[1] ᓂᒋᐋᐧᒥᑎᐠ, ᑭᐢᐱᐣ ᐊᔨᓯᔨᓂᐤ ᓇᐣᑕᐤ ᐊᐧᓂᑐᑕᒧᐃᐧᐣ ᐊᑎᒥᓀᐅᑯᒋ, ᑭᔭᐋᐧᐤ ᑳ ᐊᐦᒑᐦᑯᐃᐧᔦᐠ, ᑲᑫᐧ ᑭᐁᐧᑕᐃᕽ ᐁᑯᑐᐊᐧ ᔪᐢᑳᑎᓯᐃᐧᓂᕽ; ᐁ ᑭᑖᐸᒥᓱᔭᐣ, ᓈᐣᑕᐤ ᐃᓯ ᑭᐢᑕ ᑭᑕ ᑲᑫᐧᒋᐃᑲᐃᐧᔭᐣ.
[2] ᐸᐱᒥᐃᐧᑕᒫᑐᐠ ᑭ ᓇᔮᒋᑲᓂᐋᐧᐊᐧ, ᐁᑯᓯ ᒫᑲ ᐃᓯ ᑎᐱᑐᑕᒫᐧᕽ ᐅᔭᓱᐁᐧᐃᐧᐣ ᙭.
[3] ᒋᑫᒫ ᑭᐢᐱᐣ ᐊᔨᓯᔨᓂᐤ ᓇᐣᑕᐤ ᐃᑌᔨᒥᓱᒋ, ᐁᑳ ᓇᐣᑕᐤ ᐁ ᐃᑕᑭᒋᑳᓱᐟ, ᐊᐧᔦᓯᐃᓱ.
[4] ᒫᑲ ᑭᔮᑦ ᑲᐦᑭᔭᐤ ᐊᔨᓯᔨᓂᐤ ᑭᑕ ᑯᑌᔨᑕᑦ ᐃᐧᔭ ᐅᐟ ᐊᑐᐢᑫᐃᐧᐣ, ᐁᑯᓯ ᒫᑲ ᑭᑕ ᐊᔮᐤ ᐅ ᒪᒪᐦᑖᑯᓯᐃᐧᐣ ᐃᐧᔭ ᑎᐱᔭᐤ ᐅᐦᒋ, ᓇᒪᐃᐧᔭ ᒫᑲ ᐃᐧᒋ ᐊᔨᓯᔨᓂᐊᐧ.
[5] ᒋᑫᒫ ᑲᐦᑭᔭᐤ ᐊᔨᓯᔨᓂᐤ ᑭᑕ ᐱᒥᐃᐧᑖᐤ ᐃᐧᔭ ᐅ ᓇᔭᒋᑲᐣ.
[6] ᒫᑲ ᑭᔮᑦ ᐊᓇ ᑳ ᑭᐢᑭᓄᐦᐊᒫᐦᐟ ᐃᑌᐧᐃᐧᐣ ᑭᑕ ᐅᐦᒋᐢᑕᒪᐁᐧᐤ ᐊᓂᐦᐃ ᑳ ᑭᐢᑭᓄᐦᐊᒫᑫᔨᐟ ᑲᐦᑭᔭᐤ ᒥᔪ ᑫᑲᐧᔭ.
[7] ᐁᑳᐃᐧᔭ ᑭ ᑲ ᐊᐧᔦᓯᒥᑲᐃᐧᓈᐋᐧᐤ; ᑭᓭᒪᓂᑐ ᓇᒪᐃᐧᔭ ᑭᑕ ᑭ ᐹᐱᐁᐧᔨᒫᐤ: ᒋᑫᒫ ᐊᓂᒫ ᐊᔨᓯᔨᓂᐤ ᑳ ᑭᐢᑎᑳᑕᕽ, ᐁᐊᐧᑫᐧᔨᐤ ᒥᓇ ᑫ ᒪᓂᓴᕽ.
[8] ᒋᑫᒫ ᐊᓇ ᑳ ᑭᐢᑎᑫᐟ ᐃᐧᔭ ᐅ ᐃᐧᔮᓯᐃᐧᐃᐧᓂᕽ ᐃᓯ, ᐅ ᐃᐧᔮᓯᕽ ᑭᑕ ᐅᐦᒋ ᒪᓂᓯᑫᐤ ᓂᓯᐊᐧᓈᑎᓯᐃᐧᐣ; ᒫᑲ ᐊᓇ ᑳ ᑭᐢᑎᑫᐟ ᐊᐦᒑᐦᑯᕽ ᐃᓯ ᑭᑕ ᒪᓂᓯᑫᐤ ᐊᐦᒑᐦᑯᕽ ᐅᐦᒋ ᑳᑭᑫ ᐱᒫᑎᓯᐃᐧᐣ.
[9] ᐁᑳᐃᐧᔭ ᒫᑲ ᑭ ᑲ ᐃᐧ ᓄᑌᓯᒥᑯᓈᓇᐤ ᒥᔪ ᑐᑕᒧᐃᐧᐣ; ᒋᑫᒫ ᐃᔨᑯᕽ ᐃᐢᐸᔨᑭ ᑭ ᑲ ᒪᓂᓯᑳᓈᓇᐤ ᑭᐢᐱᐣ ᓇᒪᐃᐧᔭ ᑭ ᐳᔪᓈᓇᐤ.
