[1] Wa wakit Yahuuyakhim gaaʼid yahkim, Nabuukhadnasar malik Baabil chaal mamlakat Yahuuza. Wa Yahuuyakhim gaʼad tihit hukmah muddit talaata sana wa baʼad da, atmarrad diddah.
[2] Wa Allah rassal didd Yahuuyakhim nahhaabiin min balad Baabil wa balad Araam wa balad Muwaab wa Bani Ammuun achaan yidammuru balad Yahuuza. Wa da hasab kalaam Allah al-gaalah be waasitat abiidah al-anbiya.
[3] Wa kulla l-achya dool bigo be amur Allah al-dawwar yibaʼʼid minnah mamlakat Yahuuza be sabab zunuub Manassa wa kulla cheyy al-hu sawwaah
[4] wa be sabab damm al-naas al-bariyiin al-Manassa katalaahum lahaddi dammuhum mala kulla Madiinat al-Khudus da. Wa Allah aba ma yakhfir leehum.
[5] Wa l-baagi min amal Yahuuyakhim wa kulla cheyy al-sawwaah maktuubiin fi kitaab taariikh muluuk Bani Yahuuza.
[6] Wa Yahuuyakhim maat wa lihig abbahaatah. Wa wileedah Yuyakiin hakam fi badalah.
[7] Wa min al-wakit da, malik Masir ma marag battaan min baladah achaan malik Baabil chaal minnah kulla l-manaatig al-awwal fi iideenah min waadi Masir fi l-wati lahaddi bahar al-Furaat fi l-munchaakh.
[8] Wa Yuyakiin indah 18 sana wakit bigi malik wa hakam talaata chahar fi Madiinat al-Khudus. Wa ammah usumha Nahuuchta bineeyit Alnaataan min Madiinat al-Khudus.
[9] Wa Yuyakiin sawwa al-fasaala giddaam Allah misil abuuh sawwaah.
[10] Wa fi l-wakit da bas, rujaal Nabuukhadnasar malik Baabil jo wa haasaro Madiinat al-Khudus.
[11] Wa Nabuukhadnasar malik Baabil hu zaatah ja hajam al-hille al-rujaalah haasarooha.
[12] Wa khalaas, Yuyakiin malik mamlakat Yahuuza marag didd malik Baabil wa chaal maʼa ammah wa masaaʼiilah wa kubaaraatah wa khaddaamiinah. Wa malik Baabil karabah wa waddaah masjuun wa da fi l-sana al-taamne hana hukmah.
[13] Misil Allah gaalah, Nabuukhadnasar chaal kulla l-achya al-fi makhaazin beet Allah wa gasir al-malik. Wa kulla l-mawaaʼiin hana l-dahab al-Suleymaan malik Bani Israaʼiil sanaʼaahum wa khataahum fi beet Allah, Nabuukhadnasar dammaraahum.
[14] Wa hu wadda fi l-khurba kulla chaʼab Madiinat al-Khudus wa kulla l-kubaaraat wa kulla l-rujaal al-furraas wa adadhum yisaawi 10 000. Wa wadda maʼaahum kulla l-sayyaakhiin wa l-haddaad. Wa fi l-balad, faddalo illa masaakiin al-balad.
[15] Wa hu wadda fi Baabil al-malik Yuyakiin wa ammah wa awiinah wa khaddaamiinah wa furraas al-balad. Hu chaalaahum min Madiinat al-Khudus wa waddaahum fi l-khurba fi Baabil.
[16] Wa Nabuukhadnasar wadda kulla askar adadhum 7 000 wa l-sayyaakhiin wa l-haddaad adadhum 1 000 wa kulla l-naas al-fahaliin al-yaʼarfu al-duwaas. Wa hu wadda kulla l-naas dool fi l-khurba fi Baabil.
[17] Wa malik Baabil darraj Mattanya immah le Yuyakiin malik fi badalah wa khayyar usmah wa sammaah Sidkhiiya.
[18] Wa Sidkhiiya indah 21 sana wakit bigi malik wa hakam 11 sana fi Madiinat al-Khudus. Wa ammah usumha Hamuutal bineeyit Irmiya min hillit Libna.
[19] Wa Sidkhiiya sawwa al-fasaala giddaam Allah misil al-malik Yahuuyakhim sawwaah.
[20] Wa l-fasaala al-humman sawwooha fi Madiinat al-Khudus wa fi balad Yahuuza jaabat khadab Allah. Wa fi chaan da, Allah taradaahum baʼiid minnah. Wa Sidkhiiya atmarrad didd malik Baabil.