[1] kī‑nīso-kīsikāki kita-otihcipayiw miyāskākēwi-wīhkohtowin ēkwa kā‑mowiht ēkāya kā‑ohpihkasot pahkwēsikan. okihci-ayamihēwiyiniwak ēkwa kā‑kiskinohamākēcik wiyasiwēwin kī‑wī-kakwē-otinēwak kīmōc Jesusa nānitaw isi ēkwa kita-nipahācik.
[2] itwēwak ēsa, “namōya kika-kī-otinānaw mēkwā-otamahkamikahki, nānitaw isi kita-māyahkamikisiwak ayisiyiniwak.”
[3] ē‑mēkwā-kiyokēt Jesus Bethanyihk, wīkiyihk kā‑kī-wasakayāspinēyit Simona, ē‑ay-apit mīcisowināhtikohk, iskwēwa kā‑pē-pīhtikwēyit asinīwi-mōcēyāpiskosihk tōminikan ē‑tahkonamiyit ē‑wīhkimākwaniyik mīna ē‑āhkwakihtēyik, ēwako kā‑pīkohtitāt, ēkwa sīkinam anima tōminikan Jesusa ostikwāniyihk.
[4] māka ēkota ayāwak ātiht ēkāya ē‑miywēyihtahkik, ēkwa ē‑pā-pīkiskwātitocik, “tānēhki ōma konita kā‑mēstinahk ōma tōminikan?
[5] ka‑kī-atāwākāniwiw nistwāw mitātahtomitanaw sōniyās ohci, ēkwa ana sōniyās tāh‑kī-miyāwak kā‑kitimākisicik!” kī‑kisīkitotēwak ēsa anihi iskwēwa.
[6] Jesus kitahamawēw ēsa ē‑itāt, “pōnihkawihk! tānēhki ōma kā‑mikoskācimāyēk? mitoni ana ē‑miyo-tōtawit.
[7] kākikē kita-ihtakowak okitimākisiwak, ēkwa piko ispīhk kika-kī-wīcihāwāwak, māka niya namōya kākikē kika-wīcētināwāw.
[8] ē‑isi-kaskihtāt wī‑kakwē-tōtam; kī‑sīkinam tōminikan niyawihk kita-kwayācihtāt niyaw nahinikawiyāni.
[9] kikēhcināmitināwāw, piko itē ātotamihki ōma miywācimowin misiwēskamik, ōma otōtamowin kita-ātocikātēyiw ē‑kiskisitotāht ohci.”
[10] ēkwa Judas Iscariot, ēwako pēyak nīsosāp kiskinohamawākanak, kī‑itohtēw kihci-ayamihēwiyiniwa ē‑itasowēt ta‑misihāt Jesusa.
[11] cīhkēyihtamiyiwa ēsa anima kā‑itasowēt, ēkwa tēpēyimoyiwa kita-tipahamākot. ēkosi kī‑asawāpahtam Judas ita kita-wēhcipayiniyik kita-otināyit Jesusa.
[12] anima nistam kīsikāw kā‑mowiht ēkāya kā‑ohpihkasot pahkwēsikan mīna kā‑minahocik māyacihkosa kita-mowācik miyāskākēwi-wīhkohkēwinihk, okiskinohamawākana ōmisi itik Jesus, “tānitē kita-nitawi-wiyastamātāhk miyāskākēwi-wīhkohkēwin?”
[13] ēkosi sipwēhtisahwēw nīso okiskinohamawākana ē‑itāt, “nitawi-itohtēk kihci-ōtēnāhk, ēkwa pēyak nāpēw kika-nakiskākowāw ē‑tahkonahk nipiy tipahōpānihk. pimitisahohk.
[14] ēkwa ispīhk ita pīhtikwēci, ōmisi kika-itāwāw ana kā‑tipēyihtahk wāskāhikan, ‘ōmisi itwēw okiskinohamākēw, “tānima piskihcikamik ita kā‑wī-mīcisoyāhk niya mīna nikiskinohamawākanak miyāskākēwi-wīhkohkēwin?”’
[15] kika-wāpahtihikowāw ispimihk ē‑miywascikātēk piskihcikamik ē‑misi-tawāk, ē‑kwayātastēk ēkwa ēkota kika-wiyascikānāwāw kiyānaw ohci.”
[16] ēkwa ēsa okiskinohamawākana itohtēyiwa kihci-ōtēnāhk. ēkotē miskamwak anima kā‑wīhtamākocik; ēkwa ati-wiyascikēwak kita-wīhkohtocik.
