[1] У Иса диса к’әтә к’ьниште. Ль wе дәре мәрьвәк һәбу, кӧ дәсте wи к’ьшийабу.
[2] У ч’ә’ве һьнәка сәр Wи бу, гәло р’ожа шәмийе Әwе wи qәнщ кә йан на, wәки хәйба Wи бькьн.
[3] Иса мәрьве дәстк’ьшийайир’а гот: «Р’абә ве говәке бьсәкьнә!»
[4] Паше wанр’а гот: «Р’ожа шәмийе qәнщикьрьн щайиз ә, йан хьрабикьрьн? Р’ӧһ’әки хьлаз кьн, йан ӧнда кьн?» Ле wан дәнг нәкьр.
[5] Иса бь һерс ль дора Хwә ньһер’и, бона сәрһ’ьшкийа wан бәр Хwә к’әт у wи мәрьвир’а гот: «Дәсте хwә дьреж кә». Әwи жи дьреж кьр у дәсте wи диса qәнщ бу.
[6] Ферьси дәрк’әтьнә дәрва у пер’а-пер’а т’әви Һеродәсийа шеwьрин, кӧ чаwа Wи бьдьнә кӧштьне.
[7] Иса т’әви шагьртед Хwә чу дәве голе. Жь Щәлиле ә’лаләтәкә гьран пәй Wи чу.
[8] Гава кӧ wана кьрьнед Wи бьһистьн, жь Щьһустане, Оршәлиме, Идумәйайе, wи алийе Урдӧнейи р’оһьлате, ӧса жи жь qәза Сур у Сайде гәләк мәрьв һатьнә щәм Wи.
[9] У Иса жь дәст ә’лаләте шагьртед Хwәр’а гот, кӧ Wир’а qәйькәке һазьр кьн, wәки нәк’әвә ль бәр дә’фа.
[10] Чьмки Иса гәләк мәрьв qәнщ кьрьн, ӧса кӧ йед нәхwәш т’опи сәр дьбун, wәки дәсте хwә бьдана Wи.
[11] Дәма кӧ р’ӧһ’ед һ’әрам Әw дьдитьн, ль бәр Wи дәвәр’уйа хwә давитьнә ә’рде, дькьрьнә qир’ин у дьготьн: «Тӧ Кӧр’е Хwәде йи!»
[12] Ле Иса һ’ьшк т’әми ль wан дькьр, кӧ бона Wи нәкьнә дәнги.
[13] Иса һьлк’ьшийа ч’ийе у мәрьвед кӧ Wи дьхwәстьн гази щәм Хwә кьрьн. Әw жи чунә щәм Wи.
[14] Әwи донздәһ мәрьв бьжартьн, навед wан «шанди» дани, кӧ т’әви Wи бьминьн у wан бьшинә, wәки даннасин кьн.
[15] У һ’ӧкӧм да wан кӧ щьна дәрхьн.
[16] Һәр донздәһед бьжарти әв ьн: Шьмһ’ун (кӧ наве wи кьрә Пәтрус),
[17] Аqубе Зәбәди у Йуһ’әннайе бьре wи, (әwи наве Боанәрщәс ль wан кьр, кӧ те фә’мкьрьне: «Кӧр’ед Гӧр’инийа Ә’змен»)
[18] Әндраwьс, Филипо, Бәртоломәйо, Мәтта, Т’ума, Аqубе кӧр’е Һалфаwо, Тәдайо, Шьмһ’уне wәлатп’арьст
[19] у Щьһудайе Исхәрйоти йе кӧ бу нәмаме Иса.
[20] Паше Иса чу маләке. Диса һаqас ә’лаләт щьвийа, һ’әта кӧ нькарьбун нане хwә жи бьхwарана.
[21] Гава йед жь хун у qьнета Wи бьһистьн, дәрк’әтьн Wи бьгьрьн, чьмки wана дьгот: «Әwи һ’ьше Хwә ӧнда кьрийә!»
[22] У әw qанунзанед кӧ жь Оршәлиме бәржер бьбун, дьготьн: «Бәлзәбул Wида һәйә! Әw бь һ’ӧкӧме сәрwере щьна щьна дәрдьхә!»
[23] Иса жи әw гази щәм Хwә кьрьн у бь мәсәла wанр’а гот: «Мирещьн чаwа дькарә хwәха хwә дәрхә?
[24] Һәгәр нав п’адшатикеда т’ьфаq т’ӧнәбә, әw нькарә бьминә.
[25] Мала кӧ бет’ьфаqи бьк’әве, әw мал нькарә бьминә.
[26] Һәгәр мирещьн р’абә һьмбәри хwә у бьбә дӧтирәти, әw нькарә бьминә, ле бәле wе хьлазийа wи бе.
[27] Ле бәле т’ӧ кәс нькарә бьк’әвә мала мерхасәки у һәбука wи т’алан кә, һәгәр пешийе wи мерхаси гьренәдә. Гава гьреда, һьнге wе бькарьбә мала wи т’алан кә.
[28] Әз р’аст wәр’а дьбежьм, һәр гӧнә у һәр готьна хьраб кӧ бежьн wе ль бәндед дьне бенә бахшандьне,
[29] ле к’и кӧ готьнәкә хьраб мьqабьли Р’ӧһ’е Пироз бежә, т’ӧ щар ль wи найе бахшандьне. Әwе бь wи гӧнәйи һ’әта-һ’әтайе сущдар бә».
[30] Иса әв йәк гот, чьмки wан дьгот: «Р’ӧһ’е һ’әрам Wида һәйә».
[31] Һьнге де у бьрайед Иса һатьн, ль дәрва сәкьнин, йәк шандьнә пәй Wи у гази Wи кьрьн.
[32] Ә’лаләта кӧ ль дора Wи р’уньштьбу готә Wи: «Ва дийа Тә у бьрайед Тә дәрва пьрса Тә дькьн».
[33] Иса щаба wан да у гот: «Дийа Мьн у бьрайед Мьн к’и нә?»
[34] Һьнге ль йед дора Хwә р’уньшти ньһер’и у гот: «Ва нә де у бьрайед Мьн!
[35] Һәр кәсе кӧ хwәстьна Хwәде бинә сери, әw ә бьре Мьн, хушка Мьн у дийа Мьн».