[1] ᒣᑳᐧᐨ ᒫᑲ ᐁ ᑭᑐᑖᒋᐠ ᐊᔨᓯᔨᓂᐊᐧ, ᐊᔭᒥᐦᐁᐃᐧᔨᓂᐊᐧ ᒥᓇ ᑳ ᓯᒫᑲᓂᓯᐃᐧᑭᒫᑲᑕᕽ ᑭᐦᒋ ᐊᔭᒥᐦᐁᐃᐧᑲᒥᐠ ᒥᓇ ᓵᑐᓯᐊᐧ ᑭ ᐅᑎᐦᑎᑲᐧᐠ,
[2] ᒥᐢᑕᐦᐃ ᐁ ᒥᑯᐢᑳᑌᔨᑕᒥᐃᑯᔨᐟ ᐁ ᑭᐢᑭᓄᐦᐊᒪᐋᐧᒋᐠ ᐊᔨᓯᔨᓂᐊᐧ, ᒥᓇ ᐁ ᑌᐹᐧᑕᑭᐠ ᒋᓴᓴ ᐅᐦᒋ ᐊᐱᓯᓯᓄᐃᐧᐣ ᓂᐳᐃᐧᓂᕽ ᐅᐦᒋ.
[3] ᑭ ᐅᑎᑎᓂᑲᐧᐠ ᒫᑲ, ᒥᓇ ᑭ ᐸᑭᑎᓂᑲᐧᐠ ᑭᐸᐦᐅᑐᐃᐧᓂᕽ ᐃᐢᑯ ᑭᑕ ᐋᐧᐸᓂᔨᐠ, ᒋᑫᒫ ᓵᓴᐩ ᐁ ᐅᑖᑯᓯᓂᔨᐠ.
[4] ᒫᑲ ᒥᐦᒉᐟ ᐊᓂᑭ ᑳ ᐯᐦᑕᐦᑭᐠ ᐃᑌᐧᐃᐧᐣ ᑭ ᑖᐯᐧᑕᒪᐧᐠ; ᐁᑯᓯ ᓈᐣᑕᐤ ᓂᔮᓇᓈᐧᐤ ᑭᐦᒋ ᒥᑖᑕᐦᑐᒥᑕᓇᐤ ᑭ ᐊᑎ ᐃᑕᓯᐊᐧᐠ ᐊᓂᑭ ᐊᔨᓯᔨᓂᐊᐧᐠ.
[5] ᑭ ᐊᔨᑭᓂᔨᐤ ᒫᑲ ᐃᐧᔮᐸᓂᔨᐠ, ᐅᔭᓱᐁᐧᒥᐋᐧᐊᐧ ᒥᓇ ᑳ ᓂᑳᓀᔨᑖᑯᓯᔨᐟ ᒥᓇ ᒪᓯᓇᐦᐃᑫᐃᐧᔨᓂᐊᐧᐠ ᑭ ᒫᐊᐧᒋᐃᑐᐊᐧᐠ ᒉᕒᐅᓴᓬᐊᒥᕽ;
[6] ᐋᓇᐢ ᒥᓇ ᒫᐊᐧᒋ ᑭᐦᒋ ᐊᔭᒥᐦᐁᐃᐧᔨᓂᐤ ᐁᑯᑕ ᑭ ᐊᔮᐤ, ᒥᓇ ᑳᔭᐹᐢ, ᒥᓇ ᒑᐣ, ᒥᓇ ᐋᓬᐃᐠᓵᐣᑕᕒ, ᒥᓇ ᑕᐦᑐ ᑳ ᐅ ᐋᐧᑯᒫᑲᓂᐟ ᑭᐦᒋ ᐊᔭᒥᐦᐁᐃᐧᔨᓂᐤ.
[7] ᐃᐢᐱ ᒫᑲ ᑖᐊᐧᔨᕽ ᑳ ᐸᑭᑎᓈᒋᐠ, ᑭ ᑲᑫᐧᒋᒣᐊᐧᐠ, ᑫᑯ ᑲᐢᑭᐦᐁᐃᐧᓯᐃᐧᐣ ᐅᐦᒋ, ᐊᐦᐳ ᐊᐁᐧᓇ ᐅ ᐃᐧᔪᐃᐧᓂᕽ, ᐅᒪ ᑳ ᑭ ᐃᑐᑕᒣᐠ?
