[1] Wakit naas Afraayim hajjo, al-khoof bigi chadiid fi balad Israaʼiil. Wa laakin humman bigo khaatiyiin achaan abado ilaah Baʼal wa maato be sababah.
[2] Wa ya hassaʼ kula, gaaʼidiin yiziidu // fi zunuubhum achaan sanaʼo leehum sanam // be fuddithum. Aywa hasab ilimhum, sawwo leehum asnaam al-daggaahum sinaaʼi maʼruuf. Wa l-naas yuguulu : «Gaddumu leehum dahaaya !» Chiifu ! Al-naas dool yihibbu asnaam al-ajjaal !
[3] Wa be sabab da, humman yabgo misil sahaab al-fajur al-yufuut wa misil karany al-sabaah // al-ma yitawwil. Yabgo misil uttaab al-madagg // al-tichiilah al-riih wa misil al-dukhkhaan // al-yamrug min al-chubbaak.
[4] «Ana Allah Ilaahku min maragtuku min balad Masir. Ma waajib taʼarfu ilaah aakhar balaayi ana wa ma fi munajji illa ana.
[5] Ana iriftuku fi l-sahara, fi balad al-yabaas.
[6] Ana sarrahtuku fi marʼa adiil wa intu riwiitu wa chibiʼtu. Wa min chibiʼtu, al-istikbaar dakhal // fi guluubku wa be da, intu nisiituuni.
[7] Wa khalaas, ana nabga leeku misil duud wa misil nimir kaaris fi l-derib.
[8] Nahjimku misil marfaʼiin al-waddar iyaalah wa nuchugg suduurku. Fi l-bakaan da, naakulku misil mart al-duud wa haywaanaat al-kadaade al-khatiiriin yicharrutuuku.
[9] «Ya Bani Israaʼiil, addammartu achaan gammeetu diddi ana al-nafzaʼku.
[10] Wa hassaʼ da, ween malikku ? Khalli yafzaʼku fi kulla hillaalku ! Wa ween hukkaamku al-be sababhum gultu : ‹Antiina malik wa masaaʼiil.›
[11] Fi zaʼali, ana darrajt leeku malik wa fi khadabi, ana nazzaltah.
[12] «Khata naas Afraayim musajjal wa zunuubhum maktuubiin.
[13] Wa wajaʼ yaji leehum misil wajaʼ al-talaga. Wa humman misil wileed al-ma indah hikma. Fi wakit al-waaluuda, ma yamrug min batun ammah !
[14] Hal ninajjiihum min al-khabur ? Hal nafdaahum min al-moot ? Ya l-moot, ween wabaak ? Ya l-khabur, ween kharaabak ? Battaan ma nichiifhum be een al-rahma.
[15] Wa kan naas Afraayim zaado fi ust akhwaanhum, riih al-sabaah taji wa riih min Allah tugumm min al-sahara. Hi tiyabbis wudyaanhum wa tijaffif een almiihum. Al-makhaazin, yanhaboohum wa khumaamhum al-khaali, yichiiluuh.
[16] Naas madiinat al-Saamira khaatiyiin achaan iso Ilaahhum. Yaktuluuhum fi l-harib wa yarhako iyaalhum wa yuchuggu butuun awiinhum al-khalbaanaat.»