<1 Peter ᓂᐢᑕᑦ ᐱᑕᕒ 4

[1] ᐁᑯᓯ ᒫᑲ ᙭ ᐁ ᑭ ᑯᑕᑭᑖᐟ ᐃᐧᔮᓯᕽ, ᒪᓂᐃᓱᐠ ᐁᐊᐧᑳᐧᓂᒪ ᒥᑐᓀᔨᒋᑲᐣ; ᒋᑫᒫ ᐊᓇ ᑳ ᑭ ᑯᑕᑭᑖᐟ ᐃᐧᔮᓯᕽ ᑭ ᐳᓂᑖᐤ ᒪᒋᑎᐃᐧᐣ;

[2] ᐁᑲᐧ ᐅᑌ ᓂᑳᐣ ᐃᐢᑯ ᐅᑕ ᑫ ᐊᔮᔦᐠ ᑭᑕ ᐱᒫᑎᓯᔦᐠ ᐁ ᐃᓯ ᒪᒋ ᒧᐢᑕᐁᐧᔨᑕᐦᑭᐠ ᐊᔨᓯᔨᓂᐊᐧᐠ ᒫᑲ ᐁ ᐃᓯ ᓇᑕᐁᐧᔨᑕᕽ ᑭᓭᒪᓂᑐ.

[3] ᒋᑫᒫ ᐁᑯᔨᑯᕽ ᑭᑕ ᑭ ᐃᑌᔨᑕᒣᐠ ᑯᑖᓈᑭᒥᐋᐧᕽ ᑳ ᑭ ᐯ ᐊᑐᐢᑳᑕᒣᐠ ᐁ ᐃᓯ ᓇᑕᐁᐧᔨᑕᐦᑭᐠ ᒉᐣᑕᐃᓬᐊᐠ, ᒥᓇ ᐁ ᑭ ᐱᒧᑖᑐᑕᒣᐠ ᐱᓯᑳᐧᑎᓯᐃᐧᓇ, ᒪᒋ ᒧᐢᑕᐁᐧᔨᑕᒧᐃᐧᓇ, ᓱᒥᓈᐳ ᒥᓂᑫᐧᐃᐧᓇ, ᑭᐢᑫᐧᔮᑎᓯᐃᐧᓇ, ᑭᐢᑫᐧᐯᐊᐧᑲᒥᑭᓯᐃᐧᓇ, ᒥᓇ ᐁ ᐸᑳᐧᑎᑲᐧᑭ ᒪᓂᑐᑫᐃᐧᓇ;

[4] ᐁᐊᐧᑯᓂ ᐁᑲᐧ ᑳ ᒫᒪᐢᑳᑕᑭᐠ ᐁᑳ ᐁ ᐃᐧᒋ ᐃᐢᐹᑖᒫᔦᑯᐠ ᑫᔮᐱᐨ ᑭᑕ ᐅᓵᒥᐃᓱᔦᐠ, ᐁ ᒫᔨᐃᑎᑯᔦᑯᐠ;

[5] ᑭᔭᐋᐧᐤ ᑫ ᐋᒋᒧᐢᑕᐋᐧᔦᐠ ᐊᓇ ᑳ ᑲᐧᔮᒋ ᐊᔮᐟ ᑭᑕ ᐅᔭᓱᐋᐧᑖᐟ ᐅᐱᒫᑎᓯᐊᐧ ᒥᓇ ᐅᓂᐱᐊᐧ.

[6] ᒋᑫᒫ ᐁᐊᐧᑯ ᐅᒪ ᐅᐦᒋ ᒥᔮᐧᒋᒧᐃᐧᐣ ᑳ ᑭ ᐃᐧᐦᑕᒫᒋᐠ ᐊᐦᐳ ᐅᓂᐱᐊᐧᐠ, ᑭᑕ ᐅᔭᓱᐋᐧᑎᒋᐠ ᐊᔨᓯᔨᓂᕽ ᐃᓯ ᐃᐧᔮᓯᕽ ᒫᑲ ᑭᑕ ᐱᒫᑎᓯᒋᐠ ᑭᓭᒪᓂᑐᕽ ᐃᓯ ᐊᐦᒑᐦᑯᕽ.