[17] ēkwa ē‑otākosik kī‑tako-wīcēwēw nīsosāp okiskinohamawākana ēkota.
[18] ēkwa ē‑mēkwā-mīcisocik, Jesus itēw, “kikēhcināmitināwāw, pēyak awiyak nika-misihik, ōta mēkwāc niwīci-mīcisōmik.”
[19] okiskinohamawākana kī‑pakwātamiyiwa ēkwa māci-kakwēcimik ēsa mā‑mēskoc ē‑itwēyit, “namōya ētikwē niya kā‑isiyan?”
[20] Jesus itēw, “kiyawāw nīsosāp ohci ē‑ihtasiyēk, pēyak ana kā‑wīci-akohcimāt opahkwēsikanima wiyākanisihk pēyakwan ispihk niya.
[21] ayisiyinīwikosisān kita-nipiw, kā‑itastēk kihci-masinahikanihk; māka ka‑pāstāhow ana kā‑misihāt ayisiyinīwikosisāna! nawac ka‑miyopayiw wiya ohci ēkāya kī‑nihtāwikit ēwako nāpēw.”
[22] ē‑mēkwā-mīcisocik, Jesus kī‑otinēw pahkwēsikana, ē‑kī-nanāskomot kī‑pahkwēnēw, ē‑miyāt okiskinohamawākana itēw, “otinihk awa; ēwako niyaw.”
[23] ēkwa kī‑otinam minihkwākan, ē‑kī-nanāskomāt kisē-manitowa, kī‑miyēw ēkwa kahkiyaw kī‑minihkwēwak ēkota ohci.
[24] Jesus itēw, “ēwako ōma nimihkom kā‑sīkinikātēk mihcēt ohci, ē‑kīsastāhk kisē-manitow owīci-isīhcikēmitowin.
[25] kikēhcināmitināwāw, namōya kīhtwām nika-minihkwān ōma sōmināpoy iyikohk otihcipayiki anima kīsikāw kā‑minihkwēyān oski-sōmināpoy kisē-manitow otipēyihcikēwinihk.”
[26] ēkwa ēsa kī‑nikamowak ayamihēwi-nikamon ēkwa itāwahitowak Olives ispatināhk.
[27] Jesus itēw, “kahkiyaw kika-tapasīnāwāw ēkwa kika-nakasināwāw, ayisk kihci-masinahikanihk itastēw, ‘manitow kita-nipahēw okanawimāyatihkwēwa, ēkwa māyatihkwak kita-siswēyāmowak.’
[28] māka kī‑āpisisiniyāni, nika-nīkāni-takohtān Galileehk.”
[29] Peter ōmisi itēw, “namōya wīhkāc kika-nakatitin, kiyām āta kahkiyaw kotakak nakatiskwāwi.”
[30] Jesus itēw Petera, “kikēhcināmitin, anohc kā‑tipiskāk, pāmwayēs nāpē-pāhpahāhkwān nīswāw kitoci, nistwāw kika-ānwēhtēn ē‑kiskēyimiyan.”
[31] Peter nawac sōhki naskomēw, “namōya wīhkāc ēkosi nika-itwān, kiyām āta nīsta nipahikawiyāni.” ēkwa kahkiyaw kotakak kiskinohamawākanak wīstawāw ēkosi itwēwak.
[32] kī‑takohtēwak anita Gethsemane kā‑itamihk ēkwa Jesus itēw okiskinohamawākana, “pitamā ōta apik, ē‑wī-ayamihāyān.”
[33] kī‑wīsāmēw Petera ēkwa Jamesa ēkwa Johna. kī‑māci-pīkwēyihtam ēkwa kī‑kakwātakēyimow.
[34] ēkwa ōmisi itēw, “nipīkotēhān mihtātamowin ohci ēkwa nikwāyaki-wīsakiskākon. ōta kisātamok ēkwa asawāpik.”
[35] wāhyawēsīs kī‑itohtēw ēkotē ē‑kawipayihot ēkwa ē‑ayamihāt kīspin ta‑kī-ispayiniyik, namōya katāc kita-kī-kakwātakihtāt, māka ta‑miyāskākot.
[36] “hāw, nohtā,” itwēw, “kahkiyaw kīkway kikaskihtān, īkatēnamawin ōma kakwātakihtāwin; namōya niya kā‑isi-nitawēyihtamān, māka kiya ē‑isi-nitawēyihtaman kita-wī-tōcikātēw.”
