[1] Wa hassaʼ da, ya sukkaan Madiinat al-Khudus, jarruhu nufuusku min al-hizin. Haasaro madiinitku wa be l-isay darabo wijih haakim Bani Israaʼiil.
[2] Wa Allah gaal : «Inti, ya Beet Laham Afraata, inti sakhayre le tinhasbi ambeen aayilaat Yahuuza. Wa laakin naadum waahid yamrug minki al-yahkim be usmi fi Bani Israaʼiil. Wa gaʼarah jaayi min baʼiid min al-zaman al-gadiim.»
[3] Wa Allah yikhalli chaʼabah le wakit chiyya lahaddi l-mara al-khalbaane talda wileedha. Wa akhwaanna al-faddalo fi l-khurba yigabbulu min hinaak wa yilimmu maʼa Bani Israaʼiil.
[4] Wa hu yugumm wa yuguudhum misil raaʼi be gudrat Allah wa be azamat usum Allah Ilaahah. Wa chaʼabah yaskunu be amaan achaan gudurtah tilwassaʼ lahaddi aakhir al-ard.
[5] Wa hu zaatah yijiib al-salaam. Wakit askar balad Achuur yahjumu baladna wa yadkhulu fi gusuurna, aniina nigawwumu didduhum sabʼa kubaaraat wa tamaane chuyuukh chaʼab.
[6] Wa humman yahkumu balad Achuur // be l-seef wa balad Nimruud be l-huraab. Wa l-haakim al-Allah yirassilah yinajjiina min iid al-Achuuriyiin wakit yahjumu baladna wa yadkhulu ardina.
[7] Wa l-faddalo min zurriiyit Yaakhuub yukuunu fi usut chuʼuub katiiriin. Yabgo misil matara al-jaaye min Allah wa misil karany fi l-gechch. Ma yarjo cheyy min naadum wa la yukhuttu achamhum fi insaan.
[8] Wa l-faddalo min zurriiyit Yaakhuub yukuunu been al-umam fi usut chuʼuub katiiriin. Yabgo misil duud ambeen haywaanaat al-khaaba wa misil farkh al-duud ambeen door al-khanam. Wa fi ayyi bakaan al-yamchi, yaktul wa yicharrit wa ma fi naadum al-yikhallis minnah.
[9] Ya l-faddalo min zurriiyit Yaakhuub, arfaʼo iideeku didd khusmaanku wa dammuru kulla udwaanku.
[10] Daahu kalaam Allah : «Fi l-yoom da, nidammir kheelku min usutku wa nikassir arabaatku hana l-harib.
[11] Wa nidammir mudun baladku wa nihaddim kulla bakaanaatku al-gawiyiin.
[12] Wa nidammir sihirku al-fi iidku wa ma yukuun fi usutku // al-yihajji be ilim al-kheeb.
[13] Wa nidammir min usutku asnaamku wa l-hujaar al-khazzeetuuhum // le l-ibaada wa abadan ma tasjudu le cheyy al-sawweetuuh be iidku.
[14] Wa nimallit min usutku al-iidaan al-khazzeetuuhum le ibaadat Achiira wa nidammir mudunku.
[15] Wa be khadab wa zaʼal, nichiil al-taar fi l-umam al-abo ma yasmaʼooni.»