[1] Tangona apo sa mga kasokponan Israil mga agbosli pag mga poropita. Kalbas sa kanyo din apo batay mibaloy agbosli pag mga agpatoldo. Siro batay agpadaya in siro agpatoldo in mga yewed betek, mga makasida sa kanyo paniwala. Siro batay agpaawak sa Kapwan in agpaboway sa kansiro, na kagwali siro wa daan in agayay parosa toloy rateng.
[2] Aronaw in batay aakayan sa kansiro daeten pag mga ogali, kalbas panawen ina in amat wakay din batay agpaidapo kabolowan sa betek pag piyagpatoldo.
[3] Ina pag mga agpatoldo solangan matang sa kansiro bosliyen pag panggisoden kamo kansiro batay piyadaya matang abel kanyo sangkap. Dogay wa sandata in kansiro batay parosa. Yewed agesek in Diyos in batay agbono sa kansiro.
[4] Kamayba in mga angil in agpangwat daet, in kansiro daet yewed liibangaw in Diyos. Siro kansiyo piyangaw sa lened sa toyongan matang ista agpanaya sa Ibeng batay Agparosa.
[5] Kadayo in daeten pag mga mangyan tangona sa kabetek Nowi, yewed din kansiyo liibangaw in kansiro mga daet, no yewed in boo kobat biyongkalos. Idapo piyaboway no yewed Nowi waget in agpatoldo panawen sa maalno pag ogali. Siro in boo talnaki walo in piyaboway.
[6] Kadayo din in bayan Sodoma osai Gomora piyarosa Diyos panawen sa kansiro mga daet. Siro tiyebed anggan mibaloy boris matang alimbawa sa mga agpamangwat daet no nakay in batay mibaloy sa kansiro.
[7] Kamay Lot kansiyo piyaboway angkataw siyo maal pag mangyan. Maloba wa agkaidapan in kansiyo remrem sa makarikoy pag mga piyagpangwat ina pag daeten pag mga mangyan.
[8] Ibengibeng in siyo agpamataw asin sa kansiro in remrem ina pag betek pag mangyan maidap wano panawen asin pag mga daet kansiyo piyagparengey osai piyagngitan.
[9] Na no kataw ina in mibaloy tangona asin pag mga agpamangwat daet, na kantam atawanan in Kapwan apo ngani padalan agpaboway sa mga betek sa kansiyo no siro piyagpaidapan. Osai siyo apo din padalan agparosa sa mga daeten, in siro piyagdamay kay anggan sa Ibeng batay Agparosa gayed.
[10] Ina in batay ngani mibaloy labi kay sa mga agpamangwat in daet pag mga piyagkabeet kansiro bilog, osai dayo maniwala sa Diyos. Ina pag agbosli pag mga agpatoldo, siro idapo rikoy osai agpalalo, siro agpangaas agsabi daet sa mga taga langit.
[11] Kamay in mga angil siro maeyat kay sa mga agbosli osai apo kabaloyan, kamay in siro agpaadap sa Kapwan siro yewed agpanlibak asin pag mga agbosli.
[12] Idapo bait ina pag mga mangyan, kagwali mga ayop layas kaya biyodang matang kabelen, bonowen. Kadayo in mga yewed kansiro atawanan piyagsabiyan daet, na kataw in mga ayop layas siro batay din piyagbono.
[13] Siro agpaidap sa mga roma, na in bayad siro batay din piyagpaidapan. Siro agkasadapan agpangwat in mga makarikoy kamayba ibeng, matang mibaloy in mga daet pag piyagkabeet kansiro bilog. Kalbas siro agpalanglang kay sa kanyo anggan siro agkasadapan agpadaya sa kanyo.
[14] Siro idapo piyagpamangkit no yewed palagi waget agbabai, idbatay siyawaan agpangwat daet. Siro agpaakay agpangwat daet sa mga masasa in remrem. Siro biyasa wano agpangagaw. Panawen asin pag boo siro siyompa wa Diyos.
[15] Siro pabaribid wa sa betek pag dalan, malibangaw wa, kansiro giisod in dalan Balaam in kay Bosor bodang, agpangwat daet angkataw agkabeet sa bayad.
[16] Kamay Balaam siyabiyan in kansiyo asno. Kamayba ina yewed katawan agiplaong, ina miplaong kataw mangyan matang Balaam piyaempet sa kansiyo idapo bait pag panawen.
[17] Ina pag mga agbosli pag agpatoldo kagwali malbeng maikat wa, kataw libo maboksi piyagbaba waget kowaya. In Diyos apo wa siyandata pangawan sa kansiro sa galem wa gayed lened.
[18] Agpakabwat in kansiro agiplaong, kamay idapo kabolowan in piyagsabi. Kansiro piyagpaen in mga daet pag piyagkabeet in bayo kay pasoway sa mga agogali daet, matang siro moli wakay sa daet.
[19] Kansiro mga yaakay kansiro piyangakowan keyen, Kamo idbatay wa siyakop kamayba nakay, bago siro sakop daan sa mga daet pag ogali. Angkataw in mangyan sakop kamayba sa nakay in mandaeg sa kansiyo.
[20] In mga mangyan agpasandig wa kay IsoKiristo kantam Kapwan osai Agpamaboway, na siro kabaliwan wa sa mga daet atai sa kobat. Kamay no siro beet wakay sa tangona kansiro pag mga daet, kalbas siro diyaeg wa asin, na in batay parosa sa kansiro maloba wano gayed.
[21] In maal kay nges in siro idwa katawan in betek pag dalan. Kamay siro katawan in betek pag dalan, kalbas mipaoli wakay, paawak wa sa maal wano pag otos tiyaboy Diyos sa kansiro.
[22] Na panawen sa kansiro, agibetek ngani in piyagsabi keyen, Kiyoman wakay in tito in kansiyo wa siyoka. Kadayo in osai ka piyagsabi keyen, In beyek kamayba piyaligo agoli wakay daan sa lebleban.