[1] ᐹᓬ, ᐊᐹᐢᑎᓬ (ᓇᒫᐃᐧᔭ ᐊᔨᓯᔨᓂᐊᐧᐠ ᐅᐦᒋ, ᓇᒪᐃᐧᔭ ᒥᓇ ᐊᔨᓯᔨᓂᕽ ᐁ ᐅᐦᑎᓇᕽ, ᒫᑲ ᒋᓴᐢ ᙭ ᐅᐦᒋ, ᒥᓇ ᑭᓭᒪᓂᑐ ᐁᐧᔪᑖᐃᐧᕽ, ᑳ ᑭ ᐊᐧᓂᐢᑳᓈᐟ ᓂᐳᐃᐧᓂᕽ ᐅᐦᒋ),
[2] ᑭᑭ ᑲᐦᑭᔭᐤ ᐅᒋᐋᐧᒥᒫᐊᐧᐠ ᑳ ᐃᐧᒉᐃᐧᒋᐠ, ᐁ ᒪᓯᓇᐦᐊᒪᐊᐧᑭᐠ ᐅᑕᔭᒥᐦᐋᐊᐧᐠ ᑲᓬᐁᓯᔭᐃᕽ:
[3] ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᑭᓭᒪᓂᑐ ᐁᐧᔪᑖᐃᐧᕽ, ᒥᓇ ᑳ ᑎᐯᔨᒥᑯᔭᕽ ᒋᓴᐢ ᙭,
[4] ᐊᓇ ᑭ ᒪᒋᐃᑎᐃᐧᓂᓇᐊᐧ ᑳ ᑭ ᐅᐦᒋ ᐸᑭᑎᓂᓱᐟ, ᑭᑕ ᐸᐢᐱᐃᑯᔭᕽ ᐅᒪ ᑳ ᒪᒑᔨᐊᐧᕽ ᐊᐢᑭ ᐅᐦᒋ, ᐁ ᐃᑕᐢᑌᔨᐠ ᐅᐟ ᐃᑌᔨᑕᒧᐃᐧᐣ ᑭ ᑭᓭᒪᓂᑐᒥᓇᐤ ᒥᓇ ᑯᑖᐃᐧᓇᐤ:
[5] ᐁᐊᐧᑯ ᑭᑕ ᐃᐧ ᑭᐢᑕᑭᒫᐤ ᑳᑭᑫ ᒥᓇ ᑳᑭᑫ. ᐋᒣᐣ.
[6] ᓂ ᒫᒪᐢᑳᑌᐣ ᐁ ᐃᓯ ᑭᔨᐸ ᓇᑲᑖᔦᐠ ᐊᓇ ᑳ ᑭ ᓇᑐᒥᑯᔦᐠ ᐅ ᑭᓭᐋᐧᑎᓯᐃᐧᓂᕽ ᙭ ᑭᑕ ᐅᑎᓇᒣᐠ ᑯᑕᐠ ᒥᔮᐧᒋᒧᐃᐧᐣ;
[7] ᓇᒪᔦᐤ ᒫᑲ ᑯᑕᐠ ᒥᔮᐧᒋᒧᐃᐧᐣ: ᐱᑯ ᐃᐦᑖᐊᐧᐠ ᐊᓂᑭ ᐁ ᒥᑯᐢᑳᒋᐃᑯᔦᑳᐧᐤ, ᒥᓇ ᐁ ᐃᐧ ᐱᑯᓇᑭᐠ ᐅ ᒥᔮᐧᒋᒧᐃᐧᐣ ᙭.
[8] ᒫᑲ ᑭᐢᐱᐣ ᓂᔭᓈᐣ, ᐊᐦᐳ ᐅᑭᓯᑯ ᑭᐦᒋ ᑭᓯᑯᕽ ᐅᐦᒋ, ᑭ ᐊᐧᐃᐧᑕᒫᕽ ᓈᐣᑕᐤ ᒥᔮᐧᒋᒧᐃᐧᐣ ᑯᑕᐠ ᐃᔨᑯᕽ ᐊᓂᒪ ᑳ ᑭ ᐅᑎᓇᒣᐠ, ᑭᔮᑦ ᑭᑕ ᒪᒐᑭᒫᐤ.