[8] ᐁᑲᐧ ᐱᑕᕒ, ᐁ ᒧᐢᑭᓀᐢᑳᑯᐟ ᑳ ᑲᓈᑎᓯᔨᐟ ᐊᒑᐦᑲᐧ, ᑭ ᐃᑌᐤ, ᑭᔭᐋᐧᐤ ᐊᔨᓯᔨᓂᐊᐧᐠ ᐅᔭᓱᐁᐧᐃᐧᔨᓂᒥᐋᐧᐊᐧ, ᒥᓇ ᑳ ᓂᑳᓀᔨᑖᑯᓯᔦᐠ,
[9] ᑭᐢᐱᐣ ᓂ ᐃᐧ ᑲᑫᐧᒋᒥᑲᐃᐧᓈᐣ ᐊᓄᐦᐨ ᑳ ᑭᓯᑳᐠ ᒥᔪ ᑫᑲᐧᐩ ᐁ ᑭ ᐃᑐᑖᐦᐟ ᐁᑳ ᐁ ᑭ ᐊᐧᐢᑲᐃᐧᑖᐟ ᓈᐯᐤ, ᑖᓂᓯ ᑳ ᐃᓯ ᒥᓈᐧᒋᐃᐦᐟ ᐊᐊᐧ ᓈᐯᐤ;
[10] ᑭᐢᑫᔨᑕᒧᐠ ᑲᐦᑭᔭᐤ ᑳ ᐃᑕᓯᔦᐠ, ᒥᓇ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧᐠ ᐅ ᐃᐧᔪᐃᐧᓂᕽ ᒋᓴᐢ ᙭ ᓈᓴᕒᐃᑎᕽ ᑯᐦᒋᐟ, ᑳ ᑭ ᒋᐢᑕᐦᐋᐢᑳᐧᑖᔦᐠ, ᑭᓭᒪᓂᑐ ᑳ ᑭ ᐊᐧᓂᐢᑳᓈᐟ ᓂᐳᐃᐧᓂᕽ ᐅᐦᒋ, ᐁᐊᐧᑯ ᐅᐦᒋ ᐊᐊᐧ ᓈᐯᐤ ᐅᑕ ᑳ ᐅᑎᐢᑲᐃᐧᑳᐸᐃᐧᐢᑖᑯᔦᐠ ᒥᑐᓂ ᐁ ᒥᔪ ᐊᔮᐟ.
[11] ᐁᐊᐧᑯ ᐊᓇ ᐊᓯᓂ ᑳ ᑭ ᐋᑕᐁᐧᔨᒫᔦᐠ ᑭᔭᐋᐧᐤ ᐅᐋᐧᐢᑳᐃᑲᓂᑫᐊᐧᐠ, ᑳ ᑭ ᑭᐢᑕᔨᐦᐟ ᑭᑫᑕᑲᕽ.
[12] ᓇᒪᐃᐧᔭ ᑯᑕᐠ ᐊᐃᐧᔭᐠ ᐱᒫᒋᐦᐃᐁᐧᐃᐧᐣ ᐊᔮᐤ: ᒋᑫᒫ ᓇᒪᐃᐧᔭ ᑯᑕᐠ ᐃᐧᔪᐃᐧᐣ ᐃᐦᑕᑲᐧᐣ ᓯᐹ ᑭᓯᑯᕽ, ᑳ ᒣᑭᓈᓂᐊᐧᕽ ᐊᔨᓯᔨᓂᓈᕽ, ᐃᑕ ᑭᑕ ᑭ ᐅᐦᒋ ᐱᒫᒋᐦᐅᔭᕽ.
[13] ᐃᐢᐱ ᒫᑲ ᐃᐧᔮᐸᐦᑕᒫᐧᒋᐠ ᐅ ᓱᑫᔨᒧᐃᐧᓂᔨᐤ ᐱᑕᕒᐊ ᒥᓇ ᒑᓇ, ᐁᑯᓯ ᐁ ᑭ ᑭᐢᑫᔨᑕᐦᑭᐠ ᐁᑯᑐᐃᐧ ᐊᔨᓯᔨᓂᐊᐧᐠ ᐁᑳ ᑳ ᑭ ᑭᐢᑭᓄᐦᐊᒫᒋᐠ ᒥᓇ ᐁᑳ ᑳ ᐅᑭᐢᑫᔨᑕᒧᐃᐧᓂᒋᐠ, ᑭ ᒫᒪᐢᑳᑕᒪᐧᐠ, ᐁᑯᓯ ᑭ ᒪᓂ ᑭᐢᑫᔨᒣᐊᐧᐠ ᐁ ᑭ ᐃᐧᒉᐋᐧᔨᐟ ᒋᓴᓴ.