[7] ᒫᑲ ᐁ ᑭᓯᐱ ᐊᔮᐠ ᑲᐦᑭᔭᐤ ᑫᑲᐧᐩ ᐯᓱᓈᑲᐧᐣ; ᑲᐧᔭᐢᐠ ᒫᑲ ᐃᓯ ᐅ ᒥᑐᓀᔨᒋᑲᓀᐠ ᒥᓇ ᐊᔮᑳᐧᒥᓯᐠ ᐊᔭᒥᐦᐋᐃᐧᓂᕽ ᐃᓯ;

[8] ᐊᔨᐋᐧᐠ ᒫᑲ ᐊᔮᐠ ᒥᑐᓂ ᓵᑭᐦᐃᑐᐃᐧᐣ ᑭᔭᐋᐧᐤ ᑫᐦᒋᐋᐧᐠ; ᒋᑫᒫ ᓵᑭᐦᐃᐁᐧᐃᐧᐣ ᐊᑲᐧᓇᐊᒧᒪᑲᐣ ᐁ ᐅᓵᒣᔭᑎᑭ ᒪᒋᑎᐃᐧᓇ;

[9] ᒥᔪ ᐸᒥᐃᑐᐠ ᐁᑳ ᐁ ᐋᒋᐢᑕᐁᐧᔨᑕᒣᐠ;

[10] ᐱᑯ ᐃᔨᑯᕽ ᒐᒉᑊ ᐁ ᑭ ᐃᓯ ᒥᔨᑯᐃᐧᓯᔦᐠ, ᐸᒥᐢᑖᑫᐃᐧᓂᕽ ᐁ ᐋᐸᒋᑖᔦᐠ ᑭᔭᐋᐧᐤ ᑫᐦᒋᐋᐧᐠ, ᐁ ᒥᔪ ᐸᒥᑖᔦᐠ ᑳ ᐋᔮᑭᐧᑕᐃᐧ ᑭᓭᐋᐧᑐᑖᑯᔦᐠ ᑭᓭᒪᓂᑐ;

[11] ᑭᐢᐱᐣ ᐊᐃᐧᔭᐠ ᐱᑭᐢᑫᐧᒋ ᑭᔮᑦ ᑭᑕ ᐃᓯ ᐱᑭᐢᑫᐧᐤ ᑖᐱᐢᑯᐨ ᐅᐟ ᐃᑌᐧᐃᐧᓇ ᑭᓭᒪᓂᑐ; ᑭᐢᐱᐣ ᐊᐃᐧᔭᐠ ᐸᒥᐢᑖᑫᒋ ᑭᔮᑦ ᑭᑕ ᐸᒥᐢᑖᑫᐤ ᐃᔨᑯᕽ ᒪᐢᑲᐃᐧᓯᐃᐧᐣ ᑭᓭᒪᓂᑐ ᑳ ᐅᐦᒋᐢᑕᒫᑫᐟ; ᑲᐦᑭᔭᐤ ᑫᑲᐧᐩ ᑭᑕ ᐅᐦᒋ ᑭᐢᑌᔨᑖᑯᐦᐃᐦᐟ ᑭᓭᒪᓂᑐ ᐃᐧᔭ ᐅᐦᒋ ᒋᓴᐢ ᙭, ᑳ ᐊᔮᐟ ᑭᐢᑌᔨᑖᑯᓯᐃᐧᐣ ᒥᓇ ᑎᐯᔨᐦᒋᑫᐃᐧᐣ ᑳᑭᑫ ᒥᓇ ᑳᑭᑫ. ᐋᒣᐣ.

[12] ᓯᔮᑭᐦᐃᑕᑯᐠ, ᐁᑳᐃᐧᔭ ᒫᒪᐢᑳᑕᒧᐠ ᐊᓂᒪ ᐃᐢᑯᑌᐃᐧ ᑲᑫᐧᒋᐃᐁᐧᐃᐧᐣ ᑳ ᒣᑳᐧᓂᑯᔦᐠ ᑳ ᐅᑎᐦᑎᑯᔦᐠ ᑭᑕ ᑯᒋᐃᑯᔦᐠ ᑖᐱᐢᑯᐨ ᐁᑫᐧᔮᐠ ᐁ ᐃᑭᕽ ᑳ ᐅᑎᐦᑎᑯᔦᐠ;

[13] ᒫᑲ ᒋᑫᒫ ᐁ ᐃᐧᒋᐃᐁᐧᔦᐠ ᙭ ᐅ ᑯᑕᑭᑖᐃᐧᓇ ᒪᒪᐦᑖᑯᓯᐠ; ᐃᐢᐱ ᓄᑲᐧᓂᔨᑭ ᐅ ᑭᐢᑌᔨᑖᑯᓯᐃᐧᐣ ᑭᑕ ᒪᒪᐦᑖᑯᓯᔦᐠ ᑭᐦᒋ ᒪᒪᐦᑖᑯᓯᐃᐧᓂᕽ.

