[1] Fi sanit 18 hana hukum Yarubaʼaam wileed Nabaat, Abiiya bigi malik fi mamlakat Yahuuza.
[2] Wa hu hakam talaata sana fi Madiinat al-Khudus. Wa ammah usumha Maʼaaka bineeyit Abichaluum.
[3] Wa Abiiya sawwa kulla l-zunuub al-awwal abuuh sawwaahum wa galbah ma mukhlis le Allah Ilaahah misil galib jiddah Dawuud.
[4] Wa laakin fi chaan Dawuud, Allah Ilaahah khatta naadum waahid min zurriiytah fi l-muluk fi Madiinat al-Khudus. Wa da achaan Madiinat al-Khudus kula tagood
[5] wa achaan Dawuud sawwa al-adiil giddaam Allah. Wa fi kulla muddit hayaatah, hu ma khaalaf amur Allah illa fi muchkilat Uriiya al-Hitti.
[6] Wa kaan harib ambeen aayilat Rahabʼaam wa aayilat Yarubaʼaam. Wa l-harba di gaaʼide daayman fi kulla muddit hayaat Abiiya.
[7] Wa l-baagi min amal Abiiya wa kulla cheyy al-sawwaah maktuubiin fi kitaab taariikh muluuk Bani Yahuuza. Wa kaan harib ambeen Abiiya wa Yarubaʼaam.
[8] Wa Abiiya maat wa lihig abbahaatah wa dafanooh fi madiinat Dawuud. Wa wileedah Aasa hakam fi badalah.
[9] Wa fi sanit 20 hana hukum Yarubaʼaam malik mamlakat Israaʼiil, Aasa kula bigi malik fi mamlakat Yahuuza.
[10] Wa Aasa hakam 41 sana fi Madiinat al-Khudus. Wa jidditah usumha Maʼaaka bineeyit Abichaluum.
[11] Wa Aasa sawwa al-adiil giddaam Allah misil jiddah Dawuud.
[12] Wa tarad min al-balad al-naas al-yichcharmato fi bakaan al-ibaada wa dammar kulla l-asnaam al-abbahaatah sanaʼoohum.
[13] Wa l-malik Aasa marag hatta jidditah Maʼaaka min darajatha hana l-meeram achaan hi sanaʼat sanam muharram le l-ilaaha Achiira. Wa Aasa kassar al-sanam al-muharram da wa harragah fi waadi Khidruun.
[14] Wa laakin be da kula, al-bakaanaat al-aaliyiin hana ibaadat al-asnaam gaaʼidiin. Wa fi kulla muddit hayaatah, Aasa gaaʼid yitaabiʼ Allah be galib mukhlis.
[15] Wa hu jaab fi beet Allah al-fudda wa l-dahab wa l-muʼiddaat al-abuuh wa hu zaatah khassasoohum.
[16] Wa kaan harib ambeen Aasa wa Baʼaacha malik mamlakat Israaʼiil fi kulla muddit hayaathum.
[17] Wa Baʼaacha malik mamlakat Israaʼiil gamma yihaarib mamlakat Yahuuza. Wa gawwa hillit al-Raama le yadhar al-derib le Aasa malik mamlakat Yahuuza wa naasah ma yamurgu wa la yadkhulu be l-derib da.
[18] Wa khalaas, Aasa chaal kulla l-fudda wa l-dahab al-gaaʼidiin fi makhaazin hana beet Allah wa kulla l-maal hana gasir al-malik wa antaah le masaaʼiilah. Wa rassalaahum le Banhadaad wileed Tabrimuun wileed Hazyuun malik balad Araam al-gaaʼid fi madiinat Dimachkh. Wa rassal leyah wa gaal :
[19] «Khalli nisawwu alaakha beeni wa beenak misil al-alaakha al-bigat ambeen abuuyi wa abuuk. Daahu nirassil leek hadiiye hana fudda wa dahab wa natlub minnak tagtaʼ alaakhtak maʼa Baʼaacha malik mamlakat Israaʼiil. Wa be da, yiwaggif al-harba al-gamma beeha diddi.»