[9] ᑳ ᑭ ᐃᑌᐧᔮᕽ ᑲᔭᑌ, ᐁᑯᓯ ᐁᑲᐧ ᒥᓇ ᐁᑌᐧᔮᐣ, ᑭᐢᐱᐣ ᐊᐃᐧᔭᐠ ᐃᐧᐦᑕᒫᑯᔦᑯ ᑯᑕᐠ ᒥᔮᐧᒋᒧᐃᐧᐣ ᐃᔨᑯᕽ ᐊᓂᒪ ᑳ ᑭ ᐅᑎᓇᒣᐠ, ᑭᔮᑦ ᑭᑕ ᒪᒐᑭᒋᑳᓱ.
[10] ᒋᑫᒫ ᐊᔨᓯᔨᓂᐊᐧᐠ ᒋ ᐅᒪ ᑳ ᓯᑭᒪᑭᐠ, ᐊᐦᐳ ᒋ ᑭᓭᒪᓂᑐ? ᑭᐢᐱᐣ ᑫᔮᐱᐨ ᐊᔨᓯᔨᓂᐊᐧᐠ ᓇᐦᐃᔭᐁᐧᐊᑭᐠ, ᓇᒪᔦᐤ ᐁᓴ ᓂᔭ ᐅᐟ ᐊᑐᐢᑫᔮᑲᓇ ᙭.
[11] ᒋᑫᒫ ᑭ ᑭᐢᑫᔨᑕᒧᐃᑎᓈᐋᐧᐤ, ᓂᒋᐋᐧᒥᑎᐠ, ᐊᓂᒪ ᐅᐦᒋ ᒥᔮᐧᒋᒧᐃᐧᐣ ᑳ ᑭ ᐋᐧᐃᐧᑕᒫᑕᑯᐠ, ᓇᒪᐃᐧᔭ ᐊᔨᓯᔨᓂᐤ ᐁ ᐱᒥᑎᓴᐦᐊᐧᐠ.
[12] ᓇᒪᐃᐧᔭ ᒫᑲ ᐊᔨᓯᔨᓂᐤ ᑳ ᑭ ᐅᐦᒋ ᒥᔨᐟ, ᒥᓇ ᓇᒪᐃᐧᔭ ᐊᔨᓯᔨᓂᐤ ᓄᐦᒋ ᑭᐢᑭᓄᐦᐊᒫᐠ, ᒫᑲ ᓂ ᑭ ᐅᑎᐦᑎᑯᐣ ᐁ ᑭᐢᑫᔨᑕᒧᐃᐟ ᒋᓴᐢ ᙭.
[13] ᒋᑫᒫ ᑭ ᑭ ᐯᐦᑌᓈᐋᐧᐤ ᑳ ᑭ ᐃᓯ ᐱᒫᑎᓯᔮᐣ ᑲᔮᐢ ᒍᐊᐧᐠ ᐅᐟ ᐃᓯᑖᐧᐃᐧᓂᐋᐧᕽ, ᑖᓂᓯ ᐃᓯ ᑳ ᑭ ᐃᓯ ᐊᔨᐋᐧᐠ ᑯᑕᑭᐊᑭᐠ ᑳ ᐊᔭᒥᐦᐁᐢᑕᐋᐧᒋᐠ ᑭᓭᒪᓂᑐᐊᐧ, ᒥᓇ ᑳ ᑭ ᓂᓯᐊᐧᓈᒋᐊᑭᐠ:
[14] ᐁᑯᓯ ᒍᐊᐧᐠ ᐅᐟ ᐃᓯᑖᐧᐃᐧᓂᐋᐧᕽ ᐁ ᑭ ᐊᔨᐋᐧᑭ ᑭᐢᑫᔨᑕᒫᐣ ᐃᔨᑯᕽ ᒥᐦᒉᐟ ᑳ ᐃᐧᒋ ᐃᐢᐱᑎᓯᒪᑭᐠ ᓂ ᐃᐧᑕᐢᑭᒫᑲᓇᐠ, ᐊᔨᐋᐧᐠ ᐁ ᑭ ᐋᑲᒣᔨᒧᑐᑕᒫᐣ ᐅᐟ ᐋᒋᒧᐃᐧᓂᐋᐧᐤ ᓄᑖᐃᐧᔭᐠ.
