᔭᕽ.
[11] ᓴᓯᑭᒥᑐᐠ ᒫᑲ, ᒥᓇ ᑭᐢᑭᓄᐦᐊᒫᑐᐠ, ᑖᐱᐢᑯᐨ ᐃᓴ ᐱᑯ ᑳ ᐃᑐᑕᒣᐠ.
[12] ᒫᑲ ᑭ ᐸᑯᓭᔨᒥᑎᓈᐋᐧᐤ ᓂᒋᐋᐧᒥᑎᐠ, ᑭᑕ ᑭᐢᑫᔨᒫᔦᑯᐠ ᐊᓂᑭ ᑳ ᐊᑐᐢᑫᒋᐠ ᐃᑕ ᑳ ᐊᔮᔦᐠ, ᒥᓇ ᑳ ᐸᒥᐃᑯᔦᑯᐠ ᑳ ᑎᐯᔨᐦᒋᑫᐟ ᐃᓯ, ᒥᓇ ᑳ ᐊᔮᑳᐧᒥᒥᑯᔦᑯᐠ;
[13] ᐁᑯᓯ ᓈᐢᐱᐨ ᑭᑕ ᑭᐢᑌᔨᒫᔦᑯᐠ ᓵᑭᐦᐃᐁᐧᐃᐧᓂᕽ ᐅᐟ ᐊᑐᐢᑫᐃᐧᓂᐋᐧᐤ ᐅᐦᒋ. ᒥᔪ ᐃᐧᒉᑐᐠ ᒫᑲ ᑭᔭᐋᐧᐤ.
[14] ᑭ ᓯᑭᒥᑎᓈᐣ ᒫᑲ ᓂᒋᐋᐧᒥᑎᐠ, ᐊᔮᑳᐧᒥᒥᑯᐠ ᑳ ᑭᐢᑫᐧᔮᑎᓯᒋᐠ, ᓯᑭᒥᑯᐠ ᑳ ᓀᓱᐃᐧᑌᐁᒋᐠ, ᓯᑐᓂᑯᐠ ᑳ ᓀᓱᐃᐧᓯᒋᐠ, ᓯᐱᔭᐁᐧᓯᐢᑖᑯᐠ ᑲᐦᑭᔭᐤ.
[15] ᓈᑲᑕᐁᐧᔨᑕᒧᐠ ᐁᑳ ᐊᐃᐧᔭᐠ ᑭᑕ ᐊᐧᓂᑐᑕᐋᐧᐟ ᐊᐃᐧᔭ ᐁ ᐊᐧᓂᑐᑖᑯᐟ; ᒫᑲ ᑳᑭᑫ ᐱᒥᑎᓴᐦᐊᒧᐠ ᐊᓂᒪ ᑳ ᒥᔮᐧᓯᐠ, ᐁ ᐃᑐᑖᑐᔦᐠ, ᒥᓇ ᐁ ᐃᑐᑕᐋᐧᔦᐠ ᑲᐦᑭᔭᐤ ᐊᐃᐧᔭᐠ.
[16] ᑳᑭᑫ ᒥᔭᐋᐧᑕᒧᐠ;
[17] ᐁᑳᐃᐧᔭ ᑭᐱᒋ ᐊᔭᒥᐦᐋᐠ;
[18] ᑲᐦᑭᔭᐤ ᑫᑲᐧᐩ ᓇᓈᐢᑯᒧᑖᐧᐠ: ᒋᑫᒫ ᐁᐊᐧᑯ ᐅᒪ ᐁ ᐃᑌᔨᒥᑯᔦᐠ ᑭᓭᒪᓂᑐ ᙭ ᒋᓴᐢ ᐃᓯ.
[19] ᐁᑳᐃᐧᔭ ᐋᐢᑕᐁᐧᐅᕽ ᐊᐦᒑᕽ;
[20] ᐁᑳᐃᐧᔭ ᐋᑕᐁᐧᔨᑕᒧᐠ ᑭᐢᑭᐁᐧᐦᐃᑫᐃᐧᓇ;
[21] ᑯᑌᔨᑕᒧᐠ ᑲᐦᑭᔭᐤ ᑫᑲᐧᐩ; ᒥᒋᒥᓇᒧᐠ ᐊᓂᒪ ᑳ ᒥᔮᐧᓯᐠ;
[22] ᓇᑭᐢᑕᒧᐠ ᑲᐦᑭᔭᐤ ᐁ ᐊᐃᓯᓈᑲᐧᕽ ᒪᒋ ᐃᑎᐃᐧᐣ.
[23] ᐊᓇ ᒫᑲ ᑭᓭᒪᓂᑐ ᐃᑕ ᐁᐧᒋᐠ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᒥᑐᓂ ᑲᓈᒋᐃᑯᐋᐧᐤ; ᐱᑕᓀ ᒫᑲ ᑭ ᒥᑐᓀᔨᒋᑲᓂᐋᐧᐤ ᒥᓇ ᑭᐟ ᐊᐦᒑᐦᑯᐋᐧᐤ ᒥᓇ ᑭᔭᐃᐧᐋᐧᐤ ᒥᑐᓂ ᒫᒪᐃᐧ ᑭ ᑲᓇᐁᐧᔨᑖᑲᐧᑭ, ᐁᑳ ᑭᑕ ᐋᓀᐧᔨᑖᑯᓯᔦᐠ ᐃᐢᐱ ᑕᑯᓯᑭ ᑳ ᑎᐯᔨᒥᑯᔭᕽ ᒋᓴᐢ ᙭.
[24] ᑖᐯᐧᐤ ᐊᓇ ᑳ ᓇᑐᒥᑯᔦᐠ, ᐁᐊᐧᑯ ᒥᓇ ᑫ ᐃᑐᑕᕽ.
[25] ᓂᒋᐋᐧᒥᑎᐠ, ᐊᔭᒥᐦᐁᐢᑕᒪᐃᐧᓈᐣ.
[26] ᐊᑕᒥᐢᑲᑯᐠ ᑲᐦᑭᔭᐤ ᐅᒋᐋᐧᒥᒫᐊᐧᐠ ᑲᓈᒋ ᐅᒉᑐᐃᐧᐣ ᐅᐦᒋ.
[27] ᑭ ᐊᔮᑳᐧᒥᒥᑎᓈᐋᐧᐤ ᑳ ᑎᐯᔨᐦᒋᑫᐟ ᐁ ᐊᐢᐱᒧᔮᐣ ᐅᒪ ᒪᓯᓇᐦᐊᒫᑫᐃᐧᐣ ᑭᑕ ᐊᔭᒥᑖᐧᒋᐠ ᑲᐦᑭᔭᐤ ᐅᒋᐋᐧᒥᒫᐊᐧᐠ.
[28] ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᐦᒋᑫᐟ ᒋᓴᐢ ᙭ ᑭ ᑲ ᐃᐧ ᐃᐧᒉᐃᐧᑯᓈᐋᐧᐤ.