[1] وَ مُوسَى قَاعِدْ يَسْرَحْ بِغَنَمْ هَنَا نَسِيبَهْ يَسْرُونْ وَ هُو بَسْ رَاجِلْ الدِّينْ هَنَا بَلَدْ مِدْيَانْ. وَ يَوْم وَاحِدْ، مُوسَى سَاقْ الْغَنَمْ غَادِي لِلصَّحَرَاء وَ وِصِلْ فِي جَبَلْ اللّٰهْ الْأُسْمَهْ حُورِيبْ.
[2] وَ فِي الْبَكَانْ دَا، مَلَكْ اللّٰهْ بَانْ لَيَّهْ فِي نَارْ فِي لُبّ شِدَيْرَةْ. وَ مُوسَى شَافْ وَ دَاهُو، نَارْ قَمَّتْ فَوْق الشِّدَيْرَةْ دِي لَاكِنْ هِي مَا قَاعِدَةْ تَحْرَقْ.
[3] وَ مُوسَى قَالْ: «خَلِّي نَمْشِي نِشِيفْ الشَّيّءْ الْعَجِيبْ دَا. مَالَا الشِّدَيْرَةْ دِي مَا حِرْقَتْ؟»
[4] وَكِتْ اللّٰهْ شَافْ مُوسَى قَاعِدْ يِحَوِّقْ لِيِشِيفْ الشَّيّءْ دَا، خَلَاصْ هُو نَادَى مُوسَى مِنْ لُبّ الشِّدَيْرَةْ وَ قَالْ لَيَّهْ: «يَا مُوسَى، يَا مُوسَى!» وَ مُوسَى قَالْ: «نَعَمْ.»
[5] وَ هُو قَالْ لَيَّهْ: «مَا تَجِي قَرِيبْ. سِلّ نِعْلَيْك مِنْ رِجِلَيْنَكْ أَشَانْ الْبَكَانْ الْإِنْتَ وَاقِفْ فَوْقَهْ دَا أَرْض مُقَدَّسَةْ.
[6] أَنَا رَبّ أَبُوكْ وَ رَبّ جُدُودَكْ إِبْرَاهِيمْ وَ إِسْحَاقْ وَ يَعْقُوبْ.» وَ خَلَاصْ، مُوسَى سَدَّ وِجْهَهْ أَشَانْ هُو خَايِفْ مَا يَقْدَرْ يِشِيفْ الرَّبّ.
[7] وَ اللّٰهْ قَالْ بَتَّانْ: «أَنَا شِفْت تَمَامْ التَّعَبْ هَنَا شَعَبِي الْقَاعِدِينْ فِي مَصِرْ. وَ سِمِعْت صِرَاخْهُمْ قِدَّامْ النَّاسْ الْقَاعِدِينْ يِتَعُّبُوهُمْ. وَ حَسَّيْت بِعَذَابْهُمْ.
[8] أَشَانْ دَا، أَنَا جِيتْ لِنِنَجِّيهُمْ مِنْ إِيدْ الْمَصْرِيِّينْ وَ نِوَدِّيهُمْ فِي بَلَدْ آخَرَةْ وَ هِي سَمْحَةْ وَ وَسِيعَةْ. وَ الْبَلَدْ دِي مَلَانَةْ بِاللَّبَنْ وَ الْعَسَلْ. وَ هَسَّعْ، النَّاسْ السَّاكْنِينْ فَوْقهَا هُمَّنْ الْكَنْعَانِيِّينْ وَ الْحِتِّيِّينْ وَ الْأَمُورِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ.
[9] وَ دَاهُو صِرَاخْ بَنِي إِسْرَائِيلْ وِصِلَانِي. وَ شِفْت الْمَصْرِيِّينْ قَاعِدِينْ يَظُلْمُوهُمْ.
[10] أَشَانْ دَا، يَا مُوسَى! نِرَسِّلَكْ هَسَّعْ لِفِرْعَوْن مَلِكْ مَصِرْ. أَمْشِي وَ أَمْرُقْ شَعَبِي بَنِي إِسْرَائِيلْ مِنْ مَصِرْ!»
[11] وَ مُوسَى قَالْ لِلرَّبّ: «أَنَا كَيْ يَاتُو لَحَدِّي نَمْشِي لِلْمَلِكْ فِرْعَوْن وَ نَمْرُقْ بَنِي إِسْرَائِيلْ مِنْ مَصِرْ؟»
[12] وَ الرَّبّ قَالْ: «أَنَا نُكُونْ مَعَاكْ وَ دِي هِي الْعَلَامَةْ التِّوَصِّفْ لَيْك كَدَرْ أَنَا بَسْ رَسَّلْتَكْ. وَ وَكِتْ إِنْتَ تَمْرُقْ بَنِي إِسْرَائِيلْ مِنْ مَصِرْ، إِنْتُو كُلُّكُو تَجُوا تَعَبُدُونِي فِي الْجَبَلْ دَا.»
