[1] ከእኔ ከቀሲስ፥ በእውነት ለምወዳቸውና እኔ ብቻ ሳልሆን እውነትን የሚያውቁ ሁሉ ደግሞ ለሚወዱአቸው ለተመረጠች እመቤትና ለልጆችዋ፤
[2] በእኛ ዘንድ ስለ ነበረች፥ አብራን ስላለችው፥ ወደ ፊትም ለዘለዓለም ከእኛ ጋር ስለምትኖረው ስለዚች እውነት።
[3] ጸጋ፥ ምሕረትና ሰላም ከእግዚአብሔር አብ፥ ከእግዚአብሔር አብ ልጅ ከኢየሱስ ክርስቶስም በእውነትና በፍቅር ከእናንተ ጋር ይሁን።
[4] እጅግ ደስ አለኝ፤ ትእዛዙን ከአብ እንደ ተቀበልን ከልጆችሽ በእውነት የሚሄዱ አግኝቼአለሁና።
[5] አሁንም እመቤት ሆይ፤ እርስ በርሳችን እንዋደድ ዘንድ እለምንሻለሁ፤ ይህች ከመጀመሪያ በእኛ ዘንድ የነበረች ትእዛዝ ናት እንጂ አዲስ ትእዛዝን የምጽፍልሽ አይደለም።
[6] ፍቅራችንም ይህች ናት፤ በእግዚአብሔርም ትእዛዝ እንሄድ ዘንድ ፍቅራችን ይህቺ ናት፤ ቀድሞ በሰማችኋትም በዚያችው ትሄዱ ዘንድ ትእዛዙ ይህቺ ናት።
[7] ኢየሱስ ክርስቶስ በሥጋ እንደ መጣ የማያምኑ ብዙዎች አሳቾች ወደ ዓለም መጥተዋልና፤ ይህም አሳቹ ሐሳዊ መሲሕ ነው።
[8] ፍጹም ዋጋ እንድታገኙ እንጂ የሠራችሁበትን እንዳታጡ ራሳችሁን ዕወቁ።
[9] የሚጠራጠር፥ በክርስቶስም ትምህርት የማይኖር ሁሉ እግዚአብሔር ከእርሱ ጋር የለም፤ በክርስቶስ ትምህርት የሚኖር ግን በአብና በወልድ አለ።
[10] ወደ እናንተ የሚመጣውን፥ ይህንም ትምህርት የማያመጣውን ወደ ቤታችሁ አታስገቡት፤ ሰላምም እንኳ አትበሉት።
[11] ሰላም የሚለው በክፉ ሥራዉ ይተባበረዋልና።
[12] የምጽፍላችሁ ብዙ ነበረኝ፤ ነገር ግን በክርታስና በጥቁር ቀለም ልጽፍላችሁ አልፈቀድሁም፤ ደስታችሁ ፍጹም ይሆን ዘንድ ወደ እናንተ እንደምመጣና ቃል በቃልም እንደማነጋግራችሁ ተስፋ አደርጋለሁና።
[13] የተመረጠችው የእኅትሽ ልጆች ሰላም ይሉሻል፥ ጸጋና ፍቅር ከእናንተ ጋር ይኑር። አሜን። ሁለተኛዪቱ የሐዋርያው የቅዱስ ዮሐንስ መልእክት ተፈጸመች። ለእግዚአብሔር ምስጋና ይሁን። አሜን።