[10] ᐁᑯᓯ ᒫᑲ, ᐁ ᐃᓯ ᓇᐃᐸᔨᐃᑯᔭᕽ, ᐊᑐᐢᑳᑕᑖᐠ ᐊᓂᒪ ᑭᑕ ᐃᓯ ᒥᔪᑐᑕᐋᐧᔭᕽ ᑲᐦᑭᔭᐤ ᐊᔨᓯᔨᓂᐤ, ᐅᓵᑦ ᒫᑲ ᐊᓂᑭ ᑳ ᐃᐧᑭᑫᒧᒋᐠ ᑖᐯᐧᔦᔨᑕᒧᐃᐧᓂᕽ.
[11] ᐋᐧᐸᐦᑕᒧᐠ ᐃᔨᑯᕽ ᐁ ᒪᒪᑭᐯᑎᑭ ᑳ ᐃᓯ ᒪᓯᓇᐦᐊᒫᑕᑯᐠ ᓂᔭ ᓂᒋᐦᒋ ᐅᐦᒋ.
[12] ᑕᐦᑐ ᑳ ᓇᑕᐁᐧᔨᑕᐦᑭᐠ ᑭᑕ ᒥᔮᐧᐸᒥᓈᑯᒋᑫᒋᐠ ᐃᐧᔮᓯᕽ, ᐊᔨᓵᐨ ᑭ ᐃᐧ ᓴᕒᑲᑦᓴᐃᓯᐃᐧᐃᑯᐋᐧᐊᐧᐠ; ᒫᑲ ᐱᑯ ᐁᑳ ᑭᑖ ᑯᑕᑭᐦᐃᐦᒋᐠ ᐅ ᐱᒥᑖᐢᑯᐃᑲᐣ ᙭ ᐅᐦᒋ.
[13] ᒋᑫᒫ ᓇᒪᐋᐧᐨ ᐊᐦᐳ ᐊᓂᑭ ᑳ ᓴᕒᑲᑦᓴᐃᓯᐃᐧᒋᐠ ᐃᐧᔭᐋᐧᐤ ᑲᓇᐁᐧᔨᑕᒪᐧᐠ ᐅᔭᓱᐁᐧᐃᐧᐣ; ᒫᑲ ᓇᑕᐁᐧᔨᑕᒪᐧᐠ ᑭᔭᐋᐧᐤ ᑭᑕ ᓴᕒᑲᑦᓴᐃᓯᐃᐧᔦᐠ, ᑭᑕ ᐅᐦᒋ ᒪᒥᒋᒧᒋᐠ ᑭ ᐃᐧᔮᓯᐋᐧᕽ.
[14] ᒫᑲ ᓇᒪᐃᐧᔭ ᐃᑕᑌᔨᑖᑲᐧᐣ ᓂᔭ ᐃᐧᔭ ᑭᑕ ᒪᒥᒋᒧᔮᐣ, ᐱᑯ ᐅ ᐱᒥᑖᐢᑯᐃᑲᐣ ᑳ ᑎᐯᔨᒥᑯᔭᕽ ᒋᓴᐢ ᙭, ᐁᐊᐧᑯ ᐅᐦᒋ ᐊᐢᑭ ᑳ ᒋᐢᑕᐦᐋᐢᑳᐧᑕᒥᕽ ᓂᔭ ᐃᐧᔭ ᐁ ᐃᓯ ᑲᓇᐋᐧᐸᐦᑕᒫᐣ, ᐁᑯᓯ ᒥᓇ ᓂᔭ ᐊᐢᑭᕽ ᐃᓯ.
[15] ᒋᑫᒫ ᓇᒪ ᑫᑲᐧᐩ ᐁ ᓴᕒᑲᑦᓴᐃᓯᐃᐧᕽ, ᐊᐦᐳ ᐁᑳ ᐁ ᓴᕒᑲᑦᓴᐃᓯᐃᐧᕽ, ᒫᑲ ᐁ ᐅᐢᑭ ᐅᓯᐦᒋᑲᓂᐃᐧᕽ.
[16] ᑕᐦᑐ ᒫᑲ ᑳ ᐃᓯ ᐱᒧᐦᑌᒋᐠ ᐅᒪ ᐁ ᑎᐸᐋᑫᒋᐠ, ᐯᔭᑕᑫᔨᒧᐃᐧᐣ ᑭᑕ ᐃᐧ ᐊᔮᐊᐧᐠ, ᒥᓇ ᑭᓭᐋᐧᑐᑖᑯᐃᐧᐣ, ᒥᓇ ᐃᐧᔭᐋᐧᐤ ᐅᐟ ᐃᐢᕒᐁᐃᓬᐃᒪ ᑭᓭᒪᓂᑐ.
[17] ᐁᑲᐧ ᐊᓄᐦᐨ ᐅᐦᒋ ᐁᑳᐃᐧᔭ ᐊᐃᐧᔭᐠ ᓂ ᑲ ᒥᑯᐢᑳᒋᒥᐠ: ᒋᑫᒫ ᓂ ᑭᑭᐢᑫᐣ ᐁ ᒪᓯᓈᐢᑭᓯᑳᑌᑭ ᓂᔭᐃᐧᕽ ᐅᐟ ᐁᑕᐅᑯᐃᐧᓇ ᒋᓴᐢ.
[18] ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᑭ ᑲ ᐃᐧ ᐃᐧᒉᐃᐧᑯᓈᐋᐧᐤ ᑭᐟ ᐊᐦᒑᐦᑯᐋᐧᕽ ᓂᒋᐋᐧᒥᑎᐠ. ᐋᒣᐣ.