[14] ᑭᐢᐱᐣ ᑭ ᒫᔨ ᐃᑎᑲᐃᐧᓈᐋᐧᐤ ᙭ ᐅ ᐃᐧᔪᐃᐧᐣ ᐅᐦᒋ, ᑭ ᓴᐁᐧᔨᑖᑯᓯᓈᐋᐧᐤ; ᒋᑫᒫ ᑭᐢᑌᔨᑖᑯᓯᐃᐧ ᐊᐦᒑᕽ ᒥᓇ ᐅᐟ ᐊᐦᒑᐦᑲᐧ ᑭᓭᒪᓂᑐ ᑭ ᐃᐧᒋ ᐊᔮᒥᑯᐋᐧᐤ.

[15] ᒫᑲ ᐁᑳᐃᐧᔭ ᐊᐃᐧᔭᐠ ᑭᔭᐋᐧᐤ ᑭᑕ ᑯᑕᑭᑖᐤ ᓂᐸᑖᑫᐃᐧᐣ ᐅᐦᒋ, ᐊᐦᐳ ᑭᒧᑎᐃᐧᐣ ᐅᐦᒋ, ᐊᐦᐳ ᒪᒋᑐᑕᒧᐃᐧᐣ ᐅᐦᒋ ᐊᐦᐳ ᐁ ᒥᑯᐢᑳᒋᑖᐟ ᑯᑕᑲ ᐊᔨᓯᔨᓂᐊᐧ ᐅᐟ ᐊᔮᐃᐧᓂᔨᐊᐧ;

[16] ᒫᑲ ᑭᐢᐱᐣ ᐊᔨᓯᔨᓂᐤ ᑯᑕᑭᑖᒋ ᐁ ᙭ᐃᔭᓂᐃᐧᐟ ᐅᐦᒋ ᐁᑳᐃᐧᔭ ᑭᑕ ᓇᓀᐯᐃᐧᓯᐤ; ᒫᑲ ᑭᔮᑦ ᑭᑕ ᑭᐢᑌᔨᑖᑯᐁᐤ ᑭᓭᒪᓂᑐᐊᐧ ᐅᒪ ᑳ ᐃᓯ ᐃᐧᔨᐦᐟ.

[17] ᒋᑫᒫ ᐅᑎᐦᒋᐸᔨᐤ ᐃᔨᑯᕽ ᐅᔭᓱᐁᐧᐃᐧᐣ ᑭᑕ ᒫᒋᐸᔨᐠ ᐅ ᐋᐧᐢᑳᐦᐃᑲᓂᕽ ᑭᓭᒪᓂᑐ; ᑭᐢᐱᐣ ᒫᑲ ᑭᔮᓇᐤ ᓂᑳᐣ, ᑖᓂᓯ ᑫ ᐃᓯ ᐊᔮᒋᐠ ᑭᓯᐸᓄᕽ ᐊᓂᑭ ᐁᑳ ᑳ ᓇᓇᐦᐃᐦᑕᐦᑭᐠ ᐅ ᒥᔮᐧᒋᒧᐃᐧᐣ ᑭᓭᒪᓂᑐ?

[18] ᑭᐢᐱᐣ ᒥᓇ ᐅᑲᐧᔭᐢᑭᑖᑎᓯᐤ ᐊᑳᐋᐧᐨ ᐱᒫᒋᐦᐅ, ᑖᓂᑕ ᐃᐧᔭ ᑫ ᓄᑯᓯᐟ ᐁᑳ ᑳ ᐊᔭᒥᐦᐋᐋᐧᑎᓯᐟ ᒥᓇ ᑳ ᒪᒋᐱᒫᑎᓯᐟ?

[19] ᐁᑯᓯ ᒫᑲ ᐊᓂᑭ ᑳ ᑯᑕᑭᑖᒋᐠ ᐁ ᐃᑌᔨᑕᕽ ᑭᓭᒪᓂᑐ ᑭᔮᑦ ᑭᑕ ᐸᑭᑎᓇᒪᐁᐧᐊᐧᐠ ᐅᐟ ᐊᐦᒑᑯᐋᐧᐊᐧ ᒥᔪᑐᑕᒧᐃᐧᓂᕽ ᐊᓂᐦᐃ ᑳ ᑖᐯᐧᔨ ᐅᓯᐃᐁᐧᐊᐧ.