[1] āsay mīna Jesus kī‑māci-kiskinohamākēw sisonē sākahikanihk Galileehk. osām ē‑mihcētiwiht Jesus kī‑pōsiw ōsihk ēkota ē‑apit. ayisiyiniwak kī‑wāsakāmēkāpawiwak ēsa.
[2] mihcēt kīkway kī‑kiskinohamawēw ē‑aspahākēmot ēkwa ōmisi itēw ēsa,
[3] “pēhtamok! pēyak nāpēw kī‑nitawi-kistikēw.
[4] ēkwa kī‑siswēwēpinēw kistikāna otaskīhk, ātiht anihi kiscikānisa kī‑pahkisiniyiwa mēskanāsihk, ēkwa ēsa piyēsīsa mēstinēyiwa ē‑mowāyit.
[5] ātiht kiscikānisak kī‑pahkisinwak asinīskāhk ita ēkāya mistahi ē‑asiskīwiyik, ēkwa sākikiwak ēsa sēmāk.
[6] ispīhk ē‑kisāstēk kī‑kīsisowak, ayisk namwāc itāmihk isi wacēpikiwak, ēkosi kī‑pāsowak.
[7] ātiht kī‑pahkisinwak ita okāminakasiyak ē‑ohpikicik, namōya kī‑kīsi-ohpikiwak osām ē‑kakēpiskākocik okāminakasiya.
[8] māka ātiht kiscikānisak kī‑pahkisinwak ita ē‑miywāsiniyik askiy ēkwa aniki kiscikānisak kī‑miyopikiwak kwayask ē‑mīnisiwicik; ātiht nistomitanaw tahtwāw ē‑mīnisiwicik, ātiht nikotwāsikomitanaw ēkwa kotakak mitātahtomitanaw.”
[9] ēkwa Jesus itēw ēsa, “awiyak pēhtawici, piko kwayask kita-natohtam.”
[10] mēkwāc Jesus ē‑pēyakwapit, ātiht aniki kā‑kī-pēhtākot asici nīsosāp okiskinohamawākana pē‑nātik ē‑kakwēcimikot tānisi anihi otaspahākēmowina ē‑itwēmakaniyiki.
[11] ōmisi itēw ēsa, “kimiyikowisināwāw kita-nisitohtamēk kisē-manitow otipēyihcikēwin, māka aniki wayawītimihk kā‑ayācik piko kita-aspahākēmohk,
[12] ēkosi kiyām āta kwayask nanātawāpitwāwi, namwāc kita-wāpahtamwak ēkwa āta kwayask natohtahkwāwi, namwāc kita-nisitohtamwak. kīspin kaskihtātwāwi kita-nātāmototawēwak kisē-manitowa, ēkosi kita-kāsīnamākwak.”
[13] ēkwa Jesus itēw ēsa, “tānisi kita-kī-isi-nisitohtamēk kotaka nitaspahākēmowina, kīspin namōya kinisitohtēnāwāw ōma?
[14] ana nāpēw kā‑kistikēt, kistikān ana opīkiskwēwin kisē-manitow.
[15] tāpiskōc kistikānak kā‑pahkisihkik mēskanāsihk, ātiht ayisiyiniwak mayaw opīkiskwēwiniyiw kisē-manitowa ē‑pēhtahkik, sēmāk macāyis pē‑wā-wanāhtāw anima pīkiskwēwin.
[16] tāpiskōc kistikānak kā‑pahkisihkik asinīskāhk, kotakak ayisiyiniwak, mayaw ē‑pēhtahkik pīkiskwēwin, sēmāk miywēyihtamwak, miyo-otinamwak,
[17] māka namwāc pīhciyawēskākwak, mācika namōya kinwēs pimitisahamwak kisē-manitowa opikīskwēwiniyiw opimātisiwiniwāhk, aciyaw piko tāpwēhtamwak. ispīhk ēkāya kwayask ē‑tōtāhcik, ahpō āyimisiwin ē‑nakiskahkik kisē-manitow opīkiskwēwin ohci, ēkosi pōmēwak.
[18] kotakak ayisiyiniwak tāpiskōc aniki kistikānak kā‑pahkisihkik okāminakasīskāhk. pēhtamwak pīkiskwēwin
[19] māka otamihikwak kīkwaya ōta askīhk, miywēyihtamwak wēyōtisiwina, ēkwa akāwātamwak kotaka kīkwaya; ēwakoni ōhi kīkwaya kā‑ohci-pīkonahkik kisē-manitow opīkiskwēwin, ēkosi namōya āpacihtāwak ta‑miyo-pimātisicik.
