[1] አንተ ግን ለሕይወት ትምህርት የሚገባውን ተናገር።
[2] ሽማግሌዎችም ከዝሙት የነጹ፥ የነቁና ብልሆች ይሆኑ ዘንድ፥ በሃይማኖት እንዳይጠራጠሩ፥ እንዲፋቀሩና አስተውለው እንዲታገሡ ተናገር።
[3] ባልቴቶችም እንዲሁ በጠባያቸው የተቀደሱ፥ የማያሙና ለመጠጥ የማይገዙ ይሁኑ፤ በጎ የሆነውንም ትምህርት ራሳቸውን ያነጹ ዘንድ ለሴቶች ያስተምሩ።
[4] ወጣቶች ሴቶችንም ባሎቻቸውንና ልጆቻቸውን እንዲወዱ ያስተምሩ፤
[5] በእነርሱ ምክንያት አንድ ሰው እንኳን የእግዚአብሔርን ቃል እንዳይነቅፍ ራሳቸውን የሚገዙ ንጹሖች እንዲሆኑ፥ በጎውን እንዲሠሩ፥ ጠባያቸውንና የቤታቸውን ሥርዐት እንዲያሳምሩ፥ ለባሎቻቸውም እንዲታዘዙ ይምከሩአቸው።
[6] ጎበዞቹንም ሰውነታቸውን እንዲጠብቁ ብልሆችም እንዲሆኑ ምከራቸው።
[7] በበጎ ምግባርም ለሁሉ አርአያና ምሳሌ ሁናቸው።
[8] የሚቃወም ሰው በእኛ ላይ የሚናገረውን መጥፎ ነገር ሲያጣ እንዲያፍር አነጋገርህና ትምህርትህ አንድ ሰው እንኳ በማይንቀው፥ ነውር በሌለበትና ሥርዐት ባለው አነጋገር በንጹሕ ይሁን።
[9] አገልጋዮችም ለጌቶቻቸው ይታዘዙ፤ በሁሉም ደስ ያሰኙአቸው፤ በሁሉም አይጨቃጨቁ።
[10] አይስረቁ፤ ነገር ግን መድኀኒታችን እግዚአብሔር ያስተማረውን ትምህርት በቦታው ሁሉ ያመሰግኑ ዘንድ በንጹሕ ሥራቸው እምነታቸውን ይግለጡ።
[11] የሚያድነው የእግዚአብሔር ጸጋ በሰው ሁሉ ዘንድ ታውቆአልና።
[12] እርስዋም ከኀጢአትና ከዓለም ፍትወት እንለይ ዘንድ፥ በዚህ ዓለምም በጽድቅ፥ በንጽሕናና በፍቅር እንኖር ዘንድ ታስተምረናለች።
[13] የተመሰገነውን ተስፋ የታላቁን የአምላካችንን የመድኀኒታችን የኢየሱስ ክርስቶስን ክብር መገለጥ እየጠበቅን፥
[14] ከኀጢአት ይቤዠን ዘንድ፥ በበጎ ምግባር የሚፎካከር አዲስ ሕዝብንም ለእርሱ ይመርጥ ዘንድ ስለ እኛ ራሱን አሳልፎ የሰጠ። 2፥9።
[15] ለሁሉ ራስህን ዝቅ እያደረግህ ይህን ለሁሉ ምከርና አስተምር፤ ገሥጽም፤ የሚያስትህም አይኑር።