[1] Wa Allah hajja le Muusa wa gaal :
[2] Hajji le Bani Israaʼiil wa guul leehum : «Kan mara khalbaane wa wildat wileed, hi tabga nijse le muddit sabʼa yoom wa tabga nijse misil fi ayyaamha hana l-heed.
[3] Wa fi l-yoom al-taamin, yitahhuru al-wileed.
[4] Wa baʼad da, hi tagood 33 yoom le tittahhar min dammaha. Wa ma talmas cheyy mukhassas wa la tamchi fi l-beet al-mukhaddas, lahaddi titimm ayyaam tihaaritha.
[5] «Wa kan wildat bineeye, hi tabga nijse le muddit subuuʼeen wa tabga nijse misil fi ayyaamha hana l-heed. Wa tagood 66 yoom le tittahhar min dammaha.
[6] «Wa wakit ayyaam tihaaritha hana l-nufaas be l-wileed aw al-bineeye yikammulu, hi tijiib le raajil al-diin fi madkhal kheemat al-ijtimaaʼ kharuuf wald sana le l-dahiiye al-muharraga. Wa battaan kula tijiib farkh hamaam aw gimriiye le l-dahiiye hana kaffaarat al-zanib.
[7] Wa raajil al-diin yigaddimhum giddaam Allah wa yisawwi leeha kaffaara. Wa khalaas, hi tabga taahire min dammaha hana l-waaluuda. «Wa dool gawaaniin al-bukhussu al-mara al-talda wileed aw bineeye.
[8] «Wa kan hi ma tagdar talga kharuuf, hi tichiil gimri itneen aw hamaam itneen. Waahid tigaddimah le l-dahiiye al-muharraga wa l-aakhar le l-dahiiye hana kaffaarat al-zanib. Wa raajil al-diin yisawwi leeha kaffaara wa hi tabga taahire.»