[37] ēkwa ēsa wāyinīw, awīna ōhi kī‑nipāyiwa okiskinohamawākana. ēkwa ōmisi itēw Petera, “Simon, kinipān cī? ēkāya cī ē‑kaskihtāyan kanakē pēyak tipahikan ēkāya kita-nipāyan?
[38] asawāpik ēkwa ayamihāk ēkāya kita-sākōcihikoyēk kotēyimikowin. tāpwē kwayask kinōhtē-tōtēnāwāw, māka namōya kisōhkisināwāw kita-kaskihtāyēk,” itēw ēsa.
[39] ēkwa āsay mīna ohpimē ati-itohtēw, pēyakwan ē‑isi-ayamihāt.
[40] ēkwa ē‑pē-wāyinīt, awīna ōhi okiskinohamawākana kī‑na-nipāyiwa, kī‑sākōtihkwasiwak ēsa. ēkosi namwāc nānitaw kī‑itēwak Jesusa.
[41] ispīhk nistwāw ē‑pē-wāyinīt, ōmisi itēw, “kēyāpic cī ōma ē‑nipāyēk mīna ē‑āstēsiniyēk? ēkosi ēkwa! āsay otihcipayiw ayisiyinīwikosisān ē‑wī-āsōmēkihk macātisa ka‑otinikot.
[42] waniskāk ēkwa itohtētāk, awīta nāpēw kā‑misihit.”
[43] Jesus ē‑mēkwā-pīkiskwēt, Judas, ēwako pēyak nīsosāp kiskinohamawākanak, kā‑takohtēt. ēkwa pē‑wīcēwēw mihcēt ayisiyiniwa ē‑tahkonamiyit isawēskwa ēkwa pakamākana, ē‑pē-itisahokocik kihci-ayamihēwiyiniwa ēkwa kā‑kiskinohamākēyit wiyasiwēwin, ēkwa onīkānīwa.
[44] ana kā‑misihkēmot āsay ē‑kī-wīhtamawāt anihi ayisiyiniwa ē‑kī-itāt, “ana nāpēw ocēmaki, ēwako ana kā‑nitawēyimāyēk. otināhkēk ēkwa sipwētahāhkēk ēkwa kwayask āyihci-kanawēyimāhkēk.”
[45] mayaw kā‑takohtēt Judas kī‑nātēw Jesusa ēkwa itēw, “okiskinohamākēw!” ēkwa ocēmēw ēsa.
[46] ēkosi sēmāk otinēwak ēsa Jesusa ēkwa ē‑mamāhcikonācik.
[47] māka pēyak ēkota ē‑nīpawit, kī‑otihtinam osawēsk ēkwa kī‑kīskataham wihtawakāyiw nāpēwa kā‑atoskawāyit omāwaci-kihci-ayamihēwiyiniwa.
[48] ēkwa Jesus ōmisi itēw ayisiyiniwa, “katāc cī kipē-nāsināwāw ē‑tahkonamēk isawēskwa mīna pakamākana, tāpiskōc maci-ayisiyiniw ē‑isi-otiniyēk?
[49] tahto kīsikāw kikī-pē-wīcētināwāw ē‑kiskinohamākēyān kihci-ayamihēwikamikohk, ēkwa namwāc kitohci-otinināwāw. māka piko kita-tipipayik anima kihci-masinahikanihk kā‑kī-kiskiwēhamihk.”
[50] ēkwa ēsa kahkiyaw okiskinohamawākana nakacipahik ē‑tapasīyit.
[51] ēkota pēyak oskinīkiw wīcihiwēw nayēstaw ē‑akwanahot wāpiskēkin. ēwakoni ē‑kakwē-otinācik ēsa,
[52] ēkwa ē‑mostāpēkasēpitācik, aspin tapasīyiwa, ē‑nakatahk wāpiskēkin.
[53] ēkwa itohtahēwak Jesusa ita māwaci-kihci-ayamihēwiyiniwa, ēkwa kotaka kihci-ayamihēwiyiniwa ēkwa onīkānīwa ēkwa kā‑kiskinohamākēyit wiyasiwēwin, kahkiyaw ē‑māmawapiyit.
[54] ēkwa ēsa Peter kī‑pimitisahwēw wāhyaw ohci isko pīhcāyihk kā‑tawāyik wayawītimihk owāskāhikaniyihk māwaci-kihci-ayamihēwiyiniwa. ēkota wītapimēw okanawēyihcikēwa, ē‑awasocik kotawānihk.
