[1] ᐯᐢᑕᐢ ᒫᑲ, ᐁ ᑭ ᑕᑯᓯᕽ ᐁᑯᑕ ᐁ ᐱᐢᑭᑕᑭᑌᐠ ᐊᐢᑭ, ᑳ ᓂᐢᑐ ᑭᓯᑳᔨᐠ ᑭ ᐃᑐᐦᑌᐤ ᒉᕒᐅᓴᓬᐊᒥᕽ ᓯᓴᕒᐃᔭᐃᕽ ᐅᐦᒋ.
[2] ᑭᐦᒋ ᐊᔭᒥᐦᐁᐃᐧᔨᓂᐊᐧ ᒫᑲ ᒥᓇ ᒍᐊᐧᐠ ᐅᑭᐦᒋᔨᓂᒥᐋᐧᐊᐧ ᑭ ᐋᒋᒧᐢᑖᐠ ᐁ ᒪᒥᓯᒫᔨᐟ ᐹᓬᐊ; ᐁᑯᓯ ᑭ ᑳᑭᓯᒧᑐᑖᐠ,
[3] ᐁ ᑲᑫᐧᒋᒥᑯᐟ ᑭᑕ ᐃᓯ ᒥᔪᑳᑯᒋᐠ, ᑭᑕ ᓈᒋᑎᓴᐋᐧᐟ ᐁᑯᑕ ᒉᕒᐅᓴᓬᐊᒥᕽ; ᐁ ᐊᓱᐊᑭᐠ ᑭᑕ ᓂᐸᐦᐋᒋᐠ ᓇᔦᐋᐧᒋ ᒣᐢᑲᓈᕽ.
[4] ᒫᑲ ᐯᐢᑕᐢ ᐃᓯ ᓇᐢᑫᐧᐊᐧᓯᒣᐤ, ᐹᓬᐊ ᐁ ᑲᓇᐁᐧᔨᑖᑯᓯᔨᐟ ᐁᑯᑕ ᓯᓴᕒᐃᔭᐃᕽ, ᐁᑯᓯ ᒫᑲ ᐃᐧᔭ ᒥᓇ ᐃᐧᐸᐨ ᐁᑯᑌ ᑭᑕ ᐃᑐᐦᑌᐟ.
[5] ᑭᔮᑦ ᒫᑲ, ᑭ ᐃᑌᐧᐤ, ᑖᓈᓇ ᐁ ᐅᑲᐢᑭᐁᐃᐧᓯᐃᐧᓂᐟ ᑭᔭᐋᐧᐤ, ᓂ ᑲ ᐃᓯ ᐃᐧᒉᐃᐧᐠ, ᑭᐢᐱᐣ ᒫᑲ ᓈᓇᑕᐤ ᑲ ᐃᓯ ᒫᔨᐃᓯᒋᑫᑫᐧ ᐁᐊᐧᑯ ᓈᐯᐤ, ᑭᔮᑦ ᑭᑕ ᒪᒥᓯᒣᐊᐧᐠ.
[6] ᐃᐢᐱ ᒫᑲ ᑳ ᐃᐧᒋᐊᔮᒫᐟ ᓇᒪᐃᐧᔭ ᐊᐊᐧᓯᒣ ᐊᔨᓈᓀᐤ ᐊᐦᐳ ᒥᑖᑕᐟ ᑭᓯᑳᐤ, ᑭ ᐃᑐᐦᑌᐤ ᓯᓴᕒᐃᔭᐃᕽ; ᐁᑯᓯ ᐃᐧᔮᐸᓂᔨᐠ ᑭ ᐊᐱᐤ ᐅᔭᓱᐁᐧᐊᐧᐱᐃᐧᓂᕽ, ᒥᓇ ᑭ ᐃᑕᓱᐁᐧᐤ ᐹᓬᐊ ᑭᑕ ᐯᓯᒥᐦᐟ.
[7] ᐃᐢᐱ ᒫᑲ ᑌᑯᓯᓂᔨᐟ, ᒍᐊᐧᐠ ᒉᕒᐅᓴᓬᐊᒥᕽ ᑳ ᑭ ᐯ ᐅᑐᑌᒋᐠ ᑭ ᐋᐧᐢᑳᑳᐸᐃᐧᐢᑕᐁᐧᐊᐧᐠ, ᒥᐦᒉᐟ ᑫᑲᐧᐩ ᒥᓇ ᐁ ᐊᔨᒪᓂᔨᑭ ᐁ ᐃᓯ ᒪᒥᓯᒫᒋᐠ, ᐁᑳ ᒫᑲ ᐁ ᑭ ᑖᐯᐧᑎᑖᒋᐠ;
[8] ᐁᑲᐧ ᐃᐧᔭ ᐹᓬ ᐁ ᐱᑭᐢᑫᐧᐢᑕᒫᓱᐟ, ᑭ ᐃᑌᐧᐤ, ᐅᔭᓱᐁᐧᐃᐧᓂᐋᐧᐤ ᒍᐊᐧᐠ, ᐊᐦᐳ ᑭᐦᒋ ᐊᔭᒥᐦᐁᐃᐧᑲᒥᐠ, ᐊᐦᐳ ᓯᓴᕒ ᓇᒪᐃᐧᔭ ᓈᓂᑕᐤ ᓄᐦ ᐊᐧᓂᑐᑌᐣ.
