[1] Laki mga belag kangay piyagmaal, anda in kadowai kangay solat sa kanyo. Tanan kangay solat kangay beet pabeteken in kanyo remrem.
[2] In kangay beet kamo baatte agremrem sa mga siyabi tangona in maal wano pag mga poropita, osai in otos kantam Kapwan osai Agpamaboway, in piyatoldo sa kanyo in mga katiwala siyogo sa kanyo.
[3] In kailangan kanyo tokaw atawanan, ngona sa kalobosan pag mga ibeng kamo batay piyaglibak osai piyagpatawaan in mga mangyan agogali in marames pag mga piyagkabeet kansiro bilog.
[4] Siro batay keyen, Sa nakay in Kiristo in mangako keyen siyo batay rateng? Baina, idapo kay anggan ngona. In kantam mga koyay mangatay wa, kamay sogod piyangwat in kobat in boote kataw daan, idapo agiyalis.
[5] Siro dayo manremrem keyen in Diyos in agpangwat tangona daan naw in langit osai in kobat sa kabaloyan kansiyo agiplaong. In kobat piyangwat batang sapa, sa kagwaraan sapa.
[6] Sa sapa din, sa bongkalos lakoy tangona, siida in boote sa tokaw pag kobat.
[7] Sa kabaloyan din in agiplaong Diyos in ngona pag langit osai kobat baywi kay kansiyo piyagalapet anggan sa Ibeng batay Agparosa. Asin pag Ibeng siro batay piyagtebed, osai batay piyagparosa in mga agpamangwat daet.
[8] Laki mga belag kangay piyagmaal, kamo ayaw alibangawan anda. Sa Kapwan in osai ka ibeng kagwali osai ka libo ka dagon, in osai ka libo ka dagon kagwali osai waget ka ibeng.
[9] Idbatay piyalimbang in Kapwan in kansiyo piyangako, kataw in piyagremrem in kalaati mangyan. Dayem siyo agpanaya sa kanyo, angkataw siyo dayo apo maidapo. In kansiyo beet in boo mangyan agbenglay in kansiro mga daet.
[10] Kamay in batay rateng in Ibeng in Kapwan kataw in agrateng in agpanakaw. Asin pag Ibeng in langit toloy batay mapasaw apo lakoy agaleng makapangirabot. Batay matebed in ibeng, bolan, kadayo mga magirem. Kadayo in kobat osai in boo sa kobat batay masonog wa gayed.
[11] -
[12] Kataw kataw ina in batay mibaloy dogayan sa kalobosan, na anggan kitam agpanaya kay sa Ibeng Diyos, kailangan kitam pasakop wa gayed sa kansiyo, agpamangwat in kansiyo beet. Ayaw aglimbang kitam agpanawen matang idwa dogay rateng ina pag Ibeng. In langit batay matebed, in boote batay matonaw sa kaibengen asin pag Ibeng.
[13] Kamay kitam agpanaya sa pangako Diyos in bayo wakay pag langit, bayo wakay pag kobat in piyagbalayan in boo betek.
[14] Na ngani, mga belag kangay piyagmaal, anggan kitam agpanaya kay sa batay mibaloy, kantam piliten agogali in maal, idapo daet, matang apyaan sa adap Diyos.
[15] Remremen kaya in kantam Kapwan yewed kay agparosa matang kitam piyakan kay kabetek matang pabowayen. Ina daan in siyabi kantam belag Pablo kantam piyagmaal in siyo agsolat sa kanyo, piyagalapet in katawanan tiyaboy Diyos sa kansiyo.
[16] Sa boo kansiyo mga solat ina daan in baatte kansiyo piyagsabi. Apo din mga siyabi sa kansiyo mga solat maidap atawanan in beet siyabi, kalbas yewed betek in paliwanag in mga yewed katawan osai in mga yewed marigen in paniwala. Kataw daan din ina in kansiro piyagpangwat sa kalaati kay pag mga Agisolat, na siro batay piyagparosa.
[17] Ngona mga belag kangay piyagmaal, kanyo wa atawanan in mga batay mibaloy, na kailangan kamo agingat karam kamo piyabaribid in mga mangyan agpamangwat daet, karam kamo malabo sa kanyo marigen pag pagiskapetan.
[18] Pagpilitanen kamo agistobo sa kanyo atawanan sa agpakayawte in Diyos osai sa kanyo atawanan kay IsoKiristo kantam Kapwan osai Agpamaboway. Siyo pakalakonawen ngona anggan idapo kalobosan. Ina wa ngani.