[14] ᒥᓇ ᐁ ᐋᐧᐸᒫᒋᐠ ᐊᓂᐦᐃ ᓈᐯᐊᐧ ᑳ ᑭ ᒥᓈᐧᒋᐃᒥᐦᐟ ᐁ ᐃᐧᒋᑳᐸᐃᐧᐢᑖᑯᔨᐟ, ᓇᒪ ᓈᓇᑕᐤ ᑭ ᐃᓯ ᐋᓀᐧᔨᑕᒪᐧᐠ.
[15] ᒫᑲ ᐃᐢᐱ ᑳ ᐃᑕᓱᐋᐧᑖᒋᐠ ᐅᐱᒣ ᑭᑕ ᐃᑐᐦᑌᔨᐟ ᐅᔭᓱᐁᐧᐃᐧᓂᕽ ᐅᐦᒋ, ᐃᐧᔭᐋᐧ ᑭ ᐅᔭᓱᐁᐧᐊᐧᐠ,
[16] ᐁ ᐃᑌᐧᒋᐠ, ᑖᓂᓯ ᑫ ᑐᑕᐋᐧᔭᑯᐠ ᐅᑭ ᐊᔨᓯᔨᓂᐊᐧᐠ? ᒋᑫᒫ ᑖᐯᐧ ᐁ ᐋᑐᑖᑲᐧᓂᔨᐠ ᒪᒫᑖᐃᐧ ᐃᓯᐦᒋᑫᐃᐧᐣ ᐁ ᑭ ᐃᑐᒋᑳᑌᐠ ᐃᐧᔭᐋᐧᐤ ᐅᐦᒋ, ᑲᐦᑭᔭᐤ ᐋᐧᐸᐦᑕᒪᐧᐠ ᒉᕒᐅᓴᓬᐊᒥᕽ ᑳ ᐊᔮᒋᐠ; ᓇᒪᐃᐧᔭ ᒫᑲ ᑭᑕ ᑭ ᐋᓀᐧᑕᒪᕽ.
[17] ᒫᑲ ᐁᑳ ᐊᐊᐧᓯᒣ ᑭᑕ ᓯᐯᐧᐸᔨᐠ ᐊᔨᓯᔨᓂᓈᕽ, ᑭᔮᑦ ᐊᓱᒫᑖᓂᐠ, ᐁᑳ ᐃᐧᑳᐨ ᒥᓇ ᑭᑕ ᑕᓯᑕᒪᐋᐧᒋᐠ ᐊᐃᐧᔭ ᐊᔨᓯᔨᓂᐊᐧ ᐅᒪ ᐃᐧᔪᐃᐧᐣ.
[18] ᐁᑲᐧ ᒫᑲ ᑭ ᓇᑐᒣᐊᐧᐠ, ᒥᓇ ᑭ ᐊᔮᑳᐧᒥᒣᐊᐧᐠ ᐁᑳ ᑭᑕ ᑕᓯᑕᒥᔨᐟ ᐊᐦᐳ ᑭᑕ ᑭᐢᑭᓄᐦᐊᒫᑫᔨᐟ ᐅ ᐃᐧᔪᐃᐧᓂᔨᐤ ᒋᓴᓴ.
[19] ᒫᑲ ᐱᑕᕒ ᒥᓇ ᒑᐣ ᑭ ᓇᐢᑫᐧᐊᐧᓯᒣᐊᐧᐠ ᐅᒥᓯ ᐁ ᑭ ᐃᑖᒋᐠ, ᑭᐢᐱᐣ ᒣᔮᐧᓯᓄᑫᐧ ᐁ ᐃᓯ ᐋᐧᐸᐦᑕᕽ ᑭᓭᒪᓂᑐ ᓇᐊᐧᐨ ᑭᔭᐋᐧᐤ ᑭᑕ ᓇᑐᑖᑲᐃᐧᔦᐠ ᐃᐢᐱᐦᐨ ᑭᓭᒪᓂᑐ, ᑭᔭᐋᐧᐤ ᐅᔭᓱᐋᐧᑕᒧᐠ:
[20] ᒋᑫᒫ ᐱᑯ ᑭᑕ ᐃᐧᐦᑕᒫᕽ ᐊᓂᐦᐃ ᑳ ᑭ ᐋᐧᐸᐦᑕᒫᕽ ᒥᓇ ᑳ ᑭ ᐯᑕᒫᕽ.