[20] Wa Banhadaad khassad be kalaam al-malik Aasa. Wa khalaas, hu rassal khuyyaad askarah wa hajamo hillaal mamlakat Israaʼiil wa chaalo Iyuun wa Daan wa Abil Beet Maʼaaka wa kulla mantagat al-Jaliil wa kulla ard gabiilat Naftaali.
[21] Wa min Baʼaacha simiʼ be l-khabar da, khalla minnah gawiyiin hillit al-Raama wa sakan fi hillit Tirsa.
[22] Wa khalaas fi l-bakaan da, al-malik Aasa lamma kulla naas mamlakat Yahuuza, wa ma khalla naadum waahid kula, le yangulu al-hajar wa l-hatab al-Baʼaacha lammaahum le yigawwi beehum hillit al-Raama. Wa hu astaʼmal al-hajar wa l-hatab dool le yigawwi hillit Gabaʼ Banyaamiin wa hillit Misfa.
[23] Wa l-baagi min amal Aasa wa kulla faraasiiytah wa kulla cheyy al-sawwaah wa l-hillaal al-banaahum, kulla l-cheyy da maktuub fi kutub taariikh muluuk Bani Yahuuza. Wa laakin wakit Aasa chayyab, wajaʼ rijle karabah.
[24] Wa Aasa maat wa lihig abbahaatah wa dafanooh fi khabur juduudah fi madiinat Dawuud jiddah. Wa wileedah Yahuuchafat hakam fi badalah.
[25] Wa Nadaab wileed Yarubaʼaam bigi malik fi mamlakat Israaʼiil fi l-sana al-taaniye hana hukum Aasa. Wa hu hakam santeen fi Bani Israaʼiil.
[26] Wa Nadaab sawwa al-fasaala giddaam Allah. Hu taabaʼ derib abuuh al-lazza naas mamlakat Israaʼiil fi l-zunuub.
[27] Wa Baʼaacha wileed Akhiiya al-min gabiilat Yassaakar atmarrad didd al-malik. Al-malik Nadaab maʼa kulla askar mamlakat Israaʼiil macho haasaro hillit Gibbatuun al-fi iid al-Filistiyiin, fi l-wakit da bas Baʼaacha katalah le Nadaab.
[28] Baʼaacha katalah le Nadaab fi l-sana al-taalta hana hukum Aasa malik mamlakat Yahuuza. Wa Baʼaacha hakam fi badal Nadaab.
[29] Wa min hu bigi malik, dammar kulla aayilat Yarubaʼaam. Ma khalla naadum waahid kula min aayiltah. Wa da bigi misil kalaam Allah al-gaalah be waasitat abdah Akhiiya al-min hillit Chiilooh.
[30] Wa kulla l-cheyy da bigi achaan al-zunuub al-Yarubaʼaam sawwaahum. Wa lazza naas mamlakat Israaʼiil fi l-zunuub wa khaddabo Allah Ilaah Bani Israaʼiil.
[31] Wa l-baagi min amal Nadaab wa kulla cheyy al-sawwaah maktuubiin fi kitaab taariikh muluuk Bani Israaʼiil.
[32] Wa kaan harib ambeen Aasa wa Baʼaacha malik mamlakat Israaʼiil fi kulla muddit hayaathum.
[33] Wa fi l-sana al-taalta hana hukum Aasa malik mamlakat Yahuuza, Baʼaacha wileed Akhiiya bigi malik fi kulla mamlakat Israaʼiil fi hillit Tirsa. Wa hu hakam 24 sana.
[34] Wa Baʼaacha sawwa al-fasaala giddaam Allah. Hu taabaʼ derib Yarubaʼaam al-lazza naas mamlakat Israaʼiil fi l-zunuub.