[1] Thai-ví chhai Thai-ví-sàng vi chhṳ-kâ hí vòng-kiûng, ya vi Song-ti ke yok-khui yi-phi só-chhai, tap yit-chho chong-phùng.
[2] Ke-sṳ̀ Thai-ví kóng: “Chṳ́-yû Li-vi-ngìn cho-tet kông Song-ti ke yok-khui, yîn-vi kì-têu he Song-chú sién chhut-lòi ke ngìn, oi kông Song-chú ke yok-khui, yún-yén sṳ-fung Kì.”
[3] Só-yî Thai-ví seu-si̍p chhiòn-phu Yî-set-lie̍t-ngìn to Yâ-lu-sat-lâng, oi chiông Song-chú ke yok-khui yun to Thai-ví yi-phi ke só-chhai.
[4] Thai-ví yu seu-si̍p Â-lùn ke heu-thoi lâu Li-vi-ngìn:
[5] Kô-hot chûng-chhu̍k ke Vû-lie̍t tai-liâng yit-pak ngi-sṳ̍p ngìn;
[6] Mí-lâ-li chûng-chhu̍k ke Â-soi-ngâ tai-liâng lióng-pak ngi-sṳ̍p ngìn;
[7] Kiet-sun chûng-chhu̍k ke Yok-ngí tai-liâng yit-pak sâm-sṳ̍p ngìn;
[8] Yî-li-sat-fán chûng-chhu̍k ke Sṳ-mâ-ngâ tai-liâng lióng-pak ngìn;
[9] Hî-pak-lùn chûng-chhu̍k ke Yî-lie̍t tai-liâng pat-sṳ̍p ngìn;
[10] Vû-siet chûng-chhu̍k ke Â-mí-nâ-tha̍t tai-liâng yit-pak yit-sṳ̍p ngi-ngìn.
[11] Thai-ví seu-kien chi-sṳ̂ Sat-tuk lâu Â-pí-â-thâ, hàn-yû liuk-ke Li-vi-ngìn — Vû-lie̍t, Â-soi-ngâ, Yok-ngí, Sṳ-mâ-ngâ, Yî-lie̍t, Â-mí-nâ-tha̍t,
[12] tui kì-têu kóng: “Ngì-têu he Li-vi tak chûng-chhu̍k ke liâng-chhiu; oi kiet-chhiang ngì-têu chhṳ-kâ lâu khiung-chhu̍k ke Li-vi-ngìn, hó chiông Song-chú — Yî-set-lie̍t Song-ti ke yok-khui kông-to ngài só yi-phi ke só-chhai hi.
[13] Yîn-vi song-pái ngì-têu mò lâu ngài-têu khiung-ha hi kông yok-khui, Song-chú — ngài-têu ke Song-ti chit-fa̍t ngài-têu, yîn-vi ngài-têu mò mun Kì cheu kûi-thin oi ngióng-pân ôn-phài.”
[14] Só-yî, ke-têu chi-sṳ̂ lâu Li-vi-ngìn kiet-chhiang chhṳ-kâ, vi-tó oi chhiáng Song-chú — Yî-set-lie̍t Song-ti ke yok-khui.
[15] Li-vi-ngìn cheu Song-chú thûng-ko Mô-sî só min-lin ke, yung kong-é chiông Song-ti ke yok-khui kông chhai kiên-thèu táng.
[16] Thai-ví min-lin ke-têu Li-vi-ngìn ke liâng-chhiu phai Li-vi-ngìn chhong-kô, yung su-khìm lâu chhê-é thàn-cheu khoai-lo̍k ke yîm-ngo̍k.
[17] Kì-têu tui tông-voi chhong-kô ke chûng-chhu̍k sién-chhut yî-ha ke ngìn lòi tá thùng chhê-é: Yok-ngí ke lai-é Hî-man, kì ke chhîn-chhit Pí-li-kâ ke lai-é Â-sat, lâu Mí-lâ-li-chhu̍k Kú-sâ-ngâ ke lai-é Yî-tham. Kì-têu yu sién-chhut yî-ha ke Li-vi-ngìn lòi-thàn kô-yîm ke su-khìm, phi-ha̍p thùng chhê-é; liá-têu ngìn he Sat-kâ-li-ngâ, Ngâ-siet, Sṳ-mí-lâ-ma̍t, Yâ-hiet, Vû-nì, Yî-li-ap, Pí-nâ-ngâ, Mâ-sî-ngâ. Kì-têu ya sién-chhut thàn tâi-yîm su-khìm ke Li-vi-ngìn; liá-têu ngìn he Mâ-thâ-thì-ngâ, Yî-li-fî-li-fu, Mì-khiet-nì-ngâ, Â-sat-sî-ngâ, pin sṳn-thien sú-ví — Ngò-phe̍t-Yî-tûng lâu Yâ-li.
[22] Kî-nâ-nì-ngâ tui yîm-ngo̍k tông chîn-thûng, só-yî su sién chhut-lòi tai-liâng Li-vi-ngìn chhong-kô.
[23] Pí-li-kâ, Yî-li-kâ-nâ, hàn-yû Ngò-phe̍t-Yî-tûng lâu Yâ-hî-â su-phai khon-sú yok-khui. Sṳ-pâ-nì, Yok-sâ-fap, Nâ-thán-ngia̍p, Â-mâ-soi, Sat-kâ-li-ngâ, Pí-nâ-â, lâu Yî-li-yî-chhia liá-têu chi-sṳ̂ su-phai chhai Song-ti ke yok-khui chhièn phùn la̍p-pá.
[25] Thai-ví lâu Yî-set-lie̍t ke-têu chóng-ló, hàn-yû kiûn-chhui ke-têu kiûn-kôn chhiòn-phu hi, tui Ngò-phe̍t-Yî-tûng ke vuk-hâ fôn-fôn hí-hí ngiàng Song-chú ke yok-khui.
[26] Yîn-vi Song-ti pông-chhu kông yok-khui ke Li-vi-ngìn, kì-têu chhiu hien chhit-chak ngiù-kú lâu chhit-chak mièn-yòng-kú lòi cho sên-chi.
[27] Thai-ví lâu kông yok-khui ke Li-vi-ngìn, hàn-yû sṳn-kô-chhui lâu kì-têu ke chhui-chóng Kî-nâ-nì-ngâ, chhiòn-phu chok-tén yu mà-sâ ke ngoi-phàu. Thai-ví nang-ngoi hàn chok yit-liâng mà-sâ yî-fut-tet.
[28] Só-yî, só-yû ke Yî-set-lie̍t ngìn-mìn thèn Song-chú ke yok-khui khiung-ha to Yâ-lu-sat-lâng. Kì-têu kûi-lu thai-sâng hêm, phùn yòng-kok, hàn-yû phùn la̍p-pá, tá chhê-é, pin thàn su-khìm lâu chhit-hièn-khìm ke yîm-ngo̍k.
[29] Song-chú ke yok-khui ngi̍p Thai-ví-sàng ke sṳ̀, Só-lò ke moi-é Mí-kap tui chhûng-mùn khon chhut-lòi, khon-tó Thai-ví-vòng fong-se thiau-vú, chhiu khon-khiâng kì.