[21] ᐃᐧᔭᐋᐧᐤ ᒫᑲ, ᐃᐢᐱ ᐊᐊᐧᓯᒣ ᑳ ᐊᓱᒫᒋᐠ, ᑭ ᐸᑭᑎᓀᐊᐧᐠ ᐁᑳ ᑫᑲᐧᐩ ᐁ ᒥᐢᑲᐦᑭᐠ ᑭᑕ ᐃᓯ ᐅᔭᓱᐋᐧᑖᒋᐠ, ᒋᑫᒫ ᐊᔨᓯᔨᓂᐊᐧ ᐅᐦᒋ; ᐃᐧᔭ ᑲᑭᔭᐤ ᐊᔨᓯᔨᓂᐊᐧᐠ ᐁ ᑭᐢᑕᑭᒫᒋᐠ ᑭᓭᒪᓂᑐᐊᐧ ᐊᓂᒪ ᐅᐦᒋ ᑳ ᑭ ᐃᑐᒋᑳᑌᔨᐠ.
[22] ᐃᐧᔭ ᐊᓇ ᓈᐯᐤ ᐊᐊᐧᓯᒣ ᓀᒥᑕᓇᐤ ᐁ ᐃᑕᐦᑐᐱᐳᓀᐧᐟ, ᐅᒪ ᑳ ᑭ ᐃᓯ ᒪᒫᑖᐃᐧ ᒥᓈᐧᒋᐃᐦᐟ.
[23] ᐃᐢᐱ ᒫᑲ ᑳ ᐸᑭᑎᓂᐦᒋᐠ, ᑭ ᐯ ᓇᑕᐋᐧᐸᒣᐊᐧᐠ ᐃᐧᔭᐋᐧᐤ ᐅ ᐃᐧᒉᐋᐧᑲᓂᐋᐧᐊᐧ, ᒥᓇ ᑭ ᐋᒋᒧᐊᐧᐠ ᑲᐦᑭᔭᐤ ᐊᓂᒪ ᑭᐦᒋ ᐊᔭᒥᐦᐁᐃᐧᔨᓂᐊᐧ ᒥᓇ ᑳ ᓂᑳᓀᔨᑖᑯᓯᔨᐟ ᑳ ᑭ ᐃᑎᑯᒋᐠ.
[24] ᐃᐧᔭᐋᐧ ᒫᑲ, ᐃᐢᐱ ᐱᔦᐦᑕᐦᑭᐠ, ᑭ ᒫᒪᐃᐧ ᐅᐱᓇᒪᐁᐧᐊᐧᐠ ᑭᓭᒪᓂᑐᐊᐧ ᐅᐟ ᐃᑌᐧᐃᐧᓂᐋᐧᐤ, ᐅᒥᓯ ᐁ ᐃᑌᐧᒋᐠ, ᐋ ᑌᐯᔨᐦᒋᑫᔭᐣ, ᑭᔭ ᑳ ᑭ ᐅᓯᐦᑖᔭᐣ ᑭᐦᒋ ᑭᓯᐠ ᒥᓇ ᐊᐢᑭ ᒥᓇ ᑭᐦᒋᑲᒥ, ᒥᓇ ᑲᐦᑭᔭᐤ ᐁᑯᑕ ᑳ ᐊᔮᒋᐠ:
[25] ᑳ ᑭ ᐃᑌᐧᔭᐣ ᑳ ᑲᓈᑎᓯᐟ ᐊᐦᒑᕽ ᐅᐦᒋ, ᐅᑐᓂᔨᕽ ᐅᐦᒋ ᓄᑖᐃᐧᓈᓇ ᑌᐱᐟ ᑭᐟ ᐊᑐᐢᑫᔮᑲᐣ, ᑖᓀᑭ ᒉᐣᑖᐃᓬᐊᐠ ᑳ ᑭ ᑭᓯᐋᐧᓯᒋᐠ, ᒥᓇ ᐊᔨᓯᔨᓂᐊᐧᐠ ᐸᑲᐧᓇᑕ ᑫᑲᐧᐩ ᑳ ᑭ ᐃᑌᔨᑕᐦᑭᐠ?