[20] māka kotakak ayisiyiniwak tāpiskōc aniki kistikānak kā‑pahkisihkik ita ē‑miywāsik askiy. pēhtamwak opīkiskwēwin kisē-manitow ēkwa otinamwak. ēwakonik ōki ēkwa tāpiskōc kistikāna kwayask ē‑mīnisiwicik; ātiht nistomitanaw tāhtwāw, ātiht nikotwāsikomitanaw ēkwa kotakak mitātahtomitanaw.”
[21] ēkwa Jesus ōmisi itēw, “wīhkāc cī awiyak astāw wāsaskotēnikan sīpā wīhkopīwatihk ahpō sīpā nipēwinihk ispīhci tahkohc mīcisowināhtikohk?
[22] kīkway nānitaw ē‑kātāhk ohcitaw piko kita-mōsisēstāhk, ēkwa kīkway ē‑akwanahikātēk piyisk kita-pāskihtēnikātēw.
[23] awiyak pēhtawici, piko kwayask kita-natohtam.”
[24] itēw ēsa, “natohtamok anima kā‑pēhtamēk! kā‑isi-wiyasiwātāyēkok kotakak ayisiyiniwak, pēyakwan ēkosi kika-isi-wiyasiwātikowāw kisē-manitow, māka nawac ayiwāk kika-wiyasiwātikowāw.
[25] awiyak kīkway kā‑ayāt, ayiwāk kita-miyāw, māka ana ēkāya mistahi kīkway kā‑ayāt, kita-otinamwān anima apisīs kā‑ayāt.”
[26] Jesus ōmisi ati-itwēw, “kisē-manitow otipēyihcikēwin ōmisi itēyihtākwan. pēyak nāpēw ēsa kistikēw kistikāna ē‑siswēwēpināt otaskīhk.
[27] mēkwāc ē‑nipāt tipiskāyiki, ēkwa ē‑papāmahkamikisit kīsikāyiki, ati-sākikiyiwa okistikāna, māka namōya kiskēyihtam tānisi kā‑ohci-sākikiyit.
[28] askiy ohpikihcikēmakan, nistam nīpīs sākikin, ēkota ohci sākiskwēmakan, ēkwa ēwako ati-mīnisiwiw.
[29] ispīhk ana kistikān ē‑atisot ēkota ēkwa maniswāw, ayisk otihcipayiw kita-pawahikēhk.
[30] “tānisi māka ka‑kī-isi-kiskinohamahk kisē-manitow otipēyihcikēwin?” itēw ēsa Jesus. “kīkway ka‑ohci-aspahākēmoyahk?
[31] ōmisi itēyihtākwan, pēyak nāpēw kistikēw ē‑māwaci-apisci-minakisiyit kiscikānisa.
[32] ispīhk ē‑ohpikit ēwako māwaci-misikitiw iyikohk tahto kistikānak ē‑misi‑watihkwaniwit. ēkota piyēsīsak ē‑wacistonihkēcik ākawāstēhk.”
[33] Jesus kī‑ātotam mihcēt aspahākēmowina kita-ohci-kiskinohamawāt ayisiyiniwa, iyikohk kita-kī-tēpi-nisitohtamiyit.
[34] kī‑kiskinohamawēw ayisiyiniwa ē‑aspahākēmot piko. māka okiskinohamawākana mwēstas ē‑pēyakocik māna kī‑nisitohtamōhēw ē‑itwēmakaniyiki.
[35] ēwako kīsikāw ē‑ati-otākosik ōmisi itēw Jesus, “mahti āsōkāmēcimētān akāmihk isi.”
[36] ēkota nakatēwak ayisiyiniwa. okiskinohāmawākana pōsiyiwa ōsihk ita wiya ē‑kwayāci-pōsit ēkwa ati-wīcēwēwak ēsa. ayisiyiniwa ē‑pōsiyit kotaka ōsa mīna ati-wīcēwikwak.
[37] kētahtawē kā‑māci-misi-yōtihk ēkwa ati-pīhtipēw ōma otōsiwāw wiya ē‑mamahkāskāyik.
[38] Jesus ēsa nipāw otāhk ē‑aspiskwēsimot aspapiwin ēkwa koskonēwak ēsa ē‑itācik, “okiskinohamākēw, waniskā! ē‑wī-misiwanātisiyahk ōma, ēkāya cī nānitaw ē‑itēyihtaman?”
[39] ē‑pēkopayit Jesus kī‑kisīkitotēw yōtinwa ēkwa itēw sākahikana, “pēyāhtik!” ēkosi sēmāk ayiwāstin, ēkwa mīna nipiy pōni-mamahkāskāw.
[40] ēkwa ōmisi itēw, “tānēhki ōma kā‑sēkisiyēk? kēyāpic cī ēkāya ē‑tāpwēhtamowiniyēk?”
[41] ē‑wawāni-sēkisicik, mitoni kī‑māmaskātamwak ēkwa ititowak, “kīko ayisiyiniw awa, yōtinwa mīna sākahikan kā‑nā-natohtākot?”