[1] Thai-ví tui Lâ-mâ ke Nâ-yok chéu-hi kien Yok-nâ-tân, tui kì kóng: “Ngài cho má-ke sṳ? Fam má-ke chhui? Yû má-ke tui-m̀-hí ngiâ-pâ ke sṳ, sṳ́ kì oi chhṳ̀ ngài nè?”
[2] Yok-nâ-tân en-kóng: “Ngì chhie̍t-tui m̀-voi sí! Ngâ-pâ mò-lun cho má-ke sṳ, put-kón chhung-yeu, mò chhung-yeu, chhiòn-phu voi lâu ngài kóng. Liá-ke sṳ kì ya m̀-voi tiâm-tiâm mò lâu ngài kóng, chhie̍t-tui m̀-voi.”
[3] Chúng-he Thai-ví yu fat-sṳ kóng: “Ngiâ-pâ mìn-mìn tî ngì tui ngài án-hó, só-yî kì m̀-voi chiông kie-va̍k lâu ngì kóng, yîn-vi kì kiâng ngì sông-sîm. Ngài chṳ́-tén yún-sên ke Song-ti, yu kám chhai ngì mien-chhièn fat-sṳ: Ngài lì sí-mòng chhûn yit-phu kiok thin-thin!”
[4] Yok-nâ-tân tui Thai-ví kóng: “Ngì oi ngài cho má-ke, ngài chhie̍t-tui m̀-voi thôi-chhṳ̀.”
[5] Thai-ví en Yok-nâ-tân kóng: “Thiên-kông-ngit he chhû-yit, ngài pún-lòi yin-kôi lâu vòng khiung-ha sṳ̍t-fan, chúng-he khiù ngì pûn ngài hi thièn-tú khong-to hêu-ngit am-pû.
[6] Na-he ngiâ-pâ khon-tó ngài mò hi sṳ̍t-fan, chhiáng ngì lâu kì kóng: ‘Thai-ví hiong ngài chhiáng-ká kón-chón Pak-li-hèn ke ló-vuk, yîn-vi kì chhiòn-kâ liá-ha tông chhai ke-vi hien ngièn-chi.’
[7] Na-he kì kóng: ‘Hó!’ Án-ngiòng ngiâ phu̍k-ngìn chhiu ôn-chhiòn lé; na-he kì fat-khién, ngì chhiu tî kì he kiet-sîm oi chhṳ̀ ngài.
[8] Chhiáng ngì sṳ̂-ên, chûn-sú ngì lâu phu̍k-ngìn chhai Song-chú mien-chhièn só-li̍p ke sṳ-yok. Na-he ngài yû-chhui, ngì chhîn-sú chhṳ̀-sí ngài chhiu hó! Ngióng oi-sṳ́ chiông ngài kâu-pûn ngiâ-pâ nè?”
[9] Yok-nâ-tân kóng: “M̀-hó án-ngiòng sióng! Na-he ngài khok-sṳ̍t tî ngâ-pâ oi hoi ngì, ngài kám m̀-voi lâu ngì kóng mâ?”
[10] Thai-ví yu mun: “Na-he ngiâ-pâ fat-khién lòi en ngì, má-ngìn lòi lâu ngài kóng?”
[11] Yok-nâ-tân en-kóng: “Ên lióng-sà lòi-hi thièn-tú.” Kì lióng-sà chhiu khiung-ha hi.
[12] Yok-nâ-tân tui Thai-ví kóng: “Ngien Song-chú — Yî-set-lie̍t ke Song-ti cho ngài-têu ke chṳn-ngìn! Thiên-kông-ngit lâu hêu-ngit liá-ke sṳ̀-chiet, ngài voi tá-tham ngâ-pâ ke yi-sṳ. Na-he kì tui ngì mò ok-yi, ngài voi phai-ngìn chhòn-fa pûn ngì;
[13] na-he ngâ-pâ chhùn-sîm oi hoi ngì, chúng-he ngài mò lâu ngì kóng pûn ngì hó ôn-chhiòn lì-khôi, ngien Song-chú chhûng-chhûng chit-fa̍t ngài.” Yok-nâ-tân yu kóng: “Ngien Song-chú lâu ngì khiung-ha, chhiong Kì yî-chhièn lâu ngâ-pâ khiung-ha yit-yong!