[26] ᑭᐦᒋ ᐅᑭᒫᐊᐧᐠ ᐅᑕ ᐊᐢᑭᕽ ᑭ ᐊᐧᐁᐧᔨᑳᐸᐃᐧᐊᐧᐠ, ᒥᓇ ᐅᔭᓱᐁᐧᐊᐧᐠ ᑭ ᒫᐊᐧᒋᐃᑐᐊᐧᐠ, ᐁ ᓇᑳᐢᑲᐋᐧᒋᐠ ᑳ ᑎᐯᔨᐦᒋᑫᔨᐟ ᒥᓇ ᐅ ᙭ᐃᒥᔨᐊᐧ:
[27] ᒋᑫᒫ ᑖᐯᐧ ᐅᒪ ᐅᑌᓈᕽ, ᑖᐱᐢᑯᐨ ᐁᕒᐊᐟ ᒥᓇ ᐸᐣᑎᔭᐢ ᐸᐃᓬᐊᐟ, ᐊᓯᒋ ᒉᐣᑖᐃᓬᐊᐠ ᒥᓇ ᐃᐢᕒᐁᐃᓬ ᐊᔨᓯᔨᓂᐊᐧᐠ, ᑭ ᒫᐊᐧᒋᐃᓱᐢᑕᐁᐧᐊᐧᐠ ᑳ ᑲᓈᑎᓯᔨᐟ ᑭᐟ ᐊᑐᐢᑫᔮᑲᓇ ᒋᓴᓴ, ᑳ ᑭ ᐅᔭᑭᒥᒪᐟ,
[28] ᑭᑕ ᐃᑐᑕᐦᑭᐠ ᒥᓇ ᐱᑯ ᑫᑲᐧᐩ ᑭᒋᐦᒋ ᒥᓇ ᑯᔭᓱᐁᐧᐃᐧᐣ ᐅᐦᒋ ᓂᔮᐠ ᑳ ᑭ ᐅᔭᐢᑌᐠ ᑭᑕ ᐃᐢᐸᔨᐠ.
[29] ᐁᑲᐧ ᒫᑲ, ᑌᐯᔨᐦᒋᑫᔭᐣ, ᑲᓇᐋᐧᐸᐦᑕᑦ ᐅᐟ ᐊᓱᒥᐁᐧᐃᐧᓂᐋᐧᐊᐧ: ᐁᑯᓯ ᐸᑭᑌᔨᑕᒪᐃᐧᐠ ᑭᐟ ᐊᑐᐢᑫᔮᑲᓇᐠ ᑭᑕ ᑭ ᐃᐧᐦᑕᐦᑭᐠ ᑭᐟ ᐊᔭᒥᐃᐧᐣ ᒥᓯᐁᐧ ᓱᑫᔨᒧᐃᐧᓂᕽ,
[30] ᐁ ᐃᐢᐱᒋ ᓱᐃᐧᓂᐢᑫᔨᔭᐣ ᑭᑕ ᐃᔨᓂᑲᐃᐁᐧᔭᐣ; ᒥᓇ ᑭᐢᑭᓇᐋᐧᒋ ᐃᓯᐦᒋᑫᐃᐧᓇ ᒥᓇ ᒪᒫᑖᐃᐧ ᐃᓯᐦᒋᑫᐃᐧᓇ ᑭᑕ ᑭ ᐃᑐᒋᑳᑌᑭ ᐅ ᐃᐧᔪᐃᐧᓂᕽ ᑭ ᑲᓈᒋ ᐊᑐᐢᑫᔮᑲᐣ ᒋᓴᐢ.
[31] ᐃᐢᐱ ᒫᑲ ᑳ ᐊᔭᒥᐦᐋᒋᐠ, ᐃᑕ ᐊᓂᒪ ᑳ ᒫᐊᐧᒋᐃᑐᒋᐠ ᑭ ᐊᐧᐢᑲᐃᐧᐸᔨᐤ; ᐁᑯᓯ ᑲᐦᑭᔭᐤ ᑭ ᒧᐢᑭᓀᐢᑳᑲᐧᐠ ᑳ ᑲᓈᑎᓯᔨᐟ ᐊᐦᒑᐦᑲᐧ, ᒥᓇ ᑭ ᐃᐧᐦᑕᒪᐧᐠ ᑭᓭᒪᓂᑐ ᐅᐟ ᐊᔭᒥᐃᐧᐣ ᓱᑫᔨᒧᐃᐧᓂᕽ.
