[1] Manjari, balik si Isa pī dem langgal. Niyaꞌ laꞌi aꞌa sapik tangannen.
[2] Manjari pinateng-patengan si Isa weꞌ meꞌ Pariseo malaꞌihin bang pakoleꞌne ke aꞌa masapik tanganne miyaꞌan si ellew liꞌi, supaya iye katuntutande.
[3] Paꞌin si Isa si aꞌa masapik tangannen, “Pitu kew nengge tuꞌu.”
[4] Manjari tinilew weꞌ si Isa meꞌ aꞌahin, paꞌinne, “Bang dem saraꞌ, ine mapatut hininang si ellew liꞌihin? Hinangan makahāp atawa hinangan makalaꞌat? Nimbul aꞌa atawa mapatey?” Saguwaꞌ gaꞌ niyaꞌ nambung.
[5] Pinayaman siye weꞌ si Isa paliput. Dukka teꞌed ateynen duk astel iye peggeꞌ gaꞌ niyaꞌ aseꞌde si aꞌa. Manjari paꞌinne si aꞌa masapik tangannen, “Pahintengun tangannun.” Na, pinahinteng weꞌ ne, manjari kawuliꞌan ne tangannen.
[6] Magtawus paluwas meꞌ Pariseohin amban langgal duk pī siye magisun duk meꞌ tindeg Sultan Herodin bang saꞌingge si Isa tapapateyde.
[7] Manjari tahalaꞌ si Isa duk meꞌ tindegnen hap pī si higad lamew Jalil. Banes teꞌed aꞌa paturul si iye, dumaꞌin hadja amban lahat Jalil saguwaꞌ amban lahat Yahudiya isab
[8] duk amban Awrusalam duk amban lahat Idumeya duk amban dambiyaꞌan boheꞌ Jordan duk amban meꞌ kalahatan si bihing puweblo Tiros duk Sidon. Meꞌ aꞌa mabanes teꞌed miyaꞌan pī pu si Isa peggeꞌ bakas takalede sabab meꞌ tahinangnen.
[9] Dinaꞌak weꞌ si Isa meꞌ tindegnen malebbes bangkaꞌ pasakeyanne supaya iye gaꞌi talaray weꞌ meꞌ aꞌa mabanesin.
[10] Peggeꞌ ekka aꞌa kawuliꞌan weꞌ ne, hangkan meꞌ maniyaꞌ sakinen maglaray pī si iye supaya taꞌantande iye.
[11] Duk hangkan-hangkan iye takite weꞌ meꞌ aꞌa pasayedan seyitanin, pahebbaꞌ siye si harapanne duk magkilahap siye, paꞌinde, “Kaꞌu iyan Anak Tuhanin.”
[12] Saguwaꞌ sinessaꞌan teꞌed weꞌ si Isa meꞌ seyitanin gaꞌi dinaꞌak magaka si meꞌ aꞌa bang sine iye.
[13] Manjari pataked si Isa pī si meꞌ kakūdan duk ilinganan weꞌ ne pī si iye meꞌ kinabayaꞌanne manuhut iyehin. Duk pataked siye pī si iye.
[14] Meneꞌ iye sampūꞌ duk duwe amban meꞌ katindegannen duk ēnanne siye meꞌ aꞌa kawakilanin. Paꞌinne si siye, “Kaꞌam meꞌ tapeneꞌkun naweꞌan aku duk daꞌakte kaꞌam iyan lumengngan magmahalayak lapal Tuhanin.
[15] Taga balakat du kaꞌam iyan pagpaluwas meꞌ seyitan.”
[16] Iye inin sampūꞌ duk duwe pineneꞌnen: si Simon, inēnan isab si Petros,
[17] si Yakub duk Yahiya, meꞌ anak Sebede, inēnan isab siye weꞌ ne Boanerges. Hātine miyaꞌan, meꞌ aꞌa kuweꞌ lugung.
