<Efesî 1

[1] Жь Паwлосе бь ә’мьре Хwәде шандийе Мәсиһ Иса, wан мәрьвед Хwәдер’а, йед кӧ Әфәседа дьминьн у йәктийа Мәсиһ Исада амьн ьн:

[2] Дә бьра к’әрәм у ә’дьлайийа Хwәдейе Баве мә у Хӧдан Иса Мәсиһ ль wә бә.

[3] Шькьр жь Хwәдер’а, Баве Хӧдане мә Иса Мәсиһ, кӧ пе һ’әму дӧа-дьрозгед р’ӧһ’анийә ль дийаре ә’змана йәктийа Мәсиһда дӧа ль мә кьрьн.

[4] Бәри ә’фьрандьна дьнйайе Хwәде йәктийа Wида әм бьжартьн, wәки әм пироз у беqӧсур бьн, ль бәр Wи һ’ьзкьрьнеда бьжин.

[5] Әwи әм пешда к’ьфш кьрьбун, чаwа ль qьрара Wи хwәш һат, кӧ мә бь дәсте Иса Мәсиһ бькә лаwед Хwә .

[6] Дә wәрьн әм пәсьне Wи бьдьн, бона wе к’әрәма Wийә хwәйир’умәт, пе к’ижане йәктийа Һ’ьзкьрийе Хwәда qәнщи ль мә кьр.

[7] Йәктийа Wида әм аза бунә бь хуна Wи, аwа готи афубуна гӧна стандийә . Әва йәка жь дәwләмәндтийа к’әрәма Wи йә,

[8] йа кӧ Wи бь мәр’дани сәр мәда баранд, пе һ’әму сәрwахти у фә’мдарийе.

[9] Әwи сӧр’а хwәстьна Хwә мәва ә’йан кьр, чаwа ль Wи хwәш һат, йа кӧ һе пешда qьрар кьрьбу, wәки йәктийа Мәсиһда бинә сери,

[10] кӧ гава wәхт пер’а бьгьһижә, әw т’ьвдир мийасәр бә, һ’әму тьшт бьн сәрwертийа Мәсиһда гьредайи бьн, һьн һәр тьштед ль ә’рде, һьн жи ль ә’змана.

[11] Чаwа Хwәде qьрара Хwәда пешда к’ьфш кьрьбу, кӧ һәр тьшт ль гора хwәстьн у ә’мьре Wи бә, әм щьһу йәктийа Мәсиһда п’ара Хwәде к’әтьнә,

[12] wәки әм пәсьне р’умәта Wи бьдьн кӧ мә пешда гӧмана хwә данийә сәр Мәсиһ.

[13] Йәктийа Wида һун нәщьһу жи бунә п’ара Хwәде, гава wә хәбәра р’астийе, аwа готи Мьзгинийа хьлазбуна хwә бьһист. Wә баwәрийа хwә Wи ани у бь Р’ӧһ’е Пирози создайи һатьнә моркьрьне.

[14] Р’ӧһ’е Пироз чаwа бьһе һатийә дайине һ’әта әм созе Хwәде wар бьн, чахе Хwәде щьмә’та Хwә лап аза кә, бона пәсьндайина р’умәта Хwә.

[15] Бона ве йәке мьн жь һьнгева кӧ бона баwәрийа wәйә сәр Хӧдан Иса у әw һ’ьзкьрьна wәйә һьндава т’әмамийа щьмә’та Хwәдеда бьһистийә,

[16] бона wә мьн дәст жь шькьрдайине нәк’ьшандийә. Әз т’ьме нава дӧайед хwәда wә бир тиньм,

[17] wәки Хwәдейе Хӧдане мә Иса Мәсиһ, Баве хwәйир’умәт, Р’ӧһ’е сәрwахтийе у ә’йантийе бьдә wә, кӧ һун Wи т’ам нас бькьн.

[18] Бьра ч’ә’вед р’ӧһ’е wә вәбьн, wәки һун фә’м бькьн, чь йә әw гӧмана кӧ Wи гази wә кьрийә у чь йә әw дәwләмәндтийа р’умәта Wи, йа кӧ щьмә’та Wи wе wар бә

[19] у чь йә әw qәwата Wийә мәзьнә беһьмбәр, йа кӧ нав мә баwәрмәндада дьхәбьтә. Әв ә әw qәwата Wийә зор,

[20] йа кӧ Хwәде сәр Мәсиһ да хәбате, гава Әw жь нава мьрийа р’акьр у ль дийаре ә’змана к’еләка Хwәйә р’асте да р’уньштандьне ,

[21] Әw дани сәр һ’әму сәрwертийа, һ’ӧкӧмәтийа, qәwата, хӧдантийа у ӧса жи сәр һ’әму навед кӧ тенә һьлдане, нә кӧ т’әне ль ве дьне, ле wе дьне жи.

[22] У Хwәде һәр тьшт кьрә бьн п’ийед Wи у Әw бона щьвине к’ьфш кьр чаwа сәрwере һәр тьшти .

[23] Щьвин жи бәдәна Мәсиһ ә, т’әмамбуна Wи йә, кӧ Хwәха һәр тьшт ә, һәр тьшти т’әмам дькә.