[14] Ngài hàn-sâng ke ngit, ngì oi cheu Song-chú put-pien ke chhṳ̀-oi sṳ̀n-sîm sṳ̍t-yi khoán-thai ngài; na-he ngài sí-thet,
[15] ngì oi yit-chhṳ̍t khiung-yong sṳ̀n-sîm sṳ̍t-yi khoán-thai ngài vuk-hâ ngìn. Tông Song-chú chha̍t-tái sêu-me̍t ngì ke sù-thi̍t yî-heu,
[16] ngien ngì lâu ngài ke sṳ-yok yún-yén yû-háu. Na-he ngì fí-yok, Song-chú oi thûng-ko ngì ke sù-thi̍t lòi chit-fa̍t ngì.”
[17] Yok-nâ-tân chai yit-pái ham Thai-ví fat-sṳ, yîn-vi kì fî-sòng siak Thai-ví, chhiu-chhiong siak chhṳ-kâ ke miang yit-yong.
[18] Yok-nâ-tân tui Thai-ví kóng: “Thiên-kông-ngit he chhû-yit, sṳ̍t-fan ke sṳ̀ ngì mò-chhôi, ngìn yit-thin voi fat-hien;
[19] hêu-ngit ngì yu mò-chhôi, ngìn hàn-kha voi kám-kok. Só-yî ngì oi to song-pái khong ke só-chhai hi, khong chhai sa̍k-tôi heu-poi tén-tén.
[20] Ngài voi chiông sa̍k-tôi chún-cho chien-pá, sa-chhut sâm-kî chien,
[21] yèn-heu fûn-fu ngài ke phu̍k-ngìn hàng ko-hi chhìm chien. Na-he ngài tui phu̍k-ngìn kóng: ‘Chien chhai ngì heu-poi, chón-lòi liá-phién chhìm chhut-lòi!’ Ke chhiu-he kóng ngì ôn-chhiòn lé, cho-tet chhut-lòi. Ngài chṳ́ yún-sên ke Song-chú fat-sṳ, ngì yit-thin mò ngùi-hiám.
[22] Na-he ngài lâu phu̍k-ngìn kóng: ‘Chien chhai ngì thèu-chhièn’, ngì oi kón-kín chéu! Yîn-vi he Song-chú oi ngì lì-khôi.
[23] Lun-tó ên lióng-sà ke sṳ-yok, yû Song-chú yún-yén chhai ngì lâu ngài chûng-kiên cho chṳn-ngìn.”
[24] Só-yî, Thai-ví hi khong chhai thièn-tú. Chhû-yit ke-ngit, Só-lò-vòng lòi sṳ̍t-fan,
[25] cheu-sòng chhô chhai vá-piak ke chho-vi. Ap-nì-ngí chhô chhai kì sùn-thèu, Yok-nâ-tân chhô chhai kì tui-mien, Thai-ví chhô ke ten-é khûng-khûng.
[26] Chúng-he ke-ngit Só-lò mò kóng má-ke, yîn-vi kì láu-tó Thai-ví yit-thin he tù-tó sṳ́ kì mò chhiang-li ke sṳ-chhìn.
[27] Thi-ngi ngit, chhiu-he chhû-ngi, Thai-ví chhô ke ten-é hàn-he khûng-khûng; Só-lò chhiu mun kiâ lai-é Yok-nâ-tân: “Cho-má-ke Yâ-sî ke lai-é chhô-pû-ngit lâu kîm-pû-ngit mò lòi sṳ̍t-fan?”
[28] Yok-nâ-tân en-kóng: “Kì hiong ngài chhiáng ká, khiù ngài pûn kì chón-hi Pak-li-hèn.
