[1] أَيْوَى، أَنِحْنَ قَرْمَانِينْ لَيْكُو. وَ وَكِتْ فَقَدْنَا صَبُرْنَا خَلَاصْ، شِلْنَا نِيَّةْ أَشَانْ نَقْعُدُوا وِحَيْدنَا فِي مَدِينَةْ أَتِينَا.
[2] وَ رَسَّلْنَا لَيْكُو أَخُونَا تِمُوتَاوُسْ الْيَخْدِمْ مَعَانَا سَوَا لِلّٰهْ فِي بَلِّغِينْ بِشَارَةْ الْمَسِيحْ. وَ رَسَّلْنَاهْ لِيِثَبِّتْكُو وَ يِقَوِّي إِيمَانْكُو
[3] أَشَانْ نَادُمْ وَاحِدْ مِنْكُو مَا يِبَرْجِلْ بِسَبَبْ التَّعَبْ الْقَاعِدْ فَوْقكُو. إِنْتُو ذَاتْكُو تَعَرْفُوا كَدَرْ مُقَدَّرْ لَيْنَا النَّاسْ يِتَعُّبُونَا.
[4] وَ وَكِتْ لِسَّاعْنَا مَعَاكُو، قُلْنَا لَيْكُو كَدَرْ التَّعَبْ يَجِي فَوْقنَا كُلِّنَا وَ خَلَاصْ بِقِي مِثِلْ قُلْنَا وَ دَا تَعَرْفُوهْ.
[5] أَشَانْ دَا، وَكِتْ فَقَدْت الصَّبُرْ مَرَّةْ وَاحِدْ، رَسَّلْت لَيْكُو تِمُوتَاوُسْ أَشَانْ نَعَرِفْ كَانْ إِنْتُو ثَابْتِينْ فِي إِيمَانْكُو وَلَّا. وَ فِي الْوَكِتْ دَاكْ، أَنَا قَاعِدْ نِهِمّ لَيْكُو. فِي فِكْرِي، أَكُونْ إِبْلِيسْ أَنَّصَرْ فَوْقكُو وَ التَّعَبْ الْأَنَا تِعِبْتَهْ فَوْقكُو مَشَى فِي الرِّيحْ سَاكِتْ.
[6] لَاكِنْ هَسَّعْ بَسْ تِمُوتَاوُسْ قَبَّلْ مِنْكُو وَ جَابْ لَيْنَا خَبَرْ حَلُو. أَوْرَانَا بِإِيمَانْكُو وَ مَحَبِّتْكُو وَ قَالْ فِكِرْكُو فَوْقنَا دَايْماً فِكِرْ زَيْن وَ إِنْتُو قَرْمَانِينْ لَيْنَا سَوَا مِثِلْ أَنِحْنَ قَرْمَانِينْ لَيْكُو.
[7] وَ بِمِثِلْ دَا يَا أَخْوَانَّا، إِنْتُو شَجَّعْتُونَا بِإِيمَانْكُو وَ رَقَّدْتُوا قُلُوبْنَا فِي أُسُطْ تَعَبْنَا وَ صُعُوبَاتْنَا.
[8] أَوَّلْ الْهَمّ كَتَلَانَا لَاكِنْ مِنْ سِمِعْنَا إِنْتُو ثَابْتِينْ فِي رَبِّنَا، خَلَاصْ الْحَيَاةْ بِقَتْ لَيْنَا حَلْوَةْ بَتَّانْ.
[9] مَا نَعَرْفُوا كِكَّيْف نَشْكُرُوا اللّٰهْ فِي شَانْكُو. فِي شَانْكُو إِنْتُو، نَفْرَحَوْا قِدَّامْ اللّٰهْ بِفَرْحَةْ كَبِيرَةْ بِلْحَيْن.
[10] لَيْل وَ نَهَارْ نَسْأَلَوْا اللّٰهْ بِشِدَّةْ أَشَانْ يِلِمِّنَا بَتَّانْ مَعَاكُو وَ نِزِيدُوا لَيْكُو كُلَّ شَيْء اللِّسَّاعْ مُقَصِّرْ لَيْكُو فِي إِيمَانْكُو.
[11] وَ هَسَّعْ خَلِّي اللّٰهْ أَبُونَا ذَاتَهْ وَ رَبِّنَا عِيسَى يِسَهُّلُوا لَيْنَا الدَّرِبْ أَشَانْ نَجُوكُو.
[12] وَ لَيْكُو إِنْتُو، خَلِّي الرَّبّ يِزِيدْ مَحَبِّتْكُو وَ يِكَتِّرْهَا أَشَانْ تِرَّايَدَوْا أَمْبَيْنَاتْكُو بِزِيَادَةْ وَ تِحِبُّوا كُلَّ النَّاسْ مِثِلْ أَنِحْنَ نِحِبُّوكُو.
[13] وَ خَلِّي الرَّبّ يِثَبِّتْ قُلُوبْكُو أَشَانْ تُكُونُوا صَالِحِينْ وَ بَلَا عَيْب قِدَّامْ أَبُونَا اللّٰهْ فِي الْيَوْم الرَّبِّنَا عِيسَى يَجِي فَوْقَهْ مَعَ جَمَاعْتَهْ الصَّالِحِينْ.