[1] ከእኔ ከቀሲስ የተላከች መልእክት፥ በእውነት ለምወደው ለወንድማችን ለጋይዮስ ትድረስ፤
[2] ወንድሜ ሆይ፥ መንገድህ ትቃናልህ ዘንድ፥ ሰውነትህንም ደስ በሚያሰኛት ትኖር ዘንድ፥ እኔ ስለ ሁሉ እጸልይልሃለሁ።
[3] ወንድሞቻችን መጥተው አንተ በእውነት እንደምትሄድ ስለ ፍቅርህ በመሰከሩ ጊዜ፥ እጅግ ደስ አለኝ።
[4] ልጆቼ በእውነት ሲሄዱ ከመስማት ይልቅ ከዚች የምትበልጥ ደስታ የለችኝም።
[5] ወንድሜ ሆይ፥ ምንም እንኳ እንግዶች ቢሆኑ፥ ለወንድሞች በምታደርገው ሁሉ የታመነ ሥራ ትሠራለህ።
[6] እነርሱም በቤተ ክርስቲያን ፊት ስለ ፍቅርህ መስክረዋል፤ ለእግዚአብሔር እንደሚገባ አድርገህ በጕuዞአቸው ብትረዳ መልካም ታደርጋለህ።
[7] ከአሕዛብም አንዳች ሳይቀበሉ ስለ ስሙ ወጥተዋልና፤
[8] ወንድሞቻችን ሆይ፥ እኛም በእውነት የጽድቅ ተሳታፊዎች እንሆን ዘንድ እንደ እነዚህ ያሉትን ልንቀበላቸው ይገባናል።
[9] ለቤተ ክርስቲያን አስቀድሜ ጻፍሁ፤ ነገር ግን በእነርሱ ላይ የበላይ ሊሆን የሚወድ ዲዮጥራጢስ አይቀበለንም።
[10] ስለዚህም እኔ በመጣሁ ጊዜ የሚሠራውን ሥራ አሳስባለሁ፤ በእኛ ላይም የሚናገረው ክፉ ቃል አልበቃው ብሎ ወንድሞቻችንን አንቀበል እስከ ማለት ደርሶአልና፤ ሊቀበሉአቸው የሚወዱትንም ይከለክላቸዋል፤ ዳግመኛም ከቤተ ክርስቲያን ያወጣቸዋል።
[11] ወንድሜ ሆይ፥ በጎ አድራጊ እንጂ ክፉ አድራጊ አትሁን፤ በጎ የሚያደርግ ከእግዚአብሔር ነውና፤ ክፉን የሚያደርግ ግን እግዚአብሔርን አያየውም።
[12] ስለ ድሜጥሮስም ሁሉ ይመሰክሩለታል፤ እውነት ራስዋም ትመሰክርለታለች፤ እኛም መስክረንለታል፤ ምስክርነታችንም እውነት እንደ ሆነች ታውቃላችሁ።
[13] የምጽፍልህ ብዙ ነበረኝ፥ ነገር ግን በጥቁር ቀለምና በብርዕ ልጽፍልህ አልወደድሁም።
[14] ነገር ግን በቶሎ እንደማይህና ቃል በቃል እንደማነጋግርህ ተስፋ አደርጋለሁ።
[15] ሰላም ለአንተ ይሁን፤ ወንድሞቻችንም ሰላም ይሉሃል፤ ወንድሞቻችንንም በየስማቸው ሰላም በል። ሦስተኛዪቱ የሐዋርያው የቅዱስ ዮሐንስ መልእክት ተፈጸመች። ለእግዚአብሔር ምስጋና ይሁን። አሜን።