[1] وَ إِنْتُو مَا حَاوْجَانِينْ أَنِحْنَ نَكْتُبُوا لَيْكُو شَيْء فِي الْأَوْكَاتْ وَ الْأَيَّامْ الْجَايِينْ.
[2] أَشَانْ إِنْتُو ذَاتْكُو تَعَرْفُوا عَدِيلْ كَدَرْ يَوْم الرَّبّ يَجِي بِغَفْلَةْ مِثِلْ جَيَّةْ السَّرَّاقْ بِاللَّيْل.
[3] وَكِتْ النَّاسْ قَاعِدِينْ يُقُولُوا «عِنْدِنَا الصِّحَّةْ وَ السَّلَامْ»، فِي الْوَكِتْ الْمِثِلْ دَا بَسْ، الْهَلَاكْ يَضْرُبْهُمْ عَجَلَةْ كَيْ مِثِلْ الطَّلَقَةْ تَجِي عَجَلَةْ لِلْمَرَةْ الْغَلْبَانَةْ. مَا مُمْكِنْ يَنْبَلُصُوا.
[4] وَ لَاكِنْ يَا أَخْوَانَّا، إِنْتُو مَا قَاعِدِينْ فِي الضَّلَامْ مِثِلْهُمْ. وَ الْيَوْم دَا مَا يَجِي فَوْقكُو إِنْتُو بِغَفْلَةْ مِثِلْ جَيَّةْ السَّرَّاقْ
[5] أَشَانْ إِنْتُو كُلُّكُو عِيَالْ النُّورْ وَ نَاسْ هَنَا النَّهَارْ. أَيْوَى، أَنِحْنَ مَا نَاسْ هَنَا اللَّيْل وَ لَا الضَّلَامْ.
[6] أَشَانْ دَا، خَلِّي مَا نَبْقَوْا مِثِلْ النَّاسْ الْآخَرِينْ. هُمَّنْ مِثِلْ نَاسْ نَايْمِينْ أَشَانْ مَا بَعَرْفُوا الشَّيْء الْيَجِي فَوْقهُمْ. خَلِّي نَقْعُدُوا وَاعِيِين وَ نُخُطُّوا بَالْنَا.
[7] أَشَانْ فِي اللَّيْل النَّاسْ يُنُومُوا وَ فِي اللَّيْل السَّكَّارَةْ يَسْكَرَوْا.
[8] وَ لَاكِنْ أَنِحْنَ نَاسْ هَنَا النَّهَارْ وَ أَشَانْ دَا، خَلِّينَا نُخُطُّوا بَالْنَا. خَلِّي الْإِيمَانْ وَ الْمَحَبَّةْ يَبْقَوْا لَيْنَا مِثِلْ خَلَقْنَا هَنَا الْحَرْب. وَ خَلِّي الْعَشَمْ الْعِنْدِنَا فِي رَبِّنَا الْيِنَجِّينَا يَبْقَى طَاقِيِّتْنَا.
[9] أَشَانْ اللّٰهْ مَا قَدَّرْ لَيْنَا عَذَابْ. لَا. هُو قَدَّرْ لَيْنَا النَّجَاةْ بِرَبِّنَا عِيسَى الْمَسِيحْ.
[10] الْمَسِيحْ مَاتْ فِي شَانَّا وَ أَشَانْ دَا، نِعِيشُوا مَعَايَهْ سَوَا، كَانْ أَنِحْنَ حَيِّينْ فِي يَوْم جَيِّتَهْ وَلَّا كَانْ أَنِحْنَ مَيْتِينْ كُلَ.
[11] وَ خَلَاصْ بِالْكَلَامْ دَا، أَشَّاجَعَوْا أَمْبَيْنَاتْكُو وَ أَسَّاعَدَوْا فِي إِيمَانْكُو بِزِيَادَةْ مِثِلْ إِنْتُو قَاعِدِينْ تِسَوُّوهْ.
[12] يَا أَخْوَانَّا، نَطْلْبُوا مِنْكُو تِكَرُّمُوا النَّاسْ الْقَاعِدِينْ يَخْدُمُوا مَعَاكُو الْعِنْدُهُمْ فَوْقكُو مَسْؤُولِيَّةْ وَ يُقُودُوكُو فِي دَرِبْ الرَّبّ.
[13] حِبُّوهُمْ بِمَحَبَّةْ شَدِيدَةْ بِسَبَبْ خِدْمِتْهُمْ. وَ أَقْعُدُوا بِسَلَامْ أَمْبَيْنَاتْكُو.
[14] يَا أَخْوَانَّا، أَسْمَعَوْا وَصَايَانَا. حَذُّرُوا الْعَاطِلِينْ وَ ثَبُّتُوا الْخَوَّافِينْ وَ سَاعُدُوا الضَّعِيفِينْ. و أَصْبُرُوا مَعَ كُلَّ النَّاسْ.
[15] أَنْقَرْعُوا نَادُمْ مِنْكُو مَا يِسَوِّي شُغُلْ فَسِلْ لِلنَّاسْ السَّوَّوْا لَيَّهْ شُغُلْ فَسِلْ. شِيلُوا نِيَّةْ أَشَانْ تِسَوُّوا دَايْماً الْخَيْر أَمْبَيْنَاتْكُو وَ لِكُلَّ النَّاسْ.
[16] أَفْرَحَوْا دَايْماً
[17] وَ مَا تَكْسَلَوْا مِنْ الصَّلَاةْ
[18] وَ أَشْكُرُوا اللّٰهْ فِي كُلِّ حَالْ. دَا بَسْ الشَّيْء الْاللّٰهْ يِدَوْرَهْ لَيْكُو فِي دَرِبْ عِيسَى الْمَسِيحْ.
[19] وَ مَا تَكْتُلُوا نُورْ هَنَا الرُّوحْ الْقُدُّوسْ.
[20] مَا تِكَدُّبُوا كَلَامْ اللّٰهْ الْيَنْزِلْ لَيْكُو بِخُشُومْ أَخْوَانْكُو.
[21] جَرُّبُوا كُلَّ شَيْء. الشَّيْء الزَّيْن أَكُرْبُوه قَوِي.
[22] أَنْقَرْعُوا مِنْ أَيِّ شَيْء فَسِلْ.
[23] خَلِّي اللّٰهْ رَبّ السَّلَامْ ذَاتَهْ يِطَهِّرْ قُلُوبْكُو مَرَّةْ وَاحِدْ وَ يَحْفَضْكُو سَالِمِينْ فِي الرُّوحْ وَ النَّفْس وَ الْجِسِمْ أَشَانْ تُكُونُوا طَاهِرِينْ تَمَامْ فِي يَوْم جَيَّةْ رَبِّنَا عِيسَى الْمَسِيحْ.
[24] النَّادَاكُو فِي دَرْبَهْ، هُو صَادِقْ. وَ أَكِيدْ كُلَّ شَيْء دَا، هُو يِسَوِّيهْ.
[25] يَا أَخْوَانَّا، أَسْأَلَوْا اللّٰهْ لَيْنَا أَنِحْنَ كُلَ.
[26] سَلُّمُوا كُلَّ الْأَخْوَانْ بِسَلَامْ الصَّالِحِينْ.
[27] بِأُسُمْ الرَّبّ نَامُرْكُو أَشَانْ تَقْرُوا الْجَوَابْ دَا لِكُلَّ الْأَخْوَانْ.
[28] عَلَيْكُو نِعْمَةْ رَبِّنَا عِيسَى الْمَسِيحْ.