[1] Wa l-malik Akhaab khabbar martah Izabiil be kulla cheyy al-Iliyaas sawwaah wa kikkeef katal kulla anbiya Baʼal be l-seef.
[2] Wa khalaas, Izabiil rassalat le Iliyaas wa gaalat : «Khalli al-ilaahaat yiʼaakhubuuni kadar le ambaakir fi nafs al-saaʼa di kan ma sawweet fi hayaatak misil inta sawweet fi hayaat al-anbiya dool.»
[3] Wa min simiʼ al-kalaam da, Iliyaas arrad le yinajji nafsah. Wa gamma macha Biir Sabʼa fi balad Yahuuza wa khalla khaddaamah hinaak.
[4] Wa Iliyaas macha fi l-sahara wa raakh ruwaakha hana yoom kaamil. Wa macha gaʼad fi gaʼar chideerit ratam. Wa talab al-moot le nafsah wa gaal : «Hassaʼ da, tammaani. Ya Allah, chiil ruuhi achaan ana ma akheer min juduudi.»
[5] Wa hu ragad wa naam fi tihit al-chideere di. Wa tawwaali fi l-bakaan da, malak ja limsah wa gaal leyah : «Gumm wa aakul.»
[6] Wa khalaas, Iliyaas gamma wa chaaf ale raasah khubza haamiye wa jarr hana almi. Wa hu akal wa chirib wa gabbal ragad.
[7] Wa malak Allah ja leyah le taani marra limsah wa gaal leyah : «Gumm wa aakul achaan al-safar yabga leek tawiil ziyaada.»
[8] Wa Iliyaas gamma akal wa chirib. Wa baʼad ligi gudra min al-akil da, raakh muddit 40 leele wa 40 nahaar lahaddi wisil fi jabal Allah al-usmah Huuriib.
[9] Wa wakit Iliyaas wisil hinaak, dakhal fi karkuur wa ragad fi l-bakaan da leele waahide. Wa laakin Allah hajja leyah wa gaal : «Ya Iliyaas, inta gaaʼid tisawwi chunu hini ?»
[10] Wa Iliyaas radda leyah wa gaal : «Ya Allah al-Ilaah al-Gaadir, indi mahabba chadiide leek. Wa Bani Israaʼiil nagado muʼaahadatak wa kassaro kulla madaabhak wa katalo anbiyaak be l-seef. Wa ana faddalt wiheedi wa humman gaaʼidiin yifattuchuuni le yaktuluuni.»
[11] Wa Allah gaal leyah : «Amrug wa agiif fi l-hajar fi giddaami ana Allah. Wa ana nufuut giddaamak.» Wa riih chadiide gammat giddaam Allah wa chaggagat al-jibaal wa kassarat al-hujaar. Wa laakin Allah ma gaaʼid fi l-riih di. Wa baʼad al-riih, ja zilzaal. Wa laakin Allah ma gaaʼid fi l-zilzaal da.
[12] Wa baʼad al-zilzaal, jaat naar. Wa laakin Allah ma gaaʼid fi l-naar di. Wa baʼad al-naar, jaat haraka hana hiss baarid.
[13] Wa wakit Iliyaas simiʼ al-hiss al-baarid da, khatta wijhah be khalagah wa marag wagaf fi khachum al-karkuur. Wa simiʼ hiss buguul leyah : «Ya Iliyaas, inta gaaʼid tisawwi chunu hini ?»
[14] Wa Iliyaas radda leyah wa gaal : «Ya Allah al-Ilaah al-Gaadir, indi mahabba chadiide leek. Wa laakin Bani Israaʼiil nagado muʼaahadatak wa kassaro kulla madaabhak wa katalo anbiyaak be l-seef. Wa ana faddalt wiheedi wa humman gaaʼidiin yifattuchuuni le yaktuluuni.»
[15] Wa Allah gaal leyah : «Gabbil be derib al-sahara wa amchi lahaddi madiinat Dimachkh. Wa hinaak, amsahah le Hazayiil wa darrijah malik fi balad Araam.
[16] Wa amsahah le Yaahu wileed Nimchi wa darrijah malik fi mamlakat Israaʼiil. Wa amsah Alyasaʼ wileed Chaafaat al-min hillit Abil Mahuula achaan yabga nabi fi badalak.
[17] Wa ayyi naadum al-niji min seef Hazayiil, Yaahu yaktulah. Wa ayyi naadum al-niji min seef Yaahu, Alyasaʼ yaktulah.
[18] Wa laakin nikhalli 7 000 naas min Bani Israaʼiil humman al-ma sajado wa la habbo ilaah Baʼal.»
[19] Wa khalaas, Iliyaas gamma min al-bakaan da wa macha ligi Alyasaʼ wileed Chaafaat. Hu gaaʼid yahrit fi zerʼah be 12 harraata wa ayyi harraata yukurruuha tiiraan itneen. Wa Alyasaʼ zaatah gaaʼid yusuug tiiraan al-harraata al-akhiire. Wa Iliyaas garrab leyah wa khatta khalagah foogah.
[20] Wa Alyasaʼ khalla al-tiiraan wa jara wara Iliyaas wa gaal leyah : «Khalliini namchi nihibb abuuyi wa ammi wa baʼad da, nitaabiʼak.» Wa Iliyaas radda leyah wa gaal : «Amchi wa gabbil taʼaal achaan inta taʼarif al-cheyy al-ana sawweetah leek.»
[21] Wa khalaas, Alyasaʼ gabbal min wara Iliyaas wa chaal tiiraanah al-itneen wa dabahaahum wa gaddamaahum dahiiye. Wa be hatab al-harraata di, oogad naar wa rakkab al-laham wa antaah le l-naas al-gaaʼidiin maʼaayah wa humman akalooh. Wa baʼad da, hu taabaʼah le Iliyaas wa bigi khaddaamah.