[29] Kì tui ngài kóng: ‘Chhiáng pûn ngài chón-hi, yîn-vi ngài-têu chhiòn-kâ oi chhai sàng-tú hien-chi; ngâ-kô ham ngài yit-thin oi to. Na-he ngì he ngài ke phèn-yû, chhiu pûn ngài chón-hi khon ngâ vuk-hâ ke ngìn.’ Só-yî Thai-ví mò lòi lâu vòng khiung-ha sṳ̍t-fan.”
[30] Só-lò tui Yok-nâ-tân thai fat-khién, ma kì kóng: “Ngì liá chhuk-sâng, chhiu-chhiong ngiâ-mê án ngàn-ku án phoi-ngia̍k! Ngài liá-ha chang tî ngì he khî chhai Yâ-sî ke lai-é ke-phién, sia chhṳ-kâ lâu ngiâ-mê ke mien-phì!
[31] Kám-kóng ngì m̀-tî, Yâ-sî ke lai-é mò sí, ngì chhiu yún-yén m̀-sṳ́ sióng-oi cho liá koet-kâ ke vòng? Hi chiông kì chok-lòi kâu-pûn ngài. Kì mò sí cho-m̀-tet!”
[32] Yok-nâ-tân tui kiâ-pâ Só-lò kóng: “Kì cho-má-ke kôi-sí? Kì cho-chhâ má-ke sṳ?”
[33] Só-lò ngiàm-sṳ̀ khià-hí kì ke chhiông, hiong Yok-nâ-tân te̍p ko-hi, oi chhṳ̀ kì. Yok-nâ-tân liá-ha chang tî kiâ-pâ chṳn-kîn sióng-oi chhṳ̀ Thai-ví.
[34] Yok-nâ-tân hi phun-phun tui chok-si̍t khî hí-lòi, yit-ngit mò-sṳ̍t tûng-sî, ke-ngit he chhû-ngi. Yok-nâ-tân vi Thai-ví ke sṳ tông-sèu, yîn-vi kiâ-pâ vú-yu̍k Thai-ví.
[35] Thi-ngi chêu-sṳ̀n, Yok-nâ-tân tai-tén yit-ke se-â-kô-é, cheu siên-chhièn yok-hó ke sṳ̀-kiên to thièn-tú hi kien Thai-ví.
[36] Yok-nâ-tân tui se-â-kô-é kóng: “Ngì hi chhìm ngài sa chhut-hi ke chien.” Ke se-â-kô-é chhiu hi. Yok-nâ-tân sa yit-kî chien, lo̍k chhai se-â-kô-é thèu-chhièn.
[37] Tông se-â-kô-é voi to chien tiet-lo̍k ke só-chhai, Yok-nâ-tân tui kì hêm-kóng: “Chien hàn chhai thèu-chhièn!”
[38] Yok-nâ-tân yu tui se-â-kô-é hêm-kóng: “M̀-hó khî chhai ke-vi, kiak-kiak ko-hi!” Se-â-kô-é chiông chien ngiâm hí-lòi, nâ-vàn chú-ngìn,
[39] vàn-chhiòn m̀-tî ke-têu fa yû má-ke yi-sṳ, chṳ́-yû Yok-nâ-tân lâu Thai-ví tî.
[40] Yok-nâ-tân chiông kiûng-chien kâu-pûn se-â-kô-é, ham kì siên tai-chón sàng-tú hi.
[41] Se-â-kô-é lì-khôi yî-heu, Thai-ví tui sa̍k-tôi heu-poi chhut-lòi, khúi lo̍k-hi, phu̍k chhai thi-song pai kì sâm-pái. Kì lióng-sà kín-chîm kín-kieu, Thai-ví pí Yok-nâ-tân hàn-kha pî-sông.
[42] Yok-nâ-tân tui Thai-ví kóng: “Cho ngì phìn-ôn hi! Song-chú yit-thin voi sṳ́ ngì lâu ngài pin ên lióng-sà ke heu-thoi, yún-yén chûn-sú ngài-têu chûng-kiên ke sṳ-yok.” Só-yî Thai-ví chhiu lì-khôi; Yok-nâ-tân ya chón sàng-tú hi.