[1] Paꞌessebanun meꞌ aꞌa masandel pu si Isa Almasi maluꞌuhin weꞌ subey siye maglillaꞌ si meꞌ magbayaꞌin duk si meꞌ sinduwe taga kapatutin duk subey tuhutde pangandaꞌakanden. Duk subey siye patabang ine-ine hāp hinang gubelnohin.
[2] Toloꞌanun siye gaꞌi dinaꞌak missā-missāhan sine-sine. Subey siye gaꞌi magsasaꞌ-sasaꞌ saguwaꞌ subey siye magay. Subey addatande kēmon aꞌahin.
[3] Peggeꞌ kite bi isab matuꞌuhin awam kite bi duk gaꞌi kite bi nuhut toloꞌ. Luwal kite bi kaꞌakkalan. Luwal kite bi nuhut kabayaꞌanten bi hāp-laꞌat. Laꞌat hadja dem ateyten bi duk luwal kite bi ngajidjil saweꞌten bi. Kabunsihan kite bi weꞌ meꞌ aꞌahin duk bunsi isab kite bi si siye.
[4] Saguwaꞌ pinakitehan weꞌ Tuhan manimbul kitehin bi weꞌ malasa duk maꞌaseꞌ iye si meꞌ manusiyaꞌin.
[5] Tinimbul kite bi weꞌ ne dumaꞌin peggeꞌ maghinang hāp kite bi saguwaꞌ peggeꞌ maꞌaseꞌ iye si kite bi. Kuweꞌ bantuk kinosoꞌan weꞌ ne lege dem ateyten bi duk inurungan ne kite bi umul baꞌahu weꞌ Niyawa Sutsihin duk inanakan ne kite bi balik.
[6] Ekka kahāpan pinangurung si kite bi peggeꞌ pinapitu weꞌ Tuhanin Niyawa Sutsihin sabab Isa Almasi manimbul kitehin bi.
[7] Peggeꞌ malasa duk maꞌaseꞌ Tuhanin si kite bi hangkan inampun duk hināp kite bi weꞌ ne duk hangkan tepe si kite bi du umul salama-lama inase-aseten bi.
[8] Bennal teꞌed pinaꞌinku inin. Kabayaꞌankun weꞌ matuyuꞌ kew magtoloꞌ si meꞌ aꞌahin weꞌ subey teꞌed tuhutde toloꞌku dem sulat inin supaya sasuku sandel si Tuhanin luwal hadja kinabayaꞌanden maghinang hāp. Kēmon inin hāp duk niyaꞌ kagunahanne si kēmon meꞌ aꞌahin.
[9] Saguwaꞌ halliꞌanun meꞌ aꞌa magjawab gaꞌ niyaꞌ kagunahanne duk bang niyaꞌ magsuwi-suwi sabab meꞌ ēn kapapuꞌande meꞌ pangkat-mamangkatin, duk daꞌa kew matuk bang niyaꞌ magsasaꞌ sabab saraꞌ si Musa ley. Kēmon miyaꞌan gaꞌ du niyaꞌ kagunahanne.
[10] Bang niyaꞌ saweꞌbi magpaꞌil meꞌ masandel pu si Isa Almasihin, pagesun iye mintedde atawa minduwe. Ubus bang gaꞌi iye ngasip daꞌa ne iye hinangun ine.
[11] Kataꞌuhannu du weꞌ aꞌa sa miyaꞌan libuwad duk dusehan. Duk sabab dusenen kataꞌuhan weꞌ salaꞌ iye.
[12] Sōng daꞌakku piyu si kaꞌu, Titus, sine-sine siye si Artemas ke atawa si Tikikus. Bang tekka iye luꞌu si kaꞌu geꞌesanun teꞌed pī si puweblo Nikopolis duk kite magkasuwaꞌ laꞌi. Mabayaꞌ ku patennaꞌ laꞌi bang baytu haggut.
[13] Tabanganun Apollos duk si Senas, abugawin bang palaꞌus ne siye lumengngan. Urunganun siye ine-ine kulang si siye.
[14] Toloꞌanun meꞌ saweꞌten bi maluꞌu masandel pu si Isa Almasihin weꞌ subey siye matuyuꞌ maghinang hāp duk subey siye nabang si meꞌ aꞌa kakulanganin. Sa miyaꞌan niyaꞌ kagunahan hinanganden.
[15] Kēmon saweꞌku matuꞌuhin maboꞌo bissā weꞌ essebde kew. Akahanun isab kēmon mamalasa si kamihin, peggeꞌ saliꞌ kite bi sandel pu si Isa Almasi, weꞌ esseb kami siye. Karayaw luwal kaꞌam ipat Tuhanin. Wassalam