[9] ᒫᑲ ᐯᐢᑕᐢ, ᑭᑕ ᐅᐦᒋ ᒥᔦᐧᔨᒥᑯᐟ ᒍᐊᐧ, ᑭ ᓇᐢᑫᐧᐊᐧᓯᒣᐤ ᐹᓬᐊ, ᒥᓇ ᑭ ᐃᑌᐤ, ᑭ ᐃᐧ ᐃᑐᐦᑖᐣ ᒋ ᒉᕒᐅᓴᓬᐊᒥᕽ, ᐁᑯᑕ ᒫᑲ ᑭᑕ ᐅᔭᓱᐋᐧᑎᑲᐃᐧᔭᐣ ᐅᐦᐃ ᓂᔭ ᐁ ᑭᑖᐸᑕᒫᑖᐣ?
[10] ᒫᑲ ᐹᓬ ᑭ ᐃᑌᐧᐤ, ᓄᑎᐢᑲᐃᐧᑳᐸᐃᐧᐢᑕᒫᐧᐣ ᓯᓴᕒ ᐅᔭᓱᐁᐧᐊᐧᐱᐃᐧᐣ, ᐃᑕ ᐁ ᐃᑕᐢᑌᐠ ᑭᑕ ᐅᔭᓱᐋᐧᑎᑲᐃᐧᔮᐣ: ᓇᒪᐃᐧᔭ ᓈᓂᑕᐤ ᓄᐦᒋ ᐊᐧᓂᑐᑕᐋᐧᐊᐧᐠ ᒍᐊᐧᐠ, ᐁᐊᐧᑯ ᑭᐢᑕ ᑭ ᑭᐢᑫᔨᑌᐣ.
[11] ᑭᐢᐱᐣ ᒫᑲ ᑳ ᐊᐧᓂᑐᑕᒧᐋᐧᓀ, ᒥᓇ ᑳ ᐃᓯᐦᒋᑫᐋᐧᓀ ᑭᑕ ᑲᐢᑭᑕᒫᓱᔮᐣ ᓂᐳᐃᐧᐣ, ᓇᒪᐃᐧᔭ ᓂ ᓵᑫᐧᔨᒧᐣ ᑭᑕ ᓂᐱᔮᐣ: ᒫᑲ ᑭᐢᐱᐣ ᓇᒪᐃᐧᔭ ᑖᐯᐧᐊᐧᐠ ᓈᐣᑕᐤ ᐅᐦᐃ ᑳ ᐊᑖᒥᒥᒋᐠ, ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᓂ ᑲ ᑭ ᐸᑭᑎᓂᐠ ᑭᑕ ᐅᑎᓂᒋᐠ. ᓯᓴᕒ ᑭᑕ ᐅᔭᓱᐋᐧᓯᐟ ᓂ ᓇᑐᑌᐣ.
[12] ᐁᑲᐧ ᒫᑲ ᐯᐢᑕᐢ, ᐃᐢᐱ ᑳ ᐅᔦᔨᑕᐦᑭᐠ ᐃᐧᔭ ᒥᓇ ᐅᔭᓱᐁᐧᐊᐧ, ᑭ ᓇᐢᑫᐧᐊᐧᓯᒣᐤ, ᑭ ᑭ ᓇᑐᑌᐣ ᓯᓴᕒ ᑭᑕ ᐅᔭᓱᐋᐧᑎᐢᐠ: ᓯᓴᕒ ᒫᑲ ᑭ ᑲ ᓈᑖᐤ.
[13] ᐁᑲᐧ ᒥᓇ ᑭᓯᑳᐊᐧ ᑳ ᒪᔮᐢᑲᒧᐸᔨᑭ, ᐊᐠᕒᐃᐸ ᑭᐦᒋ ᐅᑭᒫᐤ, ᒥᓇ ᐸᕒᓇᐃᓯ, ᑭ ᑕᑯᓯᓇᐧᐠ ᓯᓴᕒᐃᔭᐃᕽ, ᒥᓇ ᑭ ᐊᑕᒥᐢᑲᐁᐧᐊᐧᐠ ᐯᐢᑕᓴ.
