[1] Gaꞌ tiggel puwas miyaꞌan, banes ne teꞌed isab aꞌa patipun pī pu si Isa bu gaꞌ ne niyaꞌ kakande. Manjari ilinganan weꞌ si Isa meꞌ tindegnen pī si iye duk paꞌinne si siye,
[2] “Maꞌaseꞌ ku si meꞌ aꞌa mabanes inin peggeꞌ tellum bahangi ne kuweꞌitu patuꞌude si akuhin bu gaꞌ ne niyaꞌ kakande.
[3] Bang siye papoleꞌku gaꞌ bakas mangan, kinawugtuꞌ siye iyan si lān. Bu meꞌ sinduwe inin tala pamoleꞌanden.”
[4] Paꞌin meꞌ tindegnen si iye, “Na, antag kite ngeddoꞌ kinakan pamakan siye tuꞌu si lahat makagindew-gindew inin?”
[5] Manjari tilew si Isa siye, “Piyek kayuꞌ panbi lu?” Paꞌinde, “Pituꞌ.”
[6] Manjari dinaꞌak weꞌ ne meꞌ aꞌa mabanesin ningkoloꞌ diyataꞌ bulak. Ineddoꞌ weꞌ ne pan pituꞌin duk magpasalamat iye si Tuhan. Ubus bu binahagiꞌ-bahagiꞌ weꞌ ne panin duk pinangurung weꞌ ne si meꞌ tindegnen dinaꞌak pinangurung si meꞌ aꞌahin. Duk pinangurung ne weꞌ de.
[7] Niyaꞌ isab kenna dikiꞌ bang piyek kayuꞌ. Pagubus si Isa magpasalamat si Tuhan, dinaꞌak isab weꞌ ne pangurung kennahin si meꞌ aꞌahin.
[8] Mangan siye kēmon duk esso siye. Ubus bu tinipun weꞌ de lukasin, pituꞌ bakaꞌ pennoꞌ.
[9] Niyaꞌ kulang-labi ampat ngibu meꞌ aꞌa mamanganin.
[10] Manjari pinapoleꞌ ne meꞌ aꞌahin weꞌ si Isa duk magtawus iye pasakey duk meꞌ tindegnen dem bangkaꞌ pī si lahat Dalmanuta.
[11] Pagtekka si Isa duk meꞌ tindegnen si Dalmanuta, hap pī si iye meꞌ Pariseohin moꞌo iye magsuweyan. Batang iye kuhi-kuhide hangkan makapakite siye tandaꞌ bang bennal taga kapatut iye amban Tuhan.
[12] Magnapas pinahadje si Isa duk paꞌinne si siye, “Meꞌ aꞌa kuweꞌitu inin luwal ne hadja māku tandaꞌ. Sabennal akahante kaꞌam, gaꞌ niyaꞌ tandaꞌ pakitehanku si kaꞌam.”
[13] Manjari tahalaꞌ si Isa amban siye. Pasakey iye balik dem bangkaꞌ palipag pī si dambiyaꞌ lamew.
[14] Meꞌ tindeg si Isahin gaꞌ makaꞌesseb moꞌo kinakan. Luwal du dambuwaꞌ pande dem bangkaꞌin.
[15] Manjari sinessaꞌan siye weꞌ si Isa si dalilan. Paꞌinne, “Pahatul-hatul kaꞌam. Halliꞌanun bi pasulig meꞌ Pariseohin duk pasulig Sultan Herodin.”
[16] Magbissā-bissā meꞌ tindegnen sabab pinaꞌinne miyaꞌan peggeꞌ gaꞌ tahātide. Paꞌinde, “Hangkan hatu iye missā kuweꞌ miyaꞌan, peggeꞌ gaꞌ kite bi makaboꞌo pan.”
[17] Kataꞌuhan si Isa bang ine pagbissā-bissāden. Hangkan paꞌinne si siye, “Weꞌey pagbissābin sabab gaꞌ niyaꞌ panbi? Gaꞌi pe ke kataꞌuhanbi atawa tahātibi? Gaꞌi kaꞌam katoloꞌan?
[18] Niyaꞌ matabi saguwaꞌ kuweꞌ gaꞌi kaꞌam makakite. Niyaꞌ tayingebi saguwaꞌ kuweꞌ gaꞌi kaꞌam makakale. Gaꞌ ke taꞌessebbi bakas hininangku ellew īꞌen?
[19] Pamahagiꞌ-mahagiꞌku pan limehin si meꞌ aꞌa lime ngibuhin, piye bakaꞌ pennoꞌ weꞌ lukas tinipunbin?” Paꞌinde, “Sampuk-duwe.”
[20] “Duk gaꞌ ke taꞌessebbi pan pituꞌ binahagiꞌ-bahagiꞌku si meꞌ aꞌa ampat ngibuhin? Piye bakaꞌ pennoꞌ weꞌ lukas tinipunbin?” Paꞌinde, “Pituꞌ.”
[21] “Na,” paꞌinne, “bu gaꞌi pe tahātibi.”
[22] Manjari tekka siye si puweblo Betsaida. Niyaꞌ meꞌ aꞌa pī si iye magboꞌo aꞌa pessek duk pabuyuꞌ-buyuꞌ siye pu si Isa pakiꞌantan si iye.
