[1] «‹وَ سَوِّي الْخَيْمَةْ بِعَشَرَةْ قِطْعَةْ مِنْ قُمَاشْ هَنَا كَتَّانْ مُخَيَّطْ عَدِيلْ اللَّوْنَهْ ظَهْرِي وَ قَرَضِي وَ أَحْمَرْ. وَ خَيِّطْ فِي الْقِطَعْ دَوْل صُوَرْ مَخْلُوقِينْ سَمَاوِيِّينْ بِخِيَاطَةْ خَيَّاطِي مَعْرُوفْ.
[2] وَ طُولْ الْقِطَعْ دَوْل يُكُونْ سَوَا سَوَا. أَيِّ وَاحِدَةْ تُكُونْ عِنْدَهَا 28 دُرَاعْ وَ عُرْضَهَا 4 دُرَاعْ.
[3] وَ الْقِطَعْ دَوْل، خَمْسَةْ يِلِمُّوهُمْ سَوَا فِي مَجْمُوعَةْ وَاحِدَةْ وَ الْخَمْسَةْ الْآخَرِينْ كُلَ يِلِمُّوهُمْ سَوَا.
[4] وَ كَشْكِشْ طَرَفْ الْخَمْسَةْ بِقُمَاشْ ظَهْرِي وَ طَرَفْ الْخَمْسَةْ الْآخَرِينْ كُلَ كَشْكِشَهْ بِنَفْس الْقُمَاشْ.
[5] سَوِّي 50 مَنَاخِرْ فِي الْمَجْمُوعَةْ الْأَوَّلْ وَ 50 مَنَاخِرْ فِي الْمَجْمُوعَةْ التَّانِيَةْ. وَ الْمَنَاخِرْ دَوْل يُكُونُوا مُلْقَابِلِينْ.
[6] وَ سَوِّي 50 فَنْقَرْ هَنَا دَهَبْ وَ أَشْبِكْ بَيَّهْ الْمَنَاخِرْ كُلِّ وَاحِدَةْ مَعَ الْآخَرَةْ. وَ بَيْدَا، الْمَجْمُوعْتَيْن يَبْقَوْا خَيْمَةْ وَاحِدَةْ.
[7] «‹وَ سَوِّي الْغِطَاءْ الْأَوَّلْ مِنْ 11 قِطْعَةْ مَتْرُورِينْ بِصُوفْ عِنْزَيْ. وَ خُطَّهْ بِفَوْق لِلْخَيْمَةْ.
[8] وَ طُولْ الْقِطَعْ دَوْل يُكُونُوا سَوَا سَوَا. وَ طُولْ الْوَاحِدَةْ 30 دُرَاعْ وَ عُرْضَهَا 4 دُرَاعْ.
[9] وَ الْقِطَعْ دَوْل، خَمْسَةْ يِلِمُّوهُمْ سَوَا وَ السِّتَّةْ الْآخَرِينْ كُلَ يِلِمُّوهُمْ سَوَا. وَ الْقِطْعَةْ السَّادْسَةْ دِي تَطْبُقْهَا فَوْق خَشُمْ الْخَيْمَةْ.
[10] وَ سَوِّي 50 مَنَاخِرْ فِي نُصّ كُلِّ وَاحِدَةْ مِنْ الْمَجْمُوعْتَيْن.
[11] وَ سَوِّي 50 فَنْقَرْ مِنْ نَحَاسْ وَ أَشْبِكْ بَيَّهْ الْمَنَاخِرْ كُلِّ وَاحِدَةْ مَعَ الْآخَرَةْ. وَ بَيْدَا، الْمَجْمُوعْتَيْن يَبْقَوْا غِطَاءْ وَاحِدْ.
[12] وَ الْغِطَاءْ دَا، نُصَّهْ الْفَايِتْ فِي الطُّولْ، دَلِّيهْ بِوَرَاءْ لِلْخَيْمَةْ.