[15] ᒫᑲ ᐃᐢᐱ ᐁᓯ ᒥᔦᐧᔨᑕᕽ ᑭᓭᒪᓂᑐ, ᑳ ᑭ ᐱᐢᑭᑕᑭᒥᐟ ᐁ ᓂᐦᑖᐃᐧᑭᐃᐟ ᓂᑳᐃᐧᔭ ᐅᐦᒋ, ᒥᓇ ᑳ ᑭ ᓇᑐᒥᐟ ᐅ ᑭᓭᐋᐧᑎᓯᐃᐧᓂᕽ,
[16] ᑭᑕ ᑭᐢᑫᔨᑕᒧᐃᐟ ᐅᑯᓯᓴ, ᑭᑕ ᑭ ᐋᒋᒥᒪᐠ ᐁ ᐋᐧᐃᐧᑕᒪᐊᐧᑭᐠ ᒉᐣᑕᐃᓬᐊᐠ; ᓭᒫᐠ ᓇᒪᐃᐧᔭ ᐃᐧᔮᐢ ᒥᓇ ᒥᐦᑯ ᑳ ᑲᑫᐢᑭᒥᑯᔮᐣ;
[17] ᓇᒪᐃᐧᔭ ᒥᓇ ᓄᐦᒋ ᓇᑕᐋᐧᐸᒫᐊᐧᐠ ᒉᕒᐅᓴᓬᐊᒥᕽ ᐊᓂᑭ ᑳ ᑭ ᐊᐹᐢᑎᓬᐃᐃᐧᒋᐠ ᒪᐧᔦᐢ ᓂᔭ: ᒫᑲ ᐋᕒᐁᐱᔭ ᐊᐢᑭᕽ ᓂ ᑭ ᐃᑐᐦᑖᐣ; ᐁᑯᓯ ᒥᓇ ᓂ ᑭ ᐯ ᑭᐋᐧᐣ ᑕᒫᐢᑲᓯᕽ.
[18] ᐁᑲᐧ ᑳ ᓂᐢᑐ ᐊᐢᑭᐊᐧᕽ ᓂ ᑭ ᐃᑐᐦᑖᐣ ᒉᕒᐅᓴᓬᐊᒥᕽ ᑭᑕ ᑭᐅᑲᐊᐧᐠ ᓯᐹᐢ, ᒥᓇ ᓂ ᑭ ᐃᐧᒋ ᐊᔮᒫᐤ ᒥᑖᑕᐟ ᓂᔮᓇᓄᓵᑊ ᑕᐦᑐ ᑭᓯᑳᐤ.
[19] ᒫᑲ ᑯᑕᑲᐠ ᐊᐹᐢᑎᓬᐊᐠ ᓇᒪ ᐊᐃᐧᔭᐠ ᓄᐦᒋ ᐋᐧᐸᒫᐤ, ᐱᑯ ᒉᒥᐢ ᑳ ᑎᐯᔨᐦᒋᑫᐟ ᐅᒋᐋᐧᒪ.
[20] ᐁᑲᐧ ᐅᐦᐃ ᑳ ᒪᓯᓇᐦᐊᒫᑕᑯᐠ, ᒫᑎᑲ, ᐁ ᑲᓇᐋᐧᐸᒥᐟ ᑭᓭᒪᓂᑐ, ᓇᒪᐃᐧᔭ ᐱᑯᓇᑕ ᓂᐟ ᐃᑖᐧᐣ.
[21] ᐁᑲᐧ ᒫᑲ ᓂ ᑭ ᑕᑯᓯᓂᐣ ᓯᕒᐃᔭ ᒥᓇ ᓯᓬᐃᓯᔭ ᐊᐢᑭᕽ.
[22] ᑫᔮᐱᐨ ᒫᑲ ᓇᒪᐃᐧᔭ ᓂ ᑭᐢᑫᔨᒥᑲᐧᐠ ᓂᑳᐧᑲᓂᕽ ᐅᑎ ᐃᐧᔭ ᑭᑕ ᐋᐧᐸᒥᒋᐠ ᐅᑕᔭᒥᐦᐋᐊᐧᐠ ᒍᑎᔭᐃᕽ ᑳ ᑖᐯᐧᑕᐋᐧᒋᐠ ᙭ᐊ:
[23] ᐱᑯ ᑭ ᐯᑕᒪᐧᐠ ᐁ ᐃᑌᐧᐃᐧᐦᐟ, ᐊᓇ ᑳ ᑭ ᑯᑕᑭᐦᐃᑯᔭᕽ ᐁᑲᐧ ᑲᑫᐢᑭᒥᐁᐧᐤ ᐊᓂᒪ ᑖᐯᐧᔦᔨᑕᒧᐃᐧᐣ ᑳ ᑭ ᑌᐱ ᑭᑎᒪᐦᐋᐟ;
[24] ᐁᑯᓯ ᑭ ᑭᐢᑕᑭᒣᐊᐧᐠ ᑭᓭᒪᓂᑐᐊᐧ ᓂᔭ ᐅᐦᒋ.