[1] Saguwaꞌ kaꞌu, Titus, pagtoloꞌnun subey magsaliꞌ duk toloꞌ mabennalin.
[2] Toloꞌanun meꞌ lella mabahiꞌin weꞌ subey gaꞌi ūtande napsuden duk subey pahāpde addatden duk subey hāp isab pikilanden. Subey siye sandel teꞌed pu si Isa. Subey kalasahande pagkasiden duk subey siye masandal teꞌed.
[3] Sa miyaꞌan isab panoloꞌun si meꞌ dende mabahiꞌin. Subey hāp addatden supaya kasulutan Tuhanin si siye. Subey siye gaꞌi ngalimutan saweꞌde duk gaꞌi maginuman. Meꞌ panoloꞌden subey hāp.
[4] Manjari katoloꞌande meꞌ dende mabataꞌin supaya kalasahande meꞌ elladen duk meꞌ anakden
[5] duk supaya hāp pikilanden duk petten siye duk maꞌaseꞌ siye si saweꞌde. Subey siye matuyuꞌ maghinang diyalem lumaꞌ duk subey tuhutde kinabayaꞌan elladen. Bang sa miyaꞌan addat meꞌ dende mabataꞌin gaꞌi diyawaꞌan meꞌ aꞌahin lapal Tuhanin.
[6] Damikkiyan toloꞌanun isab meꞌ lella mabataꞌin weꞌ subey hāp pikilanden.
[7] Kaꞌu Titus, subey hāp manamal kawul-piꞌilnun duk batukan meꞌ saweꞌnun addatnun. Duk bang kew magtoloꞌ subey bentel hadja pagtoloꞌnun duk subey magtewwaꞌ boꞌohannun duk lapal Tuhan pamanoloꞌnun.
[8] Bissānun subey hāp hadja supaya gaꞌi diyawaꞌan meꞌ aꞌahin pagtoloꞌnun, duk supaya isab iyaꞌ meꞌ kuntaraten bi peggeꞌ gaꞌ du niyaꞌ jān pangandiyawaꞌande kite bi.
[9] Toloꞌanun meꞌ banyagaꞌin weꞌ subey siye nuhut kēmon pangandaꞌakan amuden duk subey sulutde amuden. Subey siye gaꞌi ngajampa amuden.
[10] Subey gaꞌi tangkewande amuden saguwaꞌ subey pakitehande weꞌ kapangandelan teꞌed siye duk aꞌa bentel siye supaya kahāpan meꞌ aꞌahin si panoloꞌten bi sabab Tuhan manimbul kitehin bi.
[11] Manjari, pinakitehan weꞌ Tuhanin si meꞌ manusiyaꞌin weꞌ malasa duk maꞌaseꞌ iye si siye. Duk sabab lasanen duk aseꞌnen tatimbul meꞌ manusiyaꞌin kēmon.
[12] Amban lasane duk aseꞌne miyaꞌan toloꞌan Tuhanin kite bi weꞌ subey gaꞌi ūtante bi napsuten bi duk subey lebbahante bi kēmon manggaꞌi makaboꞌo kite bi tudju Tuhanin. Subey hāp teꞌed pikilanten bi duk subey kite bi meꞌ aꞌa bentel. Subey isab kite bi nuhut kēmon pangandaꞌakan Tuhanin tiggelante bi tuꞌu si dunya
[13] sasangte bi ngagadan ellew pagkēg-kēgan inase-aseten bi bang pitu ne balik Tuhan Mabalakatanin, iye Isa Almasi manimbul kitehin bi. Bang pitu iye takitete bi sahayanen.
[14] Si Isa Almasi maglillaꞌ matey supaya kite bi lekkatne duk paluwasne amban kēmon malaꞌatin. Kabayaꞌannen weꞌ sutsi ateyten bi duk kite bi manjari meꞌ aꞌa sukuꞌ si iyehin duk iye hadja kinabayaꞌanten bi maghinangan hāp.
[15] Iye ne miyaꞌan panoloꞌun si meꞌ aꞌahin duk pagesun siye bang siye maghinang laꞌat peggeꞌ niyaꞌ kapatutnu mages siye duk noloꞌan siye. Gaꞌ niyaꞌ subey ngandiyawaꞌan kaꞌu.