[1] Мьзгинийа Иса Мәсиһе Кӧр’е Хwәде бь ви тьһәри дәстпебу:
[2] Чаwа кӧ к’ьтеба Ишайа П’ехәмбәрда һатийә ньвисаре: «Ва йә Әзе qасьде Хwә пешийа Тәва бьшиньм. Әwе бона Тә р’е һазьр кә» .
[3] «Дәнгәк бәр’ийеда дькә гази: ‹Р’ийа Хӧдан һазьр бькьн у шьвәр’ийед Wи р’аст бькьн› ».
[4] Аwа Йуһ’әнна бәр’ийеда хӧйа бу, щьмә’т дьньхӧманд у даннасин дькьр, кӧ жь гӧнәкьрьне вәгәр’ьн у бенә ньхӧмандьне, wәки гӧнед wан бенә бахшандьне.
[5] Жь һ’әму wәлате Щьһустане у т’әмамийа щьмә’та Оршәлиме дьһатә щәм wи, гӧнед хwә дьданә р’уйе хwә у ч’әме Урдӧнеда бь дәсте wи дьньхӧмин.
[6] Йуһ’әнна к’ьнщәкә жь пьр’ч’а дәве ль хwә кьрьбу у ль пьшта хwә жи qайишәкә ч’әрм гьредабу. Хwарьна wи кӧли у һьнгьве чоле бу.
[7] Әwи даннасин дькьр у дьгот: «Йәки жь мьн qәwаттьр wе бе. Әз нә һежа мә, кӧ та бьм у бәне чарьхе Wи жи вәкьм.
[8] Мьн һун бь аве ньхӧмандьн, ле Әwе wә бь Р’ӧһ’е Пироз бьньхӧминә».
[9] У wан р’ожада Иса жь бажаре Ньсрәта Щәлиле һат у бь дәсте Йуһ’әнна ч’әме Урдӧнеда һатә ньхӧмандьне.
[10] Һәма чаwа Иса жь аве дәрк’әт, дит кӧ ә’зман вәбун у Р’ӧһ’ мина кәвоткәке ль сәр Wи дани.
[11] У дәнгәк жь ә’змана һат у гот: «Тӧ Кӧр’е Мьни дәлал и Әз жь Тә р’ази мә».
[12] Wе гаве Р’ӧһ’ бәре Иса да бәр’ийе.
[13] Әw чьл р’ожи ль бәр’ийе ма у жь мирещьн һатә щер’ьбандьне. Әw т’әви р’ә’wьра бу у мьлйак’әта жер’а бәрдәсти кьрьн.
[14] Пәй гьртьна Йуһ’әннар’а Иса чу qәза Щәлиле у дәст бь даннасинийа Мьзгинийа Хwәде кьр
[15] у дьгот: «Wәхт пер’а гьһиштийә, П’адшатийа Хwәде незик буйә, жь гӧнәкьрьне вәгәр’ьн у баwәрийа хwә Мьзгинийе биньн!»
[16] Гава Иса ль дәве гола Щәлиле дьгәр’ийа, р’асти Шьмһ’ун у Әндраwьсе бьре wи һат. Wана т’ор’ давитә голе, чьмки мә’сигьр бун.
[17] Иса готә wан: «Пәй Мьн wәрьн, Әзе wә бькьмә неч’ирванед мәрьва».
[18] Wана жи һәма wе дәме т’ор’ед хwә һьштьн у пәй Wи чун.
[19] Дәма кӧ Иса жь wи щийи һьнәки пешда чу, р’асти кӧр’ед Зәбәди, Аqуб у Йуһ’әннайе бьре wи һат. Wана qәйькеда т’ор’ед хwә һивез дькьрьн.
[20] Һьнге Иса гази wан кьр, wана жи баве хwә Зәбәди т’әви п’ала qәйькеда һьшт у пәй Wи чун.
[21] Әw гьһиштьнә Кәфәрнаһуме. Иса wе р’ожа шәмийе р’аст к’әтә к’ьниште у дәст бь һинкьрьне кьр.
[22] Әwана ль сәр һинкьрьна Wи зәндәгьрти мабун, чьмки Әwи мина йәки хwәйиһ’ӧкӧм әw һин дькьрьн, нә кӧ мина qанунзана.
