[1] Só-lò lâu Thai-ví kóng-fa kiet-suk yî-heu, Só-lò ke lai-é Yok-nâ-tân ke sîm ngiàm-tén Thai-ví ke sîm. Yok-nâ-tân siak Thai-ví, chhiong siak chhṳ-kâ ke miang yit-yong.
[2] Tui ke-ngit hí, Só-lò liù Thai-ví chhai sṳ̂n-piên, m̀ pûn kì chón vuk-hâ hi.
[3] Yok-nâ-tân yîn-vi fî-sòng siak Thai-ví, chhiong siak chhṳ-kâ ke miang yit-yong, chhiu lâu Thai-ví kiet-pai cho hiûng-thi.
[4] Yok-nâ-tân thot-hâ chhṳ-kâ sṳ̂n-song ke ngoi-sâm pûn Thai-ví, yu chiông chhṳ-kâ ke chan-kap, tô-é, kiûng lâu yêu-tai chhiòn-phu pûn kì.
[5] Só-lò mò-lun phai Thai-ví hi-cho má-ke, kì lûng-chúng cho-to tông sun-li, só-yî Só-lò phai kì cho tai-pîn ke kôn-chóng. Liá-khien sṳ sṳ́ ngìn-mìn lâu Só-lò ke kôn-yèn chhin fôn-hí.
[6] Thai-ví chhṳ̀-sí Kô-li-â yî-heu, kiûn-chhui tet-sṳn chón-lòi; Yî-set-lie̍t kok sàng-chṳ́n ke fu-ńg chhiòn-phu chhut-lòi ngiàng-chiap Só-lò-vòng. Kì-têu tông fôn-hí chhong-kô, thiau-vú, tá-kú, thàn-khìm.
[7] Kì-têu kín-thiau, kín-chhong: “Só-lò chhṳ̀-sí chhiên-chhiên; Thai-ví chhṳ̀-sí van-van!”
[8] Só-lò tông-nâu liá kô-chhṳ̀, hi phu̍t-phu̍t kóng: “Kì-têu pûn Thai-ví van-van, sa pûn ngài chhiên-chhiên, chhiu chhûn-tó vòng-vi mò pûn kì thin-thin!”
[9] Tui ke-ngit hí, Só-lò chhiu chhit-tu Thai-ví.
[10] Thi-ngi ngit, yû sià-lìn tui Song-ti ke-vi lòi, khiòng-lie̍t khúng-chṳ Só-lò, kì chhiu-chhiong tiên-é yit-yong chhai vuk-tú lon kóng-fa. Thai-ví lâu phìn-sòng khiung-yong thàn-khìm. Só-lò nâ-tén chhiông,
[11] chhṳ-kâ lâu chhṳ-kâ kóng: “Ngài oi chiông Thai-ví chhiuk chhai piak-táng!” Chhiu tui-chún Thai-ví tiû lióng-pái, chúng-he lióng-pái pûn Thai-ví sám-khôi lé.
[12] Só-lò kiâng Thai-ví, yîn-vi Song-chú lâu Thai-ví khiung-ha, sa lì-khôi Só-lò.
[13] Só-yî Só-lò sṳ́ Thai-ví lì-khôi kì, phai kì chṳ́-fî yit-chhiên ngìn ke kiûn-chhui. Thai-ví tai-liâng phu-ha chhut-ngi̍p chan-chhòng,
[14] m̀-sṳt tá-sû, yîn-vi Song-chú lâu kì khiung-ha.
[15] Só-lò khon-tó Thai-ví fàm-sṳ sṳ̀n-kûng, chhiu hàn-kha kiâng kì.
[16] Chúng-he Yî-set-lie̍t lâu Yù-thai ke ngìn-mìn chhiòn-phu siak Thai-ví, yîn-vi kì he yit-ke chhin yû-siu ke liâng-chhiu.