[18] Pineneꞌ isab weꞌ ne si Andariyas, si Pilip, si Bartolome, si Mateo, si Tomas, si Yakub anak Alpahin, si Taddeo, si Simon aꞌa pangangatuhin
[19] duk si Judas Iskariyot. Si Judas inin iye mamuddihan si Isahin.
[20] Manjari hap lumaꞌ ne si Isa duk meꞌ tindegnen. Saguwaꞌ magtipun balik pī meꞌ aꞌa mabanesin, hangkan gaꞌi ne disi Isa sumaluꞌ bisan mangan.
[21] Pagtakale weꞌ meꞌ usba si Isahin sabab inin, pī siye ngeddoꞌ iye. Peggeꞌ paꞌin meꞌ aꞌahin weꞌ magkaꞌat ne pikilan si Isahin.
[22] Niyaꞌ meꞌ guru si saraꞌ āgama, meꞌ mapadurul amban Awrusalamin missā, paꞌinde, “Si Isa iyan pasayedan weꞌ Belsebul, nakuraꞌ meꞌ seyitanin, hangkan iye kapagpaluwas meꞌ seyitan.”
[23] Manjari ilinganan meꞌ aꞌa miyaꞌan weꞌ si Isa duk magdalilan iye si siye. Paꞌinne, “Na, saꞌingge seyitanin maluwas seyitan? Kuweꞌ du iye maluwas dine. Gaꞌi makajari.
[24] Bang saꞌupama niyaꞌ pagsultanan bu magbonoꞌ meꞌ aꞌanen, gaꞌi layun pagsultanan miyaꞌan.
[25] Damikkiyan,” paꞌin si Isa, “bang magtewtey-anakin gaꞌi magtuhut pikilan saguwaꞌ luwal magsasaꞌ, ujudnen magkanat-kanat siye.
[26] Hangkan bang nakuraꞌ seyitanin magkuntara duk meꞌ tindegne seyitanin gaꞌi layun pagbayaꞌnen saguwaꞌ magtamanan du.
[27] Seyitanin dalilnen aꞌa basag. Gaꞌ niyaꞌ tapī ngahawas si lumaꞌ aꞌa basag bang gaꞌi dahuꞌ ingketanne aꞌa mabasag miyaꞌan, ubus meke ne iye tapangahawas.”
[28] “Sabennal akahante kaꞌam,” paꞌin si Isa, “ampun Tuhanin du kēmon duse aꞌahin duk sasuku bissāne laꞌat si Tuhan.
[29] Saguwaꞌ bang Niyawa Sutsihin binissā-bissāhannen, asal gaꞌi teꞌed iye inampun peggeꞌ dusene miyaꞌan teteg ne laꞌi si iye salama-lama.”
[30] Hangkan si Isa missā si siye sa miyaꞌan, peggeꞌ paꞌinde weꞌ pasayedan seyitan iye.
[31] Na, manjari tekka laꞌi saꞌi si Isahin duk meꞌ pungtinaꞌine lellahin. Nengge siye laꞌi si luwasan lumaꞌ duk daꞌakde iye ilinganan.
[32] Na, banes aꞌa magtingkoloꞌ paliput pu si Isa. Manjari niyaꞌ ngakahan iye, paꞌinne, “Tuwan, īꞌ laꞌi saꞌinun duk meꞌ pungtinaꞌinun si bukut miha kaꞌu.”
[33] Nambung si Isa, paꞌinne, “Sine saꞌikun duk sine meꞌ pungtinaꞌikun?”
[34] Manjari pinayaman weꞌ ne meꞌ magtingkoloꞌ mapaliput si iyehin duk paꞌinne, “Siye inin saꞌiku duk meꞌ pungtinaꞌiku.
[35] Peggeꞌ sasuku maghinang kinabayaꞌan Tuhanin, iye iyan pungtinaꞌiku lella, pungtinaꞌiku dende duk saꞌiku.”