[1] ክርስቶስ ስለ እኛ በሥጋው ከተሰቀለ፥ እናንተም ይህቺን ዐሳብ ጋሻ አድርጋችሁ ኑሩ፤ በሥጋዉ መከራ የተቀበለ ከኀጢአት ድኖአልና።
[2] ከእንግዲህ ወዲህ በሥጋው ከሕይወቱ ዘመን የቀረውን፥ በሰው ፈቃድ ሳይሆን በእግዚአብሔር ፈቃድ እንዲፈጽም ነው እንጂ።
[3] የአሕዛብን ፈቃድ ፥ ዝሙትንና ምኟትን፥ ስካርንና ወድቆ ማደርን፥ ያለ ልክ መጠጣትንና ጣዖት ማምለክን ያደረጋችሁበት ያለፈው ዘመን ይበቃችኋልና።
[4] እንግዲህ ወደዚህ ሥራ እንዳትሮጡ ዕወቁ፤ ከዚች ጎዳናና መጠን ከሌለው ከዚያ ሥራም ተለዩ፤ እነሆ፥ ከእነርሱም መካከል ሰዎች ስለ እናንተ ያደንቃሉ፤ በዚያም በቀድሞው ሥራ ሳትተባበሩአቸው ሲያዩአችሁ ይሰድቡአችኋል።
[5] እነርሱም በሕያዋንና በሙታን ይፈርድ ዘንድ ተዘጋጅቶ ላለው መልስ ይሰጣሉ።
[6] ስለዚህም በሥጋቸው በሰው ሕግ እንዲቀጡ፥ በነፍሳቸውም በእግዚአብሔር ሕግ እንዲድኑ ለሙታን ወንጌልን ሰበኩላቸው።
[7] የሁሉ ፍጻሜው ቀርቦአልና ልባችሁን አንጹ፤ ለጸሎትም ትጉ።
[8] ከሁሉ አስቀድሞ በፍጹም ልቡናችሁ እርስ በርሳችሁ ተዋደዱ፤ ፍቅር ኀጢአትን ሁሉ ይሸፍናልና።
[9] ሳታንጐራጕuሩ እርስ በርሳችሁ እንግዳ መቀበልን ውደዱ።
[10] ሁላችሁም በየራሳችሁ ከእግዚአብሔር የተሰጣችሁን ዕድል እንደ ተቀበላችሁ መጠን እንደ ደግ መጋቢ አገልግሉ፤ ለእያንዳንዱ ከእግዚአብሔር ስጦታው እየራሱ ነውና።
[11] የሚያስተምርም፥ እንደ እግዚአብሔር ቃል ያስተምር፥ የሚያገለግልም እግዚአብሔር በሚሰጠው ኀይል ያገልግል፤ ክብርና ኀይል እስከ ዘለዓለም ድረስ ገንዘቡ በሚሆን በኢየሱስ ክርስቶስ እግዚአብሔር በሁሉ ነገር ይመሰገን ዘንድ።
[12] ወዳጆች ሆይ፥ በእናንተ መካከል እንደ እሳት ሊፈትናችሁ ስለሚሆነው መከራ፥ ድንቅ ነገር እንደመጣባችሁ አትደነቁ።
[13] ነገር ግን በጌትነቱ በተገለጠ ጊዜ ደግሞ ደስ ብሎአችሁ ኀሤት እንድታደርጉ ክርስቶስን በመከራ ትመስሉት ዘንድ ደስ ይበላችሁ።
[14] ስለ ክርስቶስ ስም ብትነቀፉ ብፁዓን ናችሁ፤ የእግዚአብሔር የኀይሉና የክብሩ መንፈስ በእናንተ ያርፋልና።
[15] ከእናንተ መካከል እንደ ነፍሰ ገዳይ፤ ወይም እንደ ሌባ፥ ወይም እንደ ክፉ አድራጊ፥ ወይም በሌሎች ጉዳይ እንደሚገባ ሆኖ መከራ የሚቀበል አይኑር።
[16] የክርስቲያን ወገን እንደ መሆኑ መከራን ቢቀበል ግን ስለዚህ ስም እግዚአብሔርን ያመስግን እንጂ አይፈር።
[17] በእግዚአብሔር ቤተ ሰቦች ፍርድ የሚጀመርበት ጊዜ ደርሶአልና፤ መጀመሩ ከእኛ ወገን ከሆነ ግን ለእግዚአብሔር ወንጌል ለማይታዘዙ ሰዎች ፍጻሜአቸው ምን ይሆን?
[18] ጻድቅ በጭንቅ የሚድን ከሆነ ኀጢአተኛና ዐመፀኛ በየት ይገለጥ ዘንድ አለው?
[19] እንደ እግዚአብሔር ፈቃድ መከራን የሚቀበሉ ሰዎችም መልካም ሥራ በመሥራት ለታመነ ፈጣሪ ነፍሳቸውን አደራ ይስጡ።