[13] وَ نُصَّهْ الْفَايِتْ فِي الْعُرْض، دَلِّيهْ فِي نُصّ الْخَيْمَةْ بِدُرَاعْ. وَ بِالنُّصّ الْآخَرْ هَنَا الْخَيْمَةْ كُلَ، دَلِّيهْ بِدُرَاعْ. وَ بَيْدَا، الْغِطَاءْ يِغَطِّي الْخَيْمَةْ مَرَّةْ وَاحِدْ.
[14] «‹وَ سَوِّي الْغِطَاءْ التَّانِي بِفِرَاوْ كُبَاشْ مَدْبُوغِينْ وَ مُلَوَّنِينْ بِلَوْن أَحْمَرْ. وَ الْغِطَاءْ التَّالِتْ دَا، سَوِّيهْ بِفِرَاوْ عِجِلْ الْبَحَرْ.
[15] «‹غُزّ خَشَبْ السُّنْط وَ رُصَّهْ لِتَبْنِي بَيَّهْ خَيْمَةْ الْعِبَادَةْ.
[16] أَيِّ وَاحِدْ مِنْ الْخَشَبْ دَا طُولَهْ يُكُونْ 10 دُرَاعْ وَ عُرْضَهْ يُكُونْ دُرَاعْ وَ نُصّ.
[17] لِأَيِّ خَشَبَةْ سَوِّي رِجْلَيْ إِتْنَيْن الْيَقْدَرَوْا يِثَبُّتُوهَا مَعَ الْآخَرِينْ. كُلَّ الْخَشَبْ دَا سَوِّيهْ مِثِلْ دَا.
[18] وَ عَدِّلْ 20 خَشَبْ فِي النُّصّ الْجُنُوبِي هَنَا الْخَيْمَةْ.
[19] وَ سَوِّي 40 أَسَاسْ هَنَا فُضَّةْ مِنْ تِحِتْ لِلْعِشْرِينْ خَشَبْ. لِكُلِّ خَشَبَةْ وَاحِدَةْ، سَوِّي أَسَاسْ إِتْنَيْن تِحِتْ رِجِلَيْنهَا الْإِتْنَيْن.
[20] وَ 20 خَشَبْ يُكُونُوا فِي النُّصّ الْمُنْشَاقِي هَنَا الْخَيْمَةْ.
[21] وَ دَوْل كُلَ، سَوِّي لَيْهُمْ 40 أَسَاسْ هَنَا فُضَّةْ مِنْ تِحِتْ. لِكُلِّ خَشَبَةْ وَاحِدَةْ سَوِّي أَسَاسْ إِتْنَيْن تِحِتْ رِجِلَيْنهَا الْإِتْنَيْن.
[22] وَ 6 خَشَبْ يُكُونُوا فِي النُّصّ الْوَرَّانِي هَنَا الْخَيْمَةْ الْمُقَابِلْ الْغَرِبْ.
[23] وَ سَوِّي خَشَبْ إِتْنَيْن لِلْكَوْنجَاتْ الْوَرَاءْ.
[24] وَ الْخَشَبْ الْإِتْنَيْن دَوْل مُلَصَّقِينْ مِنْ تِحِتْ لَحَدِّي فَوْق. وَ بِفَوْق، يِثَبُّتُوهُمْ بِخَاتِمْ. وَ دَا يَبْقَى فِي الْكَوْنجَاتْ الْإِتْنَيْن الْقَاعِدِينْ بِوَرَاءْ.
[25] وَ بَيْدَا، يُكُونْ 8 خَشَبْ وَ عِنْدُهُمْ 16 أَسَاسْ هَنَا فُضَّةْ. وَ تِحِتْ كُلِّ خَشَبَةْ، فِي أَسَاسْ إِتْنَيْن.
[26] «‹وَ سَوِّي 5 مَرَادِيسْ مِنْ خَشَبْ السُّنْط لِلنُّصّ الْجُنُوبِي.
[27] وَ سَوِّي 5 آخَرِينْ لِلنُّصّ الْمُنْشَاقِي هَنَا الْخَيْمَةْ. وَ بَتَّانْ سَوِّي 5 لِنُصَّهَا الْوَرَّانِي الْمُقَابِلْ الْغَرِبْ.
