[1] Anuanom, asɛm a ɛtwa toɔ ne sɛ, mommɔ mpaeɛ mma yɛn sɛdeɛ ɛbɛyɔ a Awurade asɛm bɛkɔ so atrɛ ntɛm sɛdeɛ ɛyɔɔ wɔ mo mu no.
[2] Afei, mommɔ mpaeɛ mma yɛn sɛdeɛ ɛbɛyɔ a Onyankopɔn bɛyi yɛn afiri abɔnefoɔ ne nsɛmmɔnedifoɔ nsam. Ɛfiri sɛ, ɛnyɛ nnipa nyinaa na wɔgye asɛm no di.
[3] Nanso, Awurade yɛ ɔnokwafoɔ. Ɔbɛhyɛ mo den na wagye mo afiri ɔbɔnefoɔ no nsam.
[4] Awurade ama yɛn mo mu anidasoɔ. Yɛwɔ anidasoɔ sɛ moreyɛ na mobɛkɔ so ayɛ biribiara a yɛbɛkyerɛ mo sɛ monyɛ no.
[5] Awurade nka mo ho na monnya ɔdɔ koma sɛ Onyankopɔn ne abodwokyerɛ sɛ Kristo.
[6] Anuanom, yɛhyɛ mo wɔ Awurade Yesu Kristo din mu sɛ, montwe mo ho mfiri anuanom a wɔdi aniha na wɔnni mmara a yɛahyɛ ama wɔn no so no ho.
[7] Mo ankasa monim pefee sɛ ɛsɛ sɛ moyɔ deɛ yɛyɔeɛ no bi pɛpɛɛpɛ. Berɛ a na yɛwɔ mo nkyɛn no, yɛanyɛ aniha.
[8] Obi ammoa yɛn a yɛantua onii no ka. Yɛyɔɔ adwuma dendeenden. Awia ne anadwo nyinaa yɛyɔɔ adwuma sɛdeɛ yɛremfa sikasɛm biara nha mo adwene.
[9] Yei nkyerɛ sɛ na yɛnni ho kwan sɛ yɛbisa mo biribi de boa yɛn asetena. Yɛyɛɛ saa de yɛɛ nhwɛsoɔ maa mo.
[10] Yɛwɔ mo nkyɛn no, yɛka kyerɛɛ mo sɛ, “Obiara a ɔmpɛ sɛ ɔyɔ adwuma no, ɛnsɛ sɛ wɔma ɔdidi.”
[11] Yɛka saa asɛm yi, ɛfiri sɛ, yɛte sɛ mo mu bi yɛ anihafoɔ a wɔnyɛ hwee sɛ wɔnenam nkurɔfoɔ nnwuma ase.
[12] Yɛde Awurade Yesu Kristo din hyɛ wɔn, bɔ wɔn kɔkɔ sɛ, wɔmmɔ bra pa na wɔnyɔ adwuma mfa mmɔ wɔn ho akɔnhoma.
[13] Anuanom monnnyae papayɛ da.
[14] Obi wɔ hɔ a ɔrentie nwoma a matwerɛ abrɛ mo yi mu nsɛm. Sɛ mohunu obi saa a, monhwɛ no yie na montwe mo ho mfiri ne ho na nʼanim ngu ase.
[15] Nanso, mommfa saa onipa no sɛ ɔyɛ ɔtamfoɔ na mmom, mommɔ no kɔkɔ sɛ mo nua.
[16] Na ɔno asomdwoeɛ Awurade no ara mma mo asomdwoeɛ daa adeɛ nyinaa mu. Awurade ne mo nyinaa ntena.
[17] Me ara me Paulo, me nsa ano atwerɛ a menam so rekyea mo ni. Saa kwan yi ara so na mefa twerɛ nwoma.
[18] Yɛn Awurade Yesu Kristo adom nka mo nyinaa.