[1] Gabiilat Afraayim tarwa be riih wa tajri wara riih al-sabaah. Kulla yoom hi tikattir al-kidib wa l-damaar. Tisawwi alaakha maʼa Achuur wa tantiih dihin le Masir fi badal al-salaam.
[2] Allah yijiib Bani Yahuuza fi l-chariiʼa achaan yiʼaakhib zurriiyit Yaakhuub // hasab deribhum wa yikaafiihum // hasab amalhum.
[3] Hatta fi batun ammah kula, Yaakhuub khachcha chig toomah. Wa wakit bigi raajil, hu saaraʼ maʼa l-Rabb.
[4] Aywa, Yaakhuub saaraʼ maʼa malak al-Rabb wa gidir foogah. Wa baʼad da, hu baka wa chahad al-malak le yihinn foogah. Aywa, fi Beet Iil hu ligi Allah wa fi l-bakaan da bas, Allah hajja leyah.
[5] Wa da Allah al-Ilaah al-Gaadir, Allah hu usmah al-beyah nazkuruuh !
[6] Wa intu zurriiyit Yaakhuub, waajib tigabbulu le Ilaahku wa tahfado al-rahma wa l-adaala wa daayman tukhuttu achamku fi Ilaahku.
[7] Wa gabiilat Afraayim misil al-taajir al-indah fi iidah miizaan makhchuuch wa yihibb yazlum al-aakhariin.
[8] Wa naas Afraayim gaalo : «Be sahiih, aniina bigiina khaniyiin wa ligiina maal katiir be khidmit duraaʼna bas. Wa ma yalgo foogna ayyi khata al-yabga zanib.»
[9] «Wa ana Allah Ilaahku min maragtuku min balad Masir. Nisakkinku battaan fi khiyam misil fi ayyaam kheemat al-ijtimaaʼ.
[10] Wa fi l-wakit daak, ana kallamt // le l-anbiya wa kattart leehum al-ruʼya. Wa hassaʼ be waasitat al-anbiya, nikallim leehum be masal.»
[11] Akiid, chaʼab Gilʼaad fasliin wa ma induhum faayde achaan yigaddumu tiiraan dahaaya fi Gilgaal. Wa be da, madaabihhum yilhaddamo wa yabgo koom hana turaab fi l-zereʼ al-mahruut.
[12] Zamaan, jiddina Yaakhuub arrad le balad Araam. Aywa, jiddina Israaʼiil bigi khaddaam le yalga mara. Le yalga mara, bigi raaʼi hana khanam.
[13] Wa baʼadeen be waasitat nabi, Allah marag Bani Israaʼiil min Masir. Wa be waasitat nabi, hu hafadaahum.
[14] Wa laakin naas Afraayim khaddabo Allah khadab chadiid. Wa khalaas, Ilaahhum yarmi fi raashum al-damm al-humman daffagooh wa yigabbil fooghum kulla eebhum.