[28] وَ الْمُرْدَاسْ الْأُسْطَانِي الطَّوِيلْ الْقَاعِدْ فِي قِسْمَةْ الْخَشَبْ يَمْشِي مِنْ طَرَفْهَا لِطَرَفْهَا.
[29] وَ أَمْسَحْ كُلَّ الْخَشَبْ دَا بِدَهَبْ وَ أَصْنَعْ خَوَاتِمْ هَنَا دَهَبْ التِّدِسّ فَوْقهُمْ الْمَرَادِيسْ. وَ أَمْسَحْ الْمَرَادِيسْ كُلَ بِدَهَبْ.
[30] «‹وَ سَوِّي الْخَيْمَةْ دِي حَسَبْ النِّظَامْ الْأَنَا وَصَّفْتَهْ لَيْك فِي الْجَبَلْ دَا.
[31] «‹وَ سَوِّي سِتَارْ مِنْ قُمَاشْ هَنَا كَتَّانْ مُخَيَّطْ عَدِيلْ اللَّوْنَهْ ظَهْرِي وَ قَرَضِي وَ أَحْمَرْ. وَ خَيِّطْ فَوْقَهْ صُوَرْ مَخْلُوقِينْ سَمَاوِيِّينْ بِخِيَاطَةْ خَيَّاطِي مَعْرُوفْ.
[32] وَ تِعَلِّقَهْ فِي مَنَاخِرْ هَنَا دَهَبْ الْقَاعِدِينْ فِي أَرْبَعَةْ عَمُودْ مِنْ حَطَبْ السُّنْط الْمَمْسُوحِينْ بِدَهَبْ. وَ الْعَمَدْ دَوْل مُثَبَّتِينْ فِي أَرْبَعَةْ أَسَاسْ هَنَا فُضَّةْ.
[33] وَ عَلِّقْ السِّتَارْ دَا بِفَنْقَرْ وَ خُطّ الصَّنْدُوقْ الْفَوْقَهْ لِيحَانْ الْمُعَاهَدَةْ غَادِي لِلسِّتَارْ. وَ بَيْدَا، السِّتَارْ يَفْصُلْ بَيْن الْبَكَانْ الْمُقَدَّسْ وَ الْبَكَانْ الْمُقَدَّسْ مَرَّةْ وَاحِدْ.
[34] «‹وَ سِدّ الصَّنْدُوقْ دَا بِسِدَادْتَهْ وَ خُطَّهْ فِي الْبَكَانْ الْمُقَدَّسْ مَرَّةْ وَاحِدْ.
[35] وَ بَرَّا مِنْ السِّتَارْ فِي الْبَكَانْ الْمُقَدَّسْ، خُطّ الطَّرَبَيْزَةْ فِي النُّصّ الْمُنْشَاقِي هَنَا الْخَيْمَةْ وَ خُطّ الْفَانُوسْ مُقَابِلْهَا فِي النُّصّ الْجُنُوبِي.
[36] «‹وَ سَوِّي سِتَارْ لِبَابْ الْخَيْمَةْ مِنْ قُمَاشْ هَنَا كَتَّانْ مُخَيَّطْ عَدِيلْ اللَّوْنَهْ ظَهْرِي وَ قَرَضِي وَ أَحْمَرْ. وَ دَا بِخِيَاطَةْ خَيَّاطِي مَعْرُوفْ.
[37] وَ لِلسِّتَارْ سَوِّي لَيَّهْ خَمْسَةْ عَمُودْ هَنَا حَطَبْ السُّنْط الْمَمْسُوحِينْ بِدَهَبْ. وَ سَوِّي لَيْهُمْ مَنَاخِرْ هَنَا دَهَبْ وَ لِلْعَمَدْ دَوْل سَوِّي لَيْهُمْ خَمْسَةْ أَسَاسْ مِنْ نَحَاسْ.