[23] Һьнге к’ьништа wанда мәрьвәк һәбу, кӧ р’ӧһ’е һ’әрамва гьрти бу. Wи кьрә qир’ин у гот:
[24] «Тӧ чь жь мә дьхwази, йа Исайе Ньсрәте? Тӧ һатийи qьр’а мә бини? Әз заньм Тӧ к’и йи. Тӧ Пирозе Хwәде йи!»
[25] Иса ле һьлат у гот: «Кәр’ бә у же дәрк’әвә!»
[26] Һьнге р’ӧһ’е һ’әрам әw вәч’ьр’ьканд у бь дәнгәки бьльнд кьрә qир’ин у же дәрк’әт.
[27] Һ’әму зәндәгьрти ман, һәвр’а к’әтьнә пьрс-пьрсийара у дьготьн: «Әв чь йәк ә? Чь һинкьрьнәкә ну йә! Бь һ’ӧкӧм Әw ә’мьри ль р’ӧһ’ед һ’әрам дькә у әw жи ельми Wи дьбьн».
[28] У нав у дәнге Иса пер’а-пер’а һ’әму дор-бәред Щәлиле бәла бу.
[29] Гава кӧ Иса жь к’ьниште дәрк’әт, т’әви Аqуб у Йуһ’әнна р’аст чунә мала Шьмһ’ун у Әндраwьс.
[30] Хwәсийа Шьмһ’ун т’айеда п’алдайи бу. Һьнге бона wе Исар’а готьн.
[31] Иса жи чу незик, дәсте wе гьрт р’акьр у т’айе же бәр’да, р’абу бәрдәсти wанр’а кьр.
[32] Еваре, гава р’о чу ава, һ’әму нәхwәш у йед щьнак’әти анинә щәм Wи.
[33] Т’әмамийа щьмә’та бажер ль бәр дери щьвийа.
[34] Иса гәләк мәрьвед бь нәхwәшийед щур’ә-щур’ә qәнщ кьрьн. Гәләк щьн жи дәрхьстьн у нәдьһьшт кӧ щьн хәбәр дьн, чьмки щьна заньбу кӧ Әw К’и йә.
[35] Qәрәбәрбанга сьбәһе р’абу, дәрк’әт чу щики хәwлә у wьр дӧа кьр.
[36] Шьмһ’ун у йед т’әви Wи ль Иса гәр’ийан
[37] у гава кӧ wан Әw дит, готьне: «Һ’әму ль Тә дьгәр’ьн».
[38] Иса wанр’а гот: «Әм һәр’ьнә гӧнд-бажаред незик, wәки Әз ль wан дәра жи даннасин кьм, чьмки Әз бона ве йәке һатьмә».
[39] У ль т’әмамийа Щәлиле дьгәр’ийа, к’ьништед wанда даннасин дькьр у щьн дәрдьхьстьн.
[40] У йәки к’оти һат, ль бәр Иса чок да, р’әща же кьр у готе: «Һәгәр Тӧ бьхwази, дькари мьн паqьж ки».
[41] Гӧне Иса пе һат, дәсте Хwә дьреж кьр ле к’әт у готе: «Әз дьхwазьм. Паqьж бә!»
[42] У пәй ве готьнер’а дәстхwәда к’отибун же чу у әw паqьж бу.
[43] Иса пер’а-пер’а әw дәрхьстә дәр, һ’ьшк т’әми ль wи кьр
[44] у wир’а гот: «Бьньһер’ә т’ӧ кәсир’а тьштәки нәбежи, ле һәр’ә хwә нишани к’аһин кә у чаwа кӧ Муса т’әми дайә, һ’әдийа хwә бьдә, wәки һ’әмуйар’а бьбә шә’дәти, кӧ тӧ паqьж буйи».
[45] Ле әw мәрьв дәрк’әт дәстпекьр ашкәрә гот у әва йәка бәла кьр, ӧса кӧ Иса иди нькарьбу ашкәрә бьчуйа бажарәки, ле жь бажер дәр ль щийед хәwлә дьма. У щьмә’т жь һәр алийава дьһатьнә щәм Wи.