[55] kihci-ayamihēwiyiniwak ēkwa kahkiyaw wiyasiwēwiyiniwak kī‑natonawēwak awiya kita-misimāyit Jesusa, tānisi ē‑kī-isi-māyi-tōtamiyit kita-ohci-nipahimiht, māka namōya awiya miskawēwak.
[56] mihcēt ayisk kiyāskīwācimēwak Jesusa, māka namwāc pā‑pēyakwan itācimēwak.
[57] ātiht pasikōwak ēsa ē‑kiyāskicik ē‑itwēcik,
[58] “nipēhtēnān ē‑itwēt ēsa, ‘nika-misiwanācihtān ōma kihci-ayamihēwikamik ayisiyiniwak kā‑kī-osīhtācik, ēkwa nisto kīsikāw kī‑ispayiki nika-osīhtān kotak, namōya wiya ayisiyiniwak otisīhcikēwiniwāw.’”
[59] māka ēsa pāh‑pītos itācimēwak.
[60] ēkwa ana māwaci-kihci-ayamihēwiyiniw ē‑ohtiskawikāpawīstawāt, itēw Jesusa, “ēkāya cī ē‑wī-naskwēwasimacik ōki nāpēwak kā‑misimiskik?”
[61] māka wiya Jesus namōya nānitaw itwēw. āsay mīna māwaci-kihci-ayamihēwiyiniw kakwēcimēw, “kiya cī nawasōnākan, okosisa ana kā‑sawēyihtākosit?”
[62] ēkwa Jesus itēw ēsa, “ēwako niya; kika-wāpamāwāw ayisiyinīwikosisān ē‑apit okihciniskēyihk kā‑māwaci-sōhkātisiyit, waskōhk ē‑pē-takosihk.”
[63] ēkosi ēsa māwaci-kihci-ayamihēwiyiniw yāyikipitam oskotākay, ōmisi ē‑itwēt, “namōya katāc ayiwāk kotakak kita-tēpwātāyahkik kita-misimācik ōhi.
[64] kipēhtawāwāw ē‑pāstāmot. tānisi kiyawāw ē‑itēyihtamēk?” ēkwa ēsa kahkiyaw atāmēyimēwak ē‑itwēcik kita-nipahimiht.
[65] ēkwa ātiht kī‑māci-sihkwātēwak, ēkwa kī‑pasakwāhpitēwak, ē‑pasīhkwētahwācik, ē‑itācik, “mahti ēkwa kiskiwēhikē! awīna ē‑pakamahosk?” ēkwa okanawēyihcikēwak otinēwak ē‑pā-pakamahwācik pēskis.
[66] Peter wiya kēyāpic kī‑ayāw ē‑tawāyik wayawītimihk wāskāhikanihk, kētahtawē kā‑pē-itohtēt iskwēw kā‑atoskawāt māwaci-kihci-ayamihēwiyiniwa,
[67] ēkwa ispīhk ē‑pisiskāpamāt Petera ē‑awasoyit, kisiwāk ē‑kitāpamāt itēw, “kīsta ōma owīcēwākana Jesus, Nazarethihk kā‑ohcīt.”
[68] māka ānwēhtawēw ē‑itāt, “namōya nikiskēyihtēn kīkwāy anima kā‑itaman.” ēkosi ati-itohtēw sāpohtēskanāhk, ēkota mwēhci kā‑kitoyit nāpē-pāhpahāhkwāna.
[69] ana atoskēyākan-iskwēw ē‑wāpamāt Petera itēw kīhtwām anihi kā‑nīpawiyit ēkota, “ēkwa awa mīna pēyak!”
[70] māka Peter kīhtwām kī‑ānwēhtawēw. mwēscasēs aniki ēkota kā‑nīpawicik itēwak, “nikēhcināhonān ē‑tāpwēyāhk, kiya ōma pēyak, ayisk Galileehk kiya ohci.”
[71] ēkwa Peter itēw, “nikihci-itwān ē‑tāpwēyān, ahpō kisē-manitow nika-wī-kakwātakihik! namōya nikiskēyimāw ana nāpēw kā‑āyimōmāyēk!”
[72] ēkota ēkwa nīswāw kā‑kitot nāpē-pāhpahāhkwān, ēkwa Peter ēsa kā‑kiskisopayit Jesusa kā‑kī-itikot, “pāmwayēs nāpē-pāhpahāhkwān nīswāw kitoci, nistwāw kika-itwān ēkāya ē‑kiskēyimiyan.” mistahi pakwātam ēkosi kā‑mātot ēsa.