[32] ᐁ ᒫᒪᐁᐧᔭᑎᒋᐠ ᒫᑲ ᐊᓂᑭ ᑳ ᑖᐯᐧᑕᐦᑭᐠ ᑭ ᐯᔭᑲᐧᐣ ᒥᑌᐦ ᒥᓇ ᑭ ᐯᔭᑯ ᐊᐦᒑᕽ: ᐁᑯᓯ ᓇᒪᐋᐧᐨ ᐯᔭᐠ ᐃᑌᐧᐤ ᓈᐣᑕᐤ ᑫᑲᐧᐩ ᑳ ᐊᔮᐟ ᐃᐧᔭ ᐁ ᑎᐱᔭᐁᐧᐃᐧᓯᐟ; ᒫᑲ ᑲᐦᑭᔭᐤ ᑫᑳᐧᐩ ᒫᒪᐃᐧ ᑭ ᐋᐸᒋᑖᐊᐧᐠ.
[33] ᑭᐦᒋ ᒪᐢᑲᐃᐧᓯᐃᐧᓂᕽ ᒫᑲ ᐊᐹᐢᑎᓬᐊᐠ ᑭ ᐋᑐᑕᒪᐧᐠ ᐅᐟ ᐋᐱᓯᓯᓄᐃᐧᓂᔨᐤ ᑳ ᑎᐯᔨᐦᒋᑫᔨᐟ ᒋᓴᓴ: ᒥᓇ ᑭᐦᒋ ᓂᓱᑲᒫᑯᐃᐧᐣ ᑲᐦᑭᔭᐤ ᑭ ᐅᑎᐦᑎᑲᐧᐠ.
[34] ᐃᐧᔭ ᓇᒪᐃᐧᔭ ᒥᓇ ᐊᐃᐧᔭᐠ ᓈᐣᑕᐤ ᑫᑲᐧᐩ ᑭᐧᑕᒫᐤ: ᒋᑫᒫ ᑕᐦᑐ ᐁ ᐊᔮᒋᐠ ᐊᐢᑭᔭ ᐊᐦᐳ ᐋᐧᐢᑳᐦᐃᑲᓇ ᑭ ᐊᑖᐋᐧᑫᐊᐧᐠ, ᐁ ᐃᓯ ᐅᐦᑎᓯᒋᐠ ᐊᓇᐃ ᑳ ᐊᑖᐋᐧᑫᒋᐠ,
[35] ᐁ ᐊᐢᑖᒋᐠ ᐊᐹᐢᑎᓬᐊ ᐅᓯᑎᔨᕽ: ᐁᑯᑕ ᐅᐦᒋ ᒐᒉᑊ ᐁ ᒥᔨᐦᒋᐠ ᐱᑯ ᐊᐃᐧᔭᐠ ᐁ ᐃᓯ ᑭᐧᑕᒫᐟ.
[36] ᒍᓯᑊ ᒫᑲ, ᐹᕒᓇᐸᐢ ᑳ ᐃᓯ ᐊᐢᐱᔨᑳᑎᑯᐠ ᐊᐹᐢᑎᓬᐊ (ᐁᐊᐧᑳᐧᓂᒪ ᐁ ᐃᑌᐧᐢᑕᒪᐋᐧᑕᒥᕽ, ᑳ ᐅᑯᓯᓯᒥᑯᐟ ᓯᑭᑫᒧᐃᐧᐣ,) ᓬᐃᐸᐃᐟ ᑐᐊᐧ, ᓵᐃᐸᕒᐊᐢ ᐁ ᐅᑕᐢᑳᓀᓯᐟ,
[37] ᑭᐢᑎᑳᐣ ᐁ ᐊᔮᐟ, ᑭ ᐊᑖᐋᐧᑫᐤ, ᒥᓇ ᑭ ᐯᓯᐁᐧᐤ ᓱᓂᔮᐊᐧ, ᐁᑯᓯ ᑭ ᐸᑭᑎᓀᐤ ᐊᐹᐢᑎᓬᐊ ᐅᓯᑎᔨᕽ.