[1] Fiyah raajil waahid min jibaal Afraayim usmah Miika.
[2] Wa l-raajil da gaal le ammah : «Ana simiʼtiki talʼane al-naadum al-sirig minki 1 100 hajar fudda. Al-fudda di fi bakaani. Ana bas chiltaha.» Wa ammah gaalat leyah : «Allah yibaarikak, ya wileedi.»
[3] Wa hu gabbal al-alif wa miya hajar fudda le ammah wa laakin hi gaalat leyah : «Ana khassast al-fudda di le Allah wa nantiiha leek inta wileedi achaan tasnaʼ beeha sanam wa timsaal hana hadiid. Wa daahu ana nigabbilha leek.»
[4] Wa misil da, wakit hu gabbal al-fudda le ammah, hi chaalat 200 hajar fudda wa antathum le l-haddaadi. Wa hu sanaʼ beeha sanam wa timsaal hana hadiid wa khattoohum fi beet Miika.
[5] Wa Miika indah beet hana ilaahah. Hu sanaʼ farmala hana raajil al-diin wa tamaasiil wa darraj waahid min awlaadah le yabga leyah raajil diin.
[6] Wa fi l-wakit da, ma fi malik fi Israaʼiil wa ayyi naadum bisawwi cheyy al-hu bidoorah.
[7] Wa fiyah sabi waahid Laawi al-saakin fi Beet Laham fi turaab gabiilat Yahuuza.
[8] Wa yoom waahid, al-naadum da gamma macha min Beet Laham fi turaab Yahuuza le yifattich bakaan aakhar yaskun foogah. Wa wakit ja fi jibaal Afraayim, sudfa fi derbah hu ligi beet Miika.
[9] Wa Miika gaal leyah : «Inta jaayi min ween ?» Wa hu gaal leyah : «Ana Laawi min Beet Laham fi turaab Yahuuza wa maachi nifattich bakaan naskun foogah.»
[10] Wa khalaas, Miika gaal leyah : «Agood maʼaayi wa abga leyi abu wa raajil diin. Wa ana nantiik achara hajar fudda fi ayyi sana wa khulgaan wa akil.» Wa l-Laawi dakhal beetah.
[11] Wa hu khassad yagood maʼa Miika wa hu jaʼalah misil waahid min awlaadah.
[12] Wa Miika darraj al-Laawi da raajil diin wa gaʼʼadah maʼaayah fi beetah.
[13] Wa Miika gaal : «Hassaʼ da, ana naʼarif kadar Allah yisawwi leyi al-kheer achaan al-Laawi da bigi leyi raajil diin.»