[1] Wa Allah hajja le Muusa wa Haaruun wa gaal leehum :
[2] Hajju le Bani Israaʼiil wa guulu leehum : «Daahu al-tagdaro taakuluuhum min kulla haywaanaat al-ard.
[3] Kulla l-haywaanaat al-induhum dalaafe mafruugiin wa yagsaʼo jurra, dool tagdaro taakuluuhum.
[4] «Wa daahu haywaanaat waahidiin induhum dalaafe mafruugiin aw yagsaʼo jurra wa laakin intu ma taakuluuhum. Misil al-jamal, hu yagsaʼ jurra wa laakin ma indah dalaafe mafruugiin. Wa hu da nijis leeku.
[5] Wa tees al-hajar, hu yagsaʼ jurra wa laakin ma indah dalaafe mafruugiin. Wa hu da nijis leeku.
[6] Wa l-arnab, hi tagsaʼ jurra wa laakin ma indaha dalaafe mafruugiin. Wa hi di nijse leeku.
[7] Wa l-khinziir, hu indah dalaafe mafruugiin wa laakin ma yagsaʼ jurra. Wa hu da nijis leeku.
[8] Humman dool ma taakulu min lahamhum wa ma tilammusu rimmithum. Wa humman dool nijsiin leeku.
[9] «Wa min kulla haywaanaat al-bahar, al-tagdaro taakuluuhum humman kulla l-haywaanaat hana l-bahar wa hana l-wudyaan al-induhum awwaamaat wa gichir. Dool tagdaro taakuluuhum.
[10] Wa laakin kulla haywaanaat al-bahar wa kulla l-aaychiin fi l-almi, kan fi l-bahar aw fi l-waadi, al-ma induhum awwaamaat wa la gichir, humman dool nijsiin marra waahid leeku.
[11] Humman dool nijsiin marra waahid leeku, ma taakulu lahamhum wa ajʼalo rimmithum nijse marra waahid.
[12] Wa ayyi haywaan al-ma indah awwaamaat wa la gichir nijis marra waahid leeku.
[13] «Wa min kulla l-tuyuur, daahu al-tajʼaloohum nijsiin marra waahid wa ma taakuluuhum achaan humman nijsiin marra waahid leeku. Wa l-tuyuur dool humman al-sagur wa l-dagal wa sagur al-bahar
[14] wa l-hideyye wa kulla nafar hana l-suguura al-kubaar
[15] wa l-khurbaat hasab kulla nafarhum
[16] wa l-naʼaam wa amguggum wa tuyuur al-bahar wa kulla nafar hana l-suguura al-dugaag
[17] wa l-buuma wa l-wizziin wa l-kurki
[18] wa l-buuma al-beeda wa amʼakk wa l-dagal
[19] wa abunkhanam wa kulla nafar hana l-riheew wa l-hudhud wa abunrigeeʼ. Humman dool, ma taakuluuhum.
[20] «Wa kulla l-hacharaat al-induhum janaahe wa yuruukhu be arbaʼa rijle, nijsiin marra waahid leeku.
[21] Wa laakin min kulla l-hacharaat al-induhum janaahe wa yuruukhu be arbaʼa rijle, daahu al-tagdaro taakuluuhum. Humman al-induhum sakkaakaat min foog le rijleehum le yunuttu beehum fi l-ard.
[22] Wa l-tagdaro taakuluuhum, humman kulla nafar hana l-jaraad misil saar al-leel wa ambukbuk wa amkachool.
[23] Wa laakin kulla l-hacharaat al-induhum janaahe wa rijle arbaʼa, humman dool nijsiin marra waahid leeku.
[24] «Wa haywaanaat waahidiin yinajjusuuku wa ayyi naadum al-yalmas rimmithum yukuun nijis lahaddi l-achiiye.
[25] Wa ayyi naadum al-yichiil rimmithum, waajib yikhassil khulgaanah wa yukuun nijis lahaddi l-achiiye.
[26] «Wa kulla l-bahaayim al-induhum dalaafe ma mafruugiin wa yagsaʼo jurra yukuunu leeku muharramiin wa ayyi naadum al-yalmashum yukuun nijis.
[27] Wa kulla l-bahaayim al-induhum arbaʼa rijle wa yamchu be butuun rijleehum, nijsiin leeku. Wa ayyi naadum al-yalmas rimmithum yukuun nijis lahaddi l-achiiye.
