[1] Wa be fajur badri, Yarbaʼal wa hu Gidʼuun gamma, hu wa kulla l-chaʼab al-maʼaayah wa nazalo gariib le Een Haruud. Wa muʼaskar al-Midyaaniyiin kamaan gaaʼid munchaakh fi l-waadi ale jabal Muura.
[2] Wa Allah gaal le Gidʼuun : «Al-chaʼab al-maʼaak dool katiiriin marra waahid. Wa kan ana nisallim leehum al-Midyaaniyiin fi iideehum, Bani Israaʼiil yafchuru be nufuushum wa yuguulu : ‹Be duraaʼna bas najjeena nufuusna.›
[3] Wa hassaʼ, guul le chaʼabak : ‹Ayyi naadum al-khaaf wa gaaʼid yarjif, khalli yigabbil min jibaal Gilʼaad.›» Wa khalaas, 22 000 raajil min al-chaʼab gabbalo wa faddalo 10 000 raajil.
[4] Wa Allah gaal le Gidʼuun : «Ya hassaʼ kula, al-chaʼab dool katiiriin ziyaada. Dalliihum fi khachum al-almi wa hinaak, ana nijarribhum leek. Wa ayyi naadum al-nuguul leek : ‹Khalli yamchi maʼaak›, hu da yamchi maʼaak. Wa l-naadum al-nuguul leek : ‹Ma yamchi maʼaak›, hu da khalli ma yamchi maʼaak.»
[5] Wa khalaas, Gidʼuun wadda al-chaʼab fi khachum al-almi. Wa Allah gaal leyah : «Ayyi naadum al-yakhrif almi be iideenah wa yuluggah misil kalib, khuttah chig. Wa l-yabruk wa yachrab kula, khuttah chig.»
[6] Wa l-naas al-kharafo almi be iideehum wa laggooh misil kulaab, adadhum bigi tultumiya. Wa laakin al-baagi min al-chaʼab, kulluhum barako wa chirbo almi.
[7] Wa Allah gaal le Gidʼuun : «Be l-tultumiya rujaal al-laggo almi misil kulaab dool bas, ana ninajjiiku wa nisallim leeku al-Midyaaniyiin fi iideeku. Wa khalaas, khalli kulla l-baagi min al-chaʼab yamchu buyuuthum.»
[8] Wa khalaas, al-rujaal al-tultumiya chaalo zaad al-baagi min al-chaʼab wa bawagaahum. Wa Gidʼuun gaal le l-baagi min chaʼab Bani Israaʼiil khalli ayyi waahid yigabbil beetah. Wa hu khatta al-tultumiya naas dool maʼaayah. Wa muʼaskar al-Midyaaniyiin gaaʼid tihithum fi l-waadi.
[9] Wa fi l-leele di, Allah gaal le Gidʼuun : «Gumm anzil wa ahjim muʼaskar al-Midyaaniyiin. Ana sallamtah leek !
[10] Wa laakin kan khuft ma tanzil wa tahjim, dalli chiif ale l-muʼaskar maʼa khaddaamak Fuura.
[11] Wa tasmaʼ kalaamhum wa khalaas, talga gudra wa tahjim al-muʼaskar.» Wa hu dalla maʼa Fuura khaddaamah lahaddi gariib le khachum al-muʼaskar.
[12] Wa l-Midyaaniyiin wa l-Amaalikh wa kulla gabaayil al-sabaah muchattatiin fi l-waadi misil saar al-leel wa jumaalhum katiiriin misil ramla hana khachum al-bahar.
[13] Wa wakit Gidʼuun dalla, hu simiʼ waahid min al-askar gaaʼid yihajji le rafiigah be ruʼya. Wa gaal : «Ana riʼiit wa di hi al-ruʼya al-ana chiftaha. Ana chift khubza waahide hint gameh abyad gaaʼid yiddargas fi muʼaskarna. Wa l-khubza di jaat lahaddi le kheema waahide wa darabaaha wa l-kheema di achchaglabat wa wagaʼat marra waahid.»
[14] Wa rafiigah gaal leyah : «Da bas yabga seef Gidʼuun wileed Yuwaach al-min Israaʼiil. Al-Rabb sallam leyah Midyaan wa kulla muʼaskarna.»
[15] Wa min Gidʼuun simiʼ al-ruʼya wa tafsiirha, gamma sajad. Wa gabbal le muʼaskar Bani Israaʼiil wa gaal : «Gummu achaan Allah sallam muʼaskar Midyaan fi iideeku !»
[16] Wa Gidʼuun gassam al-tultumiya rujaal ale talaata majmuuʼaat wa anta ayyi raajil buug wa jarr faadi wa fi ayyi jarr fi deyy.
[17] Wa gaal leehum : «Chiifu aleyi wa sawwu misli. Wa wakit niwassil fi khachum al-muʼaskar, al-cheyy al-ana nisawwiih, intu kula sawwuuh.
[18] Wakit ana wa l-naas al-maʼaayi nadurbu al-buug, intu kula hawwugu al-muʼaskar wa adurbu bawagaaku wa guulu : ‹Le Allah wa le Gidʼuun !›»
[19] Wa gubbaal al-leel ma yingasim Gidʼuun wa l-miya naas al-maʼaayah jo fi khachum al-muʼaskar wa da wakit baddalo al-haraasa. Humman darabo al-buug wa kassaro al-jiraar al-fi iideehum.
[20] Wa l-talaata majmuuʼaat kulluhum darabo al-buug wa kassaro jiraarhum. Ayyi raajil be iidah al-isra, kaarib al-deyy wa be iidah al-zeene, kaarib al-buug al-gaaʼid yadurbah. Wa gaalo : «Al-seef le Allah wa le Gidʼuun !»
[21] Wa humman hawwago al-muʼaskar ayyi waahid waagif fi bakaanah. Wa khalaas, kulla rujaal fi muʼaskar al-Midyaaniyiin gammo barjalo wa koorako wa arrado.
[22] Wa wakit al-tultumiya naas darabo al-bawaga, Allah sawwa fi lubb al-muʼaskar kadar ayyi raajil yaktul rafiigah be seefah. Wa kulla l-askar arrado lahaddi Beet Chitta ale Sariira wa lahaddi khachum Abil Mahuula gariib le Tabbat.
[23] Wa Bani Israaʼiil lammo rujaal gabaayil Naftaali wa Achiir wa kulla gabiilat Manassa wa taarado al-Midyaaniyiin.
[24] Wa Gidʼuun rassal naas le kulla jibaal Afraayim le yuguulu : «Anzulu wa ahjumu al-Midyaaniyiin. Akurbu giddaamhum ayyi maʼada fi bahar al-Urdun lahaddi Beet Bara.» Wa be da, kulla rujaal Afraayim karabo ayyi maʼada fi bahar al-Urdun lahaddi Beet Bara.
[25] Wa karabo itneen min khuyyaad al-Midyaaniyiin wa humman Uriib wa Ziib. Wa katalo Uriib fi hajar hana Uriib wa Ziib fi assaarat Ziib. Wa humman taarado al-Midyaaniyiin lahaddi turaab Midyaan. Wa baʼad da, jaabo ruuse Uriib wa Ziib le Gidʼuun khaadi le bahar al-Urdun.