[23] Manjari inantanan ne weꞌ si Isa tangan aꞌa mapessekin duk tinundan weꞌ ne binoꞌo paluwas amban meꞌ kalumaꞌan miyaꞌan. Paglaꞌi ne siye, pineppaꞌan weꞌ si Isa meꞌ mata aꞌahin duk binettad weꞌ ne meꞌ tangannen si mata aꞌahin. Ubus bu tinilew weꞌ ne aꞌahin, “Niyaꞌ ke takitenu?”
[24] Mayam aꞌahin patongas duk paꞌinne, “Ngite ku meꞌ aꞌa lumengngan-lengngan, saguwaꞌ kuweꞌ siye bantuk kayu.”
[25] Manjari binettad balik weꞌ si Isa meꞌ tangannen si meꞌ mata aꞌahin. Mayam aꞌahin pahantap, manjari kawuliꞌan iye duk pastiꞌ ne pamayamne kēmonin.
[26] Manjari pinapoleꞌ ne iye weꞌ si Isa. Paꞌin si Isa si iye, “Daꞌa ne kew balik pī si kalumaꞌan miyaꞌan.”
[27] Manjari palanjal ne si Isa duk meꞌ tindegnen pī si meꞌ kalumaꞌan mapaliput si puweblo Kesarea Pilipihin. Sasangde si lān, tinilew weꞌ ne meꞌ tindegnen, paꞌinne, “Ine paꞌin meꞌ aꞌahin, sine koꞌ ku?”
[28] Nambung siye, paꞌinde, “Niyaꞌ meꞌ aꞌa magpaꞌin weꞌ kaꞌu koꞌ si Yahiya magpandi-pandi meꞌ aꞌahin ellum balik. Sinduwehin isab magpaꞌin weꞌ Nabi Eliyas koꞌ kew. Duk niyaꞌ pe isab magpaꞌin weꞌ kaꞌu koꞌ dambuwaꞌ meꞌ nabi awwalley.”
[29] “Saguwaꞌ bang kaꞌam,” paꞌin si Isa, “ine paꞌinbi? Sine teꞌ ku?” Nambung si Petros, paꞌinne, “Kaꞌu Almasihin, tapeneꞌ Tuhan magbayaꞌin.”
[30] Manjari sinessaꞌan teꞌed siye weꞌ si Isa weꞌ subey siye gaꞌi magaka-aka bisan pu sine bang sine iye.
[31] Na, nagnaꞌ si Isa magtoloꞌ si meꞌ tindegnen sabab dinen. “Aku inin,” paꞌinne, “Anak Manusiyaꞌin, subey ekka kabinasahan sandalanku duk gaꞌi du ku pinagmasi weꞌ meꞌ kabahiꞌanin duk meꞌ nakuraꞌ meꞌ imamin duk meꞌ guru si saraꞌ āgamahin. Pinapatey du ku iyan duk pagpuwas tellum bahangi, ellum du ku balik.”
[32] Binissā inin weꞌ si Isa pinapastiꞌ, hangkan binoꞌo si Isa weꞌ si Petros patala-tala bu inamāhan iye weꞌ ne bang weꞌey iye missā sa miyaꞌan.
[33] Saguwaꞌ paharap si Isa si meꞌ tindegnen duk pinayaman siye weꞌ ne. Manjari inamāhan weꞌ ne si Petros duk paꞌinne si iye, “Tahalaꞌ kew amban aku, Seyitan. Peggeꞌ pikilannun pikilan amban manusiyaꞌ hadja, dumaꞌin amban Tuhan.”
[34] Manjari ilinganan weꞌ si Isa pī si iye meꞌ aꞌa mabanesin duk meꞌ tindegnen. Paꞌinne si siye, “Bang niyaꞌ aꞌa mabayaꞌ nuhut aku, subey iye tuhutne kinabayaꞌankun, dumaꞌin kinabayaꞌannen. Duk subey isab iye moꞌo olom pamapateyan iyehin, hātinen maglillaꞌ iye nandal kabinasahan duk bisan pe matey. Manjari makajari ne iye nuhut aku.
[35] Peggeꞌ,” paꞌin si Isa, “bang aꞌahin ellegne umulnen, gaꞌ niyaꞌ umulne salama-lama. Saguwaꞌ bang aꞌahin gaꞌi ellegne umulnen duk maglillaꞌ pe iye matey hawal tuyuꞌne manuhut akuhin duk magmahalayak aka-aka mahāpin, na, aꞌa iyan taga umul du salama-lama.
[36] Peggeꞌ aꞌahin, bisan pe tepe si iye kēmon alataꞌ dem dunyahin, gaꞌ du niyaꞌ gunane bang gaꞌi tepe si iye umul salama-lamahin.
[37] Peggeꞌ gaꞌ niyaꞌ alataꞌ si dunya makalekkat iye supaya tepe si iye umul salama-lamahin.
[38] Sine-sine iyaꞌ magpatampal si meꞌ aꞌa weꞌ tindegku iye, duk weꞌ nuhut iye toloꞌkun, - bu meꞌ aꞌa kuweꞌitu inin kaꞌekkahanden dusehan duk gaꞌi nuhut Tuhan, - aku, Anak Manusiyaꞌin, iyaꞌ du ku isab ngilale iye tindegku, bang ku balik pitu magtuhut duk meꞌ malaꞌikat masutsihin liput weꞌ sahaya Samaku Tuhanin.”