[28] Wa ayyi naadum al-yichiil rimmithum yikhassil khulgaanah wa yukuun nijis lahaddi l-achiiye. Humman nijsiin leeku.
[29] «Wa daahu min al-haywaanaat al-yazhafo be katara fi l-ard al-nijsiin misil al-durbaan wa l-faar wa l-dububba hasab nafarhum
[30] wa abundigeer al-haddaar wa l-waral wa amrijeelaat wa l-zihliiye wa l-hirbeeye.
[31] Wa dool min al-haywaanaat al-yazhafo, humman nijsiin leeku. Wa ayyi naadum al-yalmas rimmithum yukuun nijis lahaddi l-achiiye.
[32] «Wa kan waahid min al-haywaanaat dool wagaʼ mayyit fi cheyy, al-cheyy da yukuun nijis hatta kan maaʼuun hana hatab aw khalag aw farwa aw chuwaal, ayyi maaʼuun al-gaaʼidiin yistaʼmalooh fi ayyi khidme. Dissuuh fi almi wa yukuun nijis lahaddi l-achiiye. Wa baʼad da, yukuun taahir.
[33] «Wa kan al-haywaan da wagaʼ fi maaʼuun hana tiine, kulla cheyy al-foogah yukuun nijis wa waajib tikassuru al-maaʼuun da.
[34] Wa kan yusubbu al-almi da fi ayyi akil, al-akil da yukuun nijis wa kan charaab gaaʼid fi maaʼuun hana chunu kula, yukuun nijis.
[35] Wa kan rimme hana waahid min al-haywaanaat dool wagaʼat fi ayyi cheyy, yukuun nijis. Wa l-furun wa l-ladaay dool waajib tikassuruuhum achaan humman nijsiin wa intu ajʼaloohum nijsiin.
[36] «Wa laakin kan al-rimme di wagaʼat fi een almi aw khazzaan almi, humman yukuunu taahiriin. Wa ayyi cheyy al-yilammis al-rimme yukuun nijis.
[37] Wa laakin kan rimme hana waahid min al-haywaanaat dool wagaʼat fi l-hubuub hana l-teeraab, al-hubuub dool yukuunu taahiriin.
[38] Wa laakin kan ballo al-hubuub dool le yaakuluuhum wa rimme hana waahid min al-haywaanaat dool wagaʼat fi l-hubuub, humman yukuunu nijsiin leeku.
[39] «Wa kan waahid min al-haywaanaat al-taakuluuhum maat, al-naadum al-yalmas rimmitah yukuun nijis lahaddi l-achiiye.
[40] Wa l-yaakul min al-rimme di, waajib yikhassil khulgaanah wa yukuun nijis lahaddi l-achiiye. Wa l-yichiil al-rimme di, waajib yikhassil khulgaanah wa yukuun nijis lahaddi l-achiiye.
[41] «Wa kulla l-haywaanaat al-yazhafo be katara fi l-ard, humman nijsiin marra waahid, ma waajib taakuluuhum.
[42] Wa kulla l-haywaanaat al-yazhafo be katara fi l-ard kan yazhafo be butuunhum walla yamchu be arbaʼa rijle aw be rijle katiiriin kula, ma taakuluuhum achaan humman dool nijsiin marra waahid.
[43] Ma tabgo nijsiin marra waahid be kulla l-haywaanaat al-yazhafo be katara fi l-ard. Wa ma tinajjusu nufuusku beehum wa tabgo nijsiin.
[44] Ana Allah Ilaahku wa ana khudduus wa be da, khassusu nufuusku wa tabgo khaassiin. Khalaas, ma tinajjusu nufuusku be kulla l-haywaanaat al-yazhafo be katara fi l-ard.
[45] Achaan ana Allah maragtuku min balad Masir le nabga Ilaahku. Wa waajib tabgo khaassiin achaan ana khudduus.»
[46] Wa dool bas al-gawaaniin al-bukhussu al-bahaayim wa l-tuyuur wa kulla l-makhluugiin al-hayyiin al-gaaʼidiin fi l-almi aw al-yazhafo be katara fi l-ard.
[47] Wa yiwassufu leeku al-faraga been al-nijis wa l-taahir. Wa been al-haywaanaat al-yaakuluuhum wa l-ma yaakuluuhum.