[1] ወንድሞቻችን ሆይ፥ ስለ ዘመኑና ስለ ወራቱ፥ ስለ ቀኑም፥ ልንጽፍላችሁ አያስፈልጋችሁም፤
[2] የጌታችን ቀን ሌባ በሌሊት እንደሚመጣ እንዲሁ ትመጣ ዘንድ እናንተ ራሳችሁ በርግጥ ታውቃላችሁና።
[3] ሰላምና ደኅንነት ነው ሲሉ ያንጊዜ ምጥ የፀነሰችን ሴት እንደሚይዛት፥ ጥፋት በድንገት ይመጣባቸዋል፤ ማምለጥም አይቻላቸውም፤
[4] እናንተ ግን ወድሞቻችን ሆይ፥ ቀኑ እንደ ሌባ ይደርስባችሁ ዘንድ በጨለማ ውስጥ አይደላችሁም።
[5] ሁላችሁም የብርሃን ልጆች፥ የቀንም ልጆች ናችሁና፤ እኛ ከሌሊት፥ ወይም ከጨለማ አይደለንም።
[6] እንግዲህ እንንቃ፤ እንትጋ፤ እንወቅም እንጂ እንደ እነዚያ አናንቀላፋ።
[7] የሚያንቀላፉ በሌሊት ያንቀላፋሉና፤ የሚሰክሩም በሌሊት ይሰክራሉና።
[8] እኛ ግን የቀን ልጆች ስለሆን እንንቃ፤ የሃይማኖትንና የፍቅርን ጥሩር እንልበስ፤ ተስፋ ያለበት የመዳንን ራስ ቐርም እንቀዳጅ።
[9] እግዚአብሔር በጌታችን በኢየሱስ ክርስቶስ ለሕይወትና ለደኅንነት እንጂ፥ ለጥፋት አላደረገንምና።
[10] የምንነቃ፥ ወይም የምናንቀላፋ ብንሆን፥ ሁላችን ከእርሱ ጋር በሕይወት እንኖር ዘንድ፥ ስለ እኛ ቤዛ ሆኖ ሞተ።
[11] አሁንም ስለዚህ እናንተ እንደምታደርጉ ወንድሞቻችሁን አጽናኑ። አንዱም አንዱም ወንድሙን ያንጸው።
[12] ወድሞቻችን ሆይ፥ በመካከላችሁ የሚደክሙትን፥ በጌታችን የሚቆሙላችሁንና የሚአስተምሩአችሁንም ዕወቌቸው ብለን እንማልዳችኋለን።
[13] እጅግ አክብሩአቸው፤ ስለ ሥራቸውም ውደዱአቸው፤ እርስ በርሳችሁም በሰላም ሁኑ።
[14] ወንድሞቻችን እንማልዳችኋለን፤ ያለ ሥርዐት የሚሄዱትንም ገሥጹአቸው፤ ያዘኑትንም አረጋጉአቸው፤ የደከሙትን አጽኑአቸው፤ ሁሉንም ታገሡ።
[15] በክፉ ፋንታ ክፉ እንዳታደርጉ ተጠንቀቁ፤ ነገር ግን ዘወትር እርስ በርሳችሁ ለሌላው መልካም ነገርን ትሠሩ ዘንድ ተሽቀዳደሙ።
[16] ሁልጊዜ ደስ ይበላችሁ።
[17] ያለማቌረጥም ጸልዩ።
[18] ስለ ሥራው ሁሉ እግዚአብሔርን አመስግኑት፤ ስለ እናንተ የእግዚአብሔር ፈቃዱ በኢየሱስ ክርስቶስ ይህ ነውና።
[19] መንፈስን አታጥፉ።
[20] ትንቢትንም አትናቁ።
[21] ሁሉን መርምሩ፤ መልካም የሆነውንም ያዙ።
[22] ከክፉ ሥራ ሁሉ ራቁ።
[23] የሰላም አምላክ እግዚአብሔር ፈጽሞ ይቀድሳችሁ፤ ነፍሳችሁን፥ መንፈሳችሁንና ሥጋችሁንም ጌታችን ኢየሱስ ክርስቶስ በሚመጣበት ጊዜ በንጽሕና ይጠብቅ።
[24] የጠራችሁ እርሱም ይህን ያደርግላችሁ ዘንድ የታመነ ነው።
[25] ወንድሞቻችን ሆይ፥ ጸልዩልን።
[26] በተቀደሰ ሰላምታም ወንድሞቻችንን ሁሉ ሰላም በሉ፤ እርስ በእርሳችሁም ሰላም ተባባሉ።
[27] ይህችን መልእክት ለቅዱሳን ወንድሞቻችን ሁሉ ታነቡአት ዘንድ በጌታችን አምላችኋለሁ።
[28] የጌታችን የኢየሱስ ክርስቶስ ጸጋ ከእናንተ ጋር ይሁን፤ አሜን። ወደ ተሰሎንቄ ሰዎች የተላከ መጀመሪያይዉ መልእክት ተፈጸመ፤ በአቴና ተጻፈ፤ በጢሞቴዎስና በስልዋኖስ እጅም ተላከ። ለእግዚአብሔር ምስጋና ይሁን። አሜን።