[1] Ako Simon Pidro, in sogowan osai katiwala IsoKiristo, in agsolat sa kanyo sa mga kataw daan kami piyakan paniwala batang kay IsoKiristo kantam Diyos osai Agpamaboway, panawen sa kansiyo maal pag remrem.
[2] Kamo pakayawteen wano gayed in Diyos, osai pakapyaen gayed in remrem panawen kamo katawan sa kansiyo osai kay Isos, kantam Kapwan.
[3] Panawen sa kansiyo kabaloyan kitam piyakan Diyos in boo kantam piyagkailangan matang kitam kabaloy agogali in maal sa Diyos. Ina panawen sa kitam katawan kay Isos in omidang sa kantam matang piyakan bagiyan in kansiyo kalakoyen osai kansiyo kaalenen.
[4] Kataw ina kansiyo wa tiyaboy sa kantam in kansiyo lakonaw osai makaamag pag mga piyangako matang kitam kapanlili sa daet pag mga panawen atai pag kobat panawen sa mga daet pag piyagkabeet in bilog kadogay kitam apo bagiyan sa kalakoyen Diyos.
[5] Panawen ina kantam pilitanen padagdagen sa kantam paniwala in agpangwat maal, sa agpangwat maal padagdagen in katawanan,
[6] sa katawanan padagdagen in agsakop sa kantam remrem, sa agsakop sa kantam remrem padagdagen in agbanta, sa agbanta padagdagen in betek pag mga panawen,
[7] sa betek pag panawen padagdagen in agpabelag, sa agpabelag padagdagen in agpakayawte.
[8] Angkataw no ina boo kantam piyagogali, kantam piyagpaistobo, na batay ngani apo kabolowan, apo pakinabang in kitam katawan kay IsoKiristo kantam Kapwan.
[9] No siyo idapo ina pag mga ogali, na siyo yewed kangitan sa adayonaw, beleg wa in kansiyo remrem, siyo idwa katawan keyen in kansiyo mga daet liibangaw wa Diyos.
[10] Na, laki mga belag, kantam pakaeyaten in agalapet asin pag mga ogali, matang kantam ngani atawanan in kitam iidang Diyos kansiyo biyerya. No kataw ngani ina, na kitam idbatay mibaribid.
[11] Na kitam batay ngani piyabelag sa idapo kalobosan pag sakopan IsoKiristo kantam Kapwan Agpamaboway.
[12] Kamayba kanyo wa atawanan ina pag boo, osai marigen wa in kanyo paniwala sa betek in piyatoldo wa sa kanyo, kamayba kataw ina, ina baatte kangay batay piyagsabi wakay.
[13] In kangay remrem anggan ako agkaboway kay, in maal ina kangay piyagawitawit sa kanyo,
[14] angkataw kangay wa atawanan ako idbatay wa dogay atai pag boway. Ina in siyabi sa kangay in kantam Kapwan IsoKiristo.
[15] Na kangay batay piyagpangwat in boo kangay abaloyan matang kamayba ako matay wa, ina kanyo kay din piyagremrem.
[16] In kami agbarita sa kanyo panawen sa kabaloyan IsoKiristo in kantam Kapwan, in siyo lomwas wakay, ina yewed batang waget sa mga panggisoden piyangwat mangyan. Dayem kanyam wa gayed ngiitan in kansiyo kalakoyen,
[17] in siyo piyakamaal in Diyos Amang osai piyakalakonaw. Apo agiplaong batang sa Diyos lakoy keyen, Ina in kangay piyagpakayawte pag Bodang, in kangay piyagkaanggayan.
[18] Kanyam arengeyan ina pag agiplaongan batang sa langit in kami kansiyo piyaanggat ista sa boksor iidang Diyos.
[19] Matang labi kay kami agpakarigen agpaniwala sa siyabi in mga poropita. In maal kamo din agalapet asin pag siyabi, angkataw ina kagwali tinglaw agrawa sa lened anggan maboka wa in Ibeng in Kapwan, in tagorabas agrawa sa kantam remrem.
[20] Labi kay sa boo, kailangan kantam atawanan no sa kantam waget kabaloyan na idapo batay kabaloy agpaliwanag kamayba sa nakay pag siyabi in mga poropita sa mga Agisolat.
[21] Angkataw in siyabi in mga poropita yewed agrakay sa remrem mangyan. No yewed in mga agsolat piyagpatoldo in Betek pag Abyan, matang in galem kansiro siyabi batang sa Diyos.