[13] وَ مُوسَى رَدَّ لِلرَّبّ وَ قَالْ: «تَمَامْ، أَنَا نَمْشِي لِبَنِي إِسْرَائِيلْ وَ نُقُولْ لَيْهُمْ: ‹اللّٰهْ رَبّ جُدُودْكُو رَسَّلَانِي لَيْكُو.› وَ لَاكِنْ هُمَّنْ يَسْأَلَوْنِي مِنْ أُسْمَكْ. وَ كَنْ سَأَلَوْنِي مِنْ أُسْمَكْ دَا، نُقُولْ لَيْهُمْ أُسْمَكْ يَاتُو؟»
[14] وَ الرَّبّ قَالْ لَيَّهْ: «أَنَا بَسْ هُو، مَعَنَاتَهْ أَنَا اللّٰهْ الدَّايِمْ. مِثِلْ دَا بَسْ تُرُدّ لِبَنِي إِسْرَائِيلْ. تُقُولْ: ‹اللّٰهْ الدَّايِمْ بَسْ رَسَّلَانِي لَيْكُو.›»
[15] وَ الرَّبّ قَالْ لَيَّهْ بَتَّانْ: «قُولْ مِثِلْ دَا لِبَنِي إِسْرَائِيلْ: ‹اللّٰهْ رَبّ جُدُودْكُو إِبْرَاهِيمْ وَ إِسْحَاقْ وَ يَعْقُوبْ رَسَّلَانِي لَيْكُو.› دَا بَسْ أُسْمِي الدَّايِمْ الْيِنَادُونِي بَيَّهْ مِنْ ذُرِّيَّةْ لِذُرِّيَّةْ.
[16] «هَسَّعْ دَا، يَا مُوسَى، أَمْشِي لِكُلَّ شُيُوخْ بَنِي إِسْرَائِيلْ وَ قُولْ لَيْهُمْ: ‹اللّٰهْ رَبّ جُدُودْكُو إِبْرَاهِيمْ وَ إِسْحَاقْ وَ يَعْقُوبْ بَانْ لَيِّ وَ قَالْ هُو شَافَاكُو وَ شَافْ الشَّيّءْ الْقَاعِدِينْ يِسَوُّوهْ لَيْكُو فِي مَصِرْ.
[17] وَ قَالْ يَمْرُقْكُو مِنْ مَصِرْ الْبَكَانْ الْقَاعِدِينْ تَتْعَبَوْا فَوْقَهْ. وَ يِوَدِّيكُو فِي بَلَدْ الْكَنْعَانِيِّينْ وَ الْحِتِّيِّينْ وَ الْأَمُورِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ فِي الْبَلَدْ الْمَلَانَةْ بِاللَّبَنْ وَ الْعَسَلْ.›
[18] «وَ شُيُوخْ بَنِي إِسْرَائِيلْ يَسْمَعَوْا كَلَامَكْ وَ تَمْشِي مَعَاهُمْ فِي بَكَانْ مَلِكْ مَصِرْ. وَ تُقُولُوا لَيَّهْ: ‹اللّٰهْ رَبّ الْعِبْرَانِيِّينْ بَانْ لَيْنَا. وَ هَسَّعْ دَا، خَلِّينَا نَمْشُوا مَسَافَةْ تَلَاتَةْ يَوْم فِي الصَّحَرَاء لِنِقَدُّمُوا ضَحَايَا لِلّٰهْ إِلٰـهْنَا.›
[19] وَ لَاكِنْ أَنَا نَعَرِفْ كَدَرْ الْمَلِكْ مَا يِخَلِّيكُو تَمْشُوا إِلَّا كَنْ أَنَا عَصَّرْتَهْ شَدِيدْ.
[20] وَ خَلَاصْ، نِمِدّ إِيدِي وَ نَضْرُبْ بَلَدْ مَصِرْ بِكُلَّ الْعَجَايِبْ النِّنَزِّلْهُمْ فَوْقهَا. وَ بَعَدْ دَا، الْمَلِكْ يِخَلِّيكُو تَمُرْقُوا.
[21] وَ نِسَوِّيكُو إِنْتُو شَعَبِي تَلْقَوْا رِضَى الْمَصْرِيِّينْ وَ مَا تَمْشُوا إِيدَيْكُو يَابْسِينْ.
[22] فِي الْيَوْم دَا، أَيِّ مَرَةْ مِنْ بَنِي إِسْرَائِيلْ تَسْأَلْ مَرَةْ مَصْرِيَّةْ السَّاكْنَةْ مَعَاهَا أَوْ جَارِتْهَا تَنْطِيهَا خُمَامْ هَنَا فُضَّةْ وَ دَهَبْ وَ خُلْقَانْ التِّلَبُّسُوهُمْ لِعِيَالْكُو. وَ بَيْدَا، تَنْهَبَوْا الْمَصْرِيِّينْ مَرَّةْ وَاحِدْ.»