[1] Wa wakit al-malik Hizkhiiya simiʼ kalaamhum, hu kula gamma charrat khulgaanah wa libis khalag al-hizin wa macha beet Allah.
[2] Wa hu rassal Aliyaakhim masʼuul fi gasir al-malik wa Chabna al-kaatib wa rujaal al-diin al-chiyyaab. Wa kulluhum ke laabsiin khulgaan al-hizin wa macho le l-nabi Ichaʼya wileed Ammuus.
[3] Wa humman gaalo leyah : «Daahu kalaam al-malik Hizkhiiya : ‹Al-yoom da, yoom hana diige wa ikhaab wa fadiihe. Wa da misil al-iyaal jaahiziin le yamurgu min batun ammuhum wa laakin hi ma indaha gudra le taldaahum.
[4] Wa akuun Allah Ilaahak yasmaʼ kulla kalaam khaayid al-deech al-siidah malik balad Achuur rassalah le yiʼayyir Allah al-Hayy. Wa akuun Allah Ilaahak yasmaʼ kalaamah wa yiʼaakhibah. Hassaʼ da, asʼal Allah fi chaan al-chaʼab al-faddalo.›»
[5] Wa wakit masaaʼiil al-malik Hizkhiiya jo giddaam Ichaʼya,
[6] hu gaal leehum : «Amchu guulu le siidku al-malik Hizkhiiya : ‹Daahu Allah gaal : “Ma takhaaf min al-muʼyaar al-simiʼtah al-ayyarooni beyah khaddaamiin malik Achuur.
[7] Wa daahu ana nantiih khabar wa be sabab al-khabar da, hu yigabbil baladah. Wa hinaak ana naktulah be l-seef.”›»
[8] Wa khaayid al-deech simiʼ kadar malik balad Achuur gamma min hillit Lakiich wa macha le yihaarib hillit Libna. Khalaas, hu kula gabbal lihigah hinaak.
[9] Wa khalaas, malik balad Achuur simiʼ khabar. Wa l-khabar da buguul : «Tirhaakha malik balad al-Habacha gamma jaayi le yihaaribak.» Wa khalaas, malik Achuur rassal murassaliin le Hizkhiiya wa gaal leehum :
[10] «Amchu le Hizkhiiya malik mamlakat Yahuuza wa guulu leyah : ‹Khalli ilaahak al-inta gaaʼid titwakkal aleyah da ma yukhuchchak wa yuguul leek : “Madiinat al-Khudus ma tagaʼ fi iideen malik Achuur !”
[11] Inta zaatak simiʼt be kulla cheyy al-sawwooh muluuk balad Achuur fi kulla l-buldaan wa dammaroohum marra waahid. Wa tahsib inta wiheedak bas tanja walla ?
[12] Wa ilaahaat al-umam al-dammaroohum juduudi, hal gidro najjo hillaal Guzaan wa Haaraan wa Rasaf wa zurriiyit Adan al-saakniin fi Talassaar walla ?
[13] Wa ween muluuk mudun Hamaat wa Arfad wa Laʼiir wa Safarwaayim wa Hiinaʼ wa Awwa ?›»
[14] Wa Hizkhiiya chaal al-jawaab min iide al-murassaliin wa garaah. Wa macha le beet Allah wa fatah al-jawaab da giddaam Allah.
[15] Wa giddaam Allah, Hizkhiiya saʼal wa gaal : «Ya Allah Ilaah Bani Israaʼiil ! Inta al-gaaʼid fi archak foog al-makhluugiin al-samaawiyiin. Wa inta wiheedak bas Ilaah kulla mamaalik al-ard ! Wa inta bas al-khalagt al-samaawaat wa l-ard !
[16] Ya Allah, khutt adaanak wa asmaʼni ! Ya Allah, aftah uyuunak wa chiif ! Wa asmaʼ kalaam Sanhariib malik Achuur al-rassalah le yiʼayyirak inta, al-Ilaah al-Hayy.
[17] Ya Allah, akiid muluuk Achuur dammaro kulla l-umam wa buldaanhum.
[18] Wa zagalo ilaahaathum fi l-naar achaan humman asnaam bas al-sawwoohum al-naas be iideehum min hatab wa hajar. Wa muluuk Achuur dammaroohum.
[19] Wa hassaʼ, ya Allah Ilaahna, najjiina min iid Sanhariib wa be da, kulla mamaalik al-ard yaʼarfu kadar inta ya Allah, inta wiheedak bas al-Rabb.»