[17] Só-lò tui Thai-ví kóng: “Ngài oi chiông ngài thai ke moi-é Mí-lâ ka-pûn ngì, thiàu-khien he ngì oi cho yit-ke yúng-kám ke kiûn-ngìn, chûng-sîm fu̍k-sṳ ngài, vi Song-chú siông-chhṳ̀.” (Khì-sṳ̍t Só-lò sióng chia Fî-li-sṳ-ngìn ke tô-é chhṳ̀-sí Thai-ví, m̀-sṳ́ chhîn-sṳ̂n chhut-sú!)
[18] Thai-ví en-kóng: “Ngài he má-ngìn? Ngài ke kâ-chhu̍k chhai Yî-set-lie̍t son má-ke? Ngài nai khâm-tet cho vòng ke se-lòng?”
[19] To Mí-lâ yin-kôi lâu Thai-ví kiet-fûn ke sṳ̀, Só-lò fán-chón chiông kì ka-pûn Mí-hò-lâ-ngìn Â-tet-lie̍t.
[20] Chúng-he, Só-lò nang-ngoi yit-ke moi-é Mí-kap oi-tó Thai-ví. Só-lò tî liá-khien sṳ, chhiu tông fôn-hí,
[21] sîm-tú sióng: “Ngài oi chiông Mí-kap ka-pûn Thai-ví, yung kì cho lò-mióng, Thai-ví chhiu voi sí chhai Fî-li-sṳ-ngìn sú-hong.” Só-yî Só-lò thi-ngi pái tui Thai-ví kóng: “Ngì oi cho ngài ke se-lòng!”
[22] Só-lò yu fûn-fu phu-ha thêu-thêu-é hi tui Thai-ví kóng: “Vòng tông hîm-sóng ngì, kì ke kôn-yèn ya chhiòn-phu fôn-hí ngì. Ngì liá-ha hi-thó vòng ke moi-é he tông-hó ke sṳ̀-kî.”
[23] Só-lò ke phu-ha chiông liá-fa lâu Thai-ví kóng. Thai-ví en-kóng: “Cho vòng ke se-lòng he yit-khien tông kông-yùng ke sṳ. Chhiong ngài án khiùng-khú, pî-mì ke ngìn, kám khâm-tet án-ngiòng ke kông-yùng?”
[24] Phu-ha chiông Thai-ví ke fa chhòn-pûn Só-lò,
[25] Só-lò yu min-lin kì-têu hi lâu Thai-ví kóng: “Vòng só oi ke phín-lî he yit-pak ke Fî-li-sṳ-ngìn ke pâu-phì, lòi-cho tui sù-thi̍t ke po-fu̍k.” (Liá he Só-lò ke yîm-mèu, sióng thûng-ko Fî-li-sṳ-ngìn chhṳ̀ Thai-ví.)
[26] Só-lò ke phu-ha chiông Só-lò só-kóng ke fa lâu Thai-ví kóng, Thai-ví tông fôn-hí, ngien-yi cho vòng ke se-lòng. Chhai kiet-fûn yî-chhièn,
[27] Thai-ví lâu kì ke phu-ha hi chhṳ̀-sí lióng-pak ke Fî-li-sṳ-ngìn. Thai-ví chiông kì-têu ke pâu-phì tai-hi kâu-pûn Só-lò, oi cho vòng ke se-lòng. Só-yî, Só-lò mò nai-hò chhiu chiông moi-é Mí-kap ka-pûn Thai-ví.
[28] Só-lò khon-chhut Song-chú khok-sṳ̍t lâu Thai-ví khiung-ha, kì ke moi-é Mí-kap ya siak Thai-ví,
[29] Só-lò chhiu hàn-kha kiâng Thai-ví, yit-chhṳ̍t lâu kì chok-tui.
[30] Fî-li-sṳ-ngìn ke kiûn-chóng sòng-sòng lòi kûng-tá; Thai-ví chhut-chan, tak-pái ke chan-kûng pí Só-lò khì-thâ ke kôn-yèn yàng kâ chhin-tô, só-yî kì ke miàng-sâng tông su chûn-chhung.