<Efesî 4

[1] Аwа әзи гьртийе бона наве Хӧдан, һиви жь wә дькьм, кӧ һун ӧса бьжин, чаwа лайиqи wе газийе йә, к’ижанер’а һун һатьнә газикьрьне.

[2] Һун бь т’әмамийа мьлуктийе у шкәсти, бь сәбьре һ’ьзкьрьнеда ль бәр һәв дахьн .

[3] Бьщә’диньн, кӧ йәктийа Р’ӧһ’ пе һәвгьредана ә’дьлайийе хwәй кьн.

[4] Чаwа бәдән йәк ә у Р’ӧһ’ йәк ә, һун жи гӧманәкер’а һатьнә газикьрьне.

[5] Хӧдан йәк ә, баwәри йәк ә, ньхӧмандьн йәк ә,

[6] Хwәде йәк ә, Әw Баве һ’әмуйа йә, кӧ сәр һ’әмуйар’а йә, бь һ’әмуйа йа Хwә дькә у нава һ’әмуйада йә.

[7] Бәле жь мә һәр кәсир’а жи к’әрәм һатийә дайине, чаwа Мәсиһ п’арәвәкьр.

[8] Бона ве йәке те готьне: «Гава һьлк’ьшийа чу жоре, һесир т’әви Хwә бьрьн у п’ешк’еш данә мәрьва» .

[9] Әв «һьлк’ьшийа» чь те һ’әсабе? Дьхwазә бежә, кӧ Әw пешда бәржери wе дьнйа жерьн бу.

[10] Әwе кӧ бәржер бу, һәма Әw ә, Йе кӧ Хwә да феза һ’әму ә’змана, wәки һәр тьшти һ’ьзурийа Хwәва т’ьжи кә.

[11] Әва Әw бу, Йе кӧ п’ешк’еш данә мәрьва, кӧ һьнәк бьбьнә шанди, һьнәк п’ехәмбәр, һьнәк мьзгиндар, һьнәк жи сә’ви у дәрсдар.

[12] Әwи әв йәк кьр, wәки щьмә’та Хwәде шьхӧлед хьзмәтк’арийер’а һазьр бә, бона авабуна бәдәна Мәсиһ,

[13] һ’әта кӧ әм һ’әму жи бьгьһижьнә wе йәке, кӧ баwәрийе у Кӧр’е Хwәде наскьрьнеда т’ьфаq бьн, бьбьнә мәрьвед гьһишти, т’ам wәкә бәжьн-бала Мәсиһ.

[14] Wәки ӧса йә жь вьр шунда әм нәбьнә мина зар’ока кӧ жь пела вьрда-wеда дьк’әвьн у бь дәрәwед мәрьва бәр байе һәр һинкьрьнәке дьк’әвьн, йед кӧ бь фелбазийа дьхапиньн у дьхальфиньн.

[15] Ле р’астийе пе һ’ьзкьрьне бежьн , һәр алийада бьгьһижьнә сери, кӧ Мәсиһ ә.

[16] Жь Wи т’әмамийа бәдәне һәвва нә у һ’әму жи бь алик’арийа һәр севькәке һәвва гьредайи йә. У гава һәр п’арәкә бәдәне шьхӧле хwә дькә, һ’ьзкьрьнеда хwәха дьгьһижә у мәзьн дьбә .

[17] Аwа әз ве йәке мерк’ими дьбежьм у бь наве Хӧдан т’әми ль wә дькьм, кӧ һун иди т’ӧ щара wе р’еда нәчьн, чаwа п’утп’арьст бь фькьред хwәйә п’уч’ дьчьн.

[18] Әwана фә’мед хwәда шуна р’әшва чун у жь жийина Хwәде дур к’әтьнә, жь дәст нәзанийа нава хwә у сәрһ’ьшкийа хwә.

[19] Шәрма р’уйе хwә ӧнда кьрьнә у ӧса хwә данә дохине, һ’әта кӧ һәр щур’ә кьрьнед һ’әрам дькьн у т’ер набьн.

[20] Ле wә Мәсиһ ӧса нас нәкьр!

[21] Бәле wә бона Wи бьһистийә жи у чаwа йед п’ара Иса, һун wе р’астийа нава Wида һин бунә.

[22] Дә һун хәйсәте хwәйи бәре жь хwә дур хьн, wи мәрьве кәвьни кӧ бь һавьжийед һ’ьләк’арва дерьсбуйи йә

[23] у бь р’ӧһ’ у фькьред хwәда нуйәжийин бьн,

[24] мәрьве ну ль сәр хwә wәргьрьн, кӧ кьрасе Хwәдеда бь һәqи у һ’әлалийа бе qәлпи хӧльqи йә .

[25] Аwа дәрәwа жь хwә дур хьн, жь wә һәр йәк һәвале хwәр’а р’аст хәбәр дә , чьмки әм бь һәвр’а әндәмед Бәдәна Мәсиһ нә.

[26] Һәгәр һун һерс к’әвьн, гӧна нәкьн , бьра р’о сәр һерса wәр’а нәчә ава

[27] у щи нәдьнә мирещьн.

[28] Әwе кӧ дьзийе дькә, бьра иди нәдьзә, ле бь худана хwәйә һ’әлал бь дәстед хwә бьхәбьтә, кӧ бькарьбә дәст бавежә к’әтийа жи.

[29] Бьра жь дәве wә qәт хәбәрәкә хьраб дәрнәйе, пештьри тьштед кӧ кери гӧһдара тен у к’аре дьдьнә wан.

[30] У Р’ӧһ’е Хwәдейи Пироз нәешиньн, бь К’ижани һун бона Р’ожа Азайийе һатьнә моркьрьне.

[31] Дә бьра һәр тә’лайи, һерс, бәрзәqи, qар’ә-qар’ у готьнед нәр’еда жь wә дур бьн т’әви һәр щур’ә к’ин-бохийева.

[32] У һәвр’а ширьн у дьлшәwат бьн, ль һәв бьбахшиньн, чаwа Хwәде бь Мәсиһ бахшандә wә.