[20] Wa Ichaʼya wileed Ammuus rassal le Hizkhiiya wa gaal leyah : «Daahu Allah Ilaah Bani Israaʼiil gaal : ‹Aywa, ana simiʼt salaatak al-inta wajjahtaha leyi fi chaan Sanhariib malik balad Achuur.›»
[21] Wa Ichaʼya gaal battaan : «Daahu kalaam Allah al-gaalah didd Sanhariib : ‹Sahyuun al-misil bineeye udriiye tahgirak wa tichchammat foogak ! Aywa ! Madiinat al-Khudus // al-misil bineeye tihizz raasha waraak.
[22] Le yaatu inta ayyartah wa achchammat foogah ? Wa didd yaatu inta kallamt wa chift be istikbaar ? Da diddi ana, Khudduus Israaʼiil !
[23] Be waasitat naasak al-rassaltuhum, inta ayyart al-Rabb wa gult : “Be katarat arabaati, ana talaʼt fi ruuse al-jibaal lahaddi dakhalt fi Lubnaan daakhal le nagtaʼ chadarha hana l-arz al-tuwaal wa chadarha hana l-sarwi al-sameh. Wa namchi lahaddi nalhag al-maljaʼ al-aakhir wa khaabaatha al-dulum.
[24] Wa ana nakat biyaar fi buldaan // hana naas aakhariin wa chiribt almiihum wa be fajkhat rijli, yabbast kulla rujuul Niil Masir.”
[25] «‹Wa laakin, ya Sanhariib, inta ma fihimt kadar min wakit tawiil, ana kharrart al-cheyy da. Wa min zamaan ana kawwantah wa hassaʼ, nihaggigah. Wa inta kamaan, gaaʼid tidammir al-mudun al-gawiyiin wa yabgo koom hana turaab.
[26] Wa sukkaanhum ma induhum gudra wa khaafo wa khijlo. Wa humman yibso misil gechch al-kadaade wa nabaat al-akhdar wa l-gechch fi ruuse al-buyuut wa yibso misil al-gameh al-yibis gubbaal ma yanjad.
[27] Wa laakin ana naʼarif wakit inta tagood wa wakit tamrug wa tigabbil wa wakit tarjif min al-zaʼal diddi.
[28] Wa ana simiʼt inta rajaft // min al-zaʼal diddi wa astakbart. Wa be sabab da, ana nidiss leek zumaam fi munkharak wa lijaam fi khachmak wa nigabbilak be l-derib al-inta jiit beyah.›»
[29] «Wa di hi al-alaama, ya Hizkhiiya. Fi l-sana di, taakulu min al-kichcheeb wa fi l-sana al-taaniye, taakulu min al-bandar. Wa laakin fi l-sana al-taalta, titeerubu wa tagtaʼo wa timaggunu jineenaatku // hana l-inab wa taakulu min fawaakihhum.
[30] Wa l-nijo min Bani Yahuuza wa faddalo yabgo misil chadara al-tidiss uruugha min jadiid fi l-ard wa furuuʼha yinmalu be fawaakih.
[31] Achaan min Madiinat al-Khudus yamurgu al-naas al-faddalo aywa, min jabal Sahyuun yamurgu humman al-nijo. Wa da, Allah al-Gaadir yisawwiih hasab mahabbitah al-chadiide.»
[32] Wa fi chaan da, daahu Allah gaal fi malik balad Achuur : «Hu ma yadkhul fi l-madiina di wa la yizarrig foogha nuchchaab. Wa la yigarrib leeha be darag wa la yigawwim radmiiye // wara durdurha.»
[33] Wa daahu kalaam Allah : «Hu yigabbil be l-derib al-ja beyah wa fi l-madiina di, ma yadkhul.
[34] Ana nahmi al-madiina di wa ninajjiiha. Wa da fi chaani ana Allah wa fi chaan abdi Dawuud.»
[35] Wa khalaas fi l-leele di, malak Allah ja darab muʼaskar al-Achuuriyiin wa katal 185 000 raajil. Wa be fajur wakit gammo, al-faddalo minhum chaafo kulla l-janaazaat dool.
[36] Wa khalaas, Sanhariib malik balad Achuur gabbal wa macha gaʼad fi madiinat Niinawa.
[37] Wa yoom waahid, Sanhariib macha fi beet Nisruuk ilaahah le yaʼabudah. Wa iyaalah al-itneen Adramalik wa Charaasar dakhalo darabooh wa katalooh be l-seef wa arrado macho le balad Araraat. Wa wileedah Isar Hadduun hakam fi badalah.