[14] ᐁᑯᑕ ᒫᑲ ᒥᒉᑐᑭᓯᑳᐤ ᐁ ᐊᔮᔨᐟ, ᐯᐢᑕᐢ ᑭ ᐊᐧᐃᐧᑕᒪᐁᐧᐤ ᑭᐦᒋ ᐅᑭᒫᐊᐧ ᐹᓬᐊ ᐅᐟ ᐃᓯ ᐊᔮᐃᐧᓂᔨᐤ, ᐁ ᐃᑌᐧᐟ, ᐅᑕ ᐯᔭᐠ ᐊᔨᓯᔨᓂᐤ ᐊᔮᐤ ᐁ ᑭ ᐃᓯ ᓇᑲᑎᑯᐟ ᐱᓬᐃᐠᓴ ᐁ ᑭᐸᐃᑳᓱᐟ:
[15] ᐁᐊᐧᑯ ᒫᑲ, ᒉᕒᐅᓴᓬᐊᒥᕽ ᒣᑳᐧᐨ ᐁ ᐊᔮᔮᐣ, ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᑳ ᓂᑳᓀᔨᑖᑯᓯᒋᐠ ᒍᐊᐧᐠ ᓂ ᑭ ᐋᒋᒧᐢᑖᑲᐧᐠ, ᐁ ᓇᑕᐁᐧᔨᑕᐦᑭᐠ ᑭᑕ ᐅᔭᓱᐋᐧᑎᒥᐦᐟ.
[16] ᐁᐊᐧᑯᓂᐠ ᓂ ᑭ ᓇᐢᑫᐧᐊᐧᓯᒫᐊᐧᐠ, ᐁᑳ ᐁ ᐃᓯᐦᒋᑫᒋᐠ ᕒᐅᒪᓇᐠ ᐊᐃᐧᔭ ᐊᔨᓯᔨᓂᐊᐧ ᐁᑯᓯ ᑭᑕ ᐃᓯ ᐸᑭᑎᓈᒋᐠ, ᒪᐧᔦᐢ ᐊᓇ ᑳ ᒪᒥᓯᒥᐦᐟ ᑭ ᐅᑎᐢᑲᐃᐧᐢᑲᐋᐧᐟ ᐊᓂᐦᐃ ᑳ ᒪᒥᓯᒥᑯᐟ, ᐁᑯᓯ ᑭᑕ ᑭ ᐱᑭᐢᑫᐧᐢᑕᒫᓱᐟ ᐊᓂᒪ ᐅᐦᒋ ᑳ ᐃᓯ ᐊᑖᒥᒥᐦᐟ.
[17] ᐃᐢᐱ ᒫᑲ ᐅᑌ ᐁ ᐯ ᒫᒪᐃᐧ ᐃᑐᐦᑌᒋᐠ, ᓇᒪᐃᐧᔭ ᓄᐦᒋ ᐅᑕᒥ ᐊᔮᐣ, ᒫᑲ ᓭᒫᐠ ᐁ ᐊᑎ ᐋᐧᐸᕽ ᓂ ᑭ ᐊᐱᐣ ᐅᔭᓱᐁᐧᐊᐧᐱᐃᐧᓂᕽ, ᒥᓇ ᓂ ᑭ ᐃᑕᓱᐋᐧᐣ ᐊᓇ ᓈᐯᐤ ᑭᑕ ᐯᓯᐦᐟ.
[18] ᐁᑯᓯ ᐁᐊᐧᑯ, ᐃᐢᐱ ᐅᒪᒥᓯᒥᐁᐧᐊᐧᐠ ᓂᐸᐃᐧᒋᐠ, ᓇᒪᐃᐧᔭ ᐊᑖᒥᒣᐊᐧᐠ ᑐᐃᐧ ᒪᒋ ᑫᑲᐧᐩ ᑳ ᑭ ᐃᑌᔨᑕᒫᐣ,
[19] ᒫᑲ ᑭ ᐊᑖᒥᒣᐊᐧᐠ ᓈᐣᑕᐤ ᑲᑫᐧᒋᑐᐃᐧᓇ ᐃᐧᔭᐋᐧᐤ ᐅᐟ ᐃᓯ ᐊᔭᒥᐦᐋᐃᐧᓂᐋᐧᐤ ᐅᐦᒋ, ᒥᓇ ᐊᐃᐧᔭ ᒋᓴᐢ ᐁ ᐃᓯᔨᐦᑳᓱᔨᐟ, ᑳ ᑭ ᓂᐱᐟ, ᒫᑲ ᐃᐧᔭ ᐹᓬ ᐱᒫᑎᓯᐤ ᐁ ᐃᑌᐧᐟ.
[20] ᓂᔭ ᒫᑲ, ᐁ ᐊᐧᐋᐧᓀᔨᑕᒫᐣ ᑖᓂᓯ ᑭᑕ ᐃᓯ ᓇᑐᐢᑲᒫᐣ ᐅᐦᐃ, ᓂ ᑭ ᑲᑫᐧᒋᒫᐤ ᑭᐢᐱᐣ ᑌᐯᔨᒧ ᑭᑕ ᐃᑐᐦᑌᐟ ᒉᕒᐅᓴᓬᐊᒥᕽ, ᐁᑯᑕ ᒫᑲ ᑭᑕ ᐅᔭᓱᐋᐧᑎᐦᐟ ᐅᐦᐃ ᐊᑖᒥᒥᑯᐃᐧᓇ.
[21] ᒫᑲ ᐃᐢᐱ ᐹᓬ ᑳ ᓇᑐᑕᕽ ᑭᑕ ᑲᓇᐁᐧᔨᒥᐦᐟ ᑭᑕ ᐅᔮᓱᐋᐧᑎᑯᐟ ᒫᐊᐧᒋ ᑭᐦᒋ ᐅᑭᒫᐊᐧ, ᓂ ᑭ ᐃᑕᓱᐋᐧᐣ ᑭᑕ ᑲᓇᐁᐧᔨᒥᐦᐟ ᐃᐢᑯ ᑭᑕ ᑭ ᐃᓯᑎᓴᐊᐧᐠ ᑭᑕ ᓈᑖᐟ ᓯᓴᕒᐊ.
[22] ᐁᑯᓯ ᐊᐠᕒᐃᐸ ᑭ ᐃᑌᐤ ᐯᐢᑕᓴ, ᓂᔭ ᒥᓇ ᓂ ᑳᐦ ᐃᑌᔨᑌᐣ ᑫᐦᒋᐋᐧᐠ ᑭᑕ ᐯᑕᐊᐧᐠ ᐁᐊᐧᑳᐧᓇ ᓈᐯᐤ. ᐋᐧᐸᐦᑭ, ᐃᑌᐤ, ᑭ ᑲ ᐯᑕᐋᐧᐤ.
[23] ᐁᑯᓯ ᒫᑲ ᐃᐧᔮᐸᓂᔨᐠ, ᐃᐢᐱ ᐊᐠᕒᐃᐸ ᑳ ᑕᑯᓯᕽ, ᐊᓯᒋ ᐸᕒᓇᐃᓯ, ᒥᐢᑕᐦᐃ ᐅᑭᒫᐃᐧ ᐸᒥᐅᐃᐧᐣ ᐁ ᑭᑭᒋᐠ, ᒥᓈ ᑳ ᐱᐦᑐᑫᒋᐠ ᐃᑕ ᐊᓂᒪ ᑳ ᐯᑐᐃᐁᐧᕽ, ᐊᓯᒋ ᑭᐦᒋ ᓯᒫᑲᓂᓯᐃᐧᑭᒫᐊᐧ, ᒥᓇ ᑭᐦᒋᔨᓂᐊᐧ ᐅᑌᓈᕽ, ᐁ ᐃᑕᓱᐁᐧᐟ ᐯᐢᑕᐢ, ᐹᓬ ᑭ ᐯ ᐱᑐᑲᐋᐤ.
[24] ᐁᑲᐧ ᐯᐢᑕᐢ ᐃᑌᐧᐤ, ᑭᐦᒋ ᐅᑭᒫᐤ ᐊᐠᕒᐃᐸ, ᒥᓇ ᑲᐦᑭᔭᐤ ᐊᔨᓯᔨᓂᑎᐠ ᐅᑕ ᑳ ᐊᔮᔦᐠ, ᑭ ᐋᐧᐸᒫᐋᐧᐤ ᐊᐊᐧ ᓈᐯᐤ, ᑲᐦᑭᔭᐤ ᐁ ᒫᒪᐁᐧᔭᑎᒋᐠ ᒍᐊᐧᐠ ᑳ ᑭ ᐅᐦᒋ ᒥᑯᐢᑳᒋᒥᒋᐠ, ᒉᕒᐅᓴᓬᐊᒥᕽ ᒥᓇ ᐅᑕ, ᐁ ᐃᓯ ᑌᐯᐧᒋᐠ ᐁᑳ ᐊᔨᐋᐧᐠ ᑭᑕ ᐱᒫᑎᓯᔨᐟ.
[25] ᒫᑲ ᐁᑳ ᐁ ᒥᐢᑲᒫᐣ ᑫᑲᐧᐩ ᐁ ᑭ ᐃᑐᑕᕽ ᑭᑕ ᐅᐦᒋ ᓂᐱᐟ: ᒥᓇ ᐃᐧᔭ ᐁ ᑭ ᓇᑐᑕᕽ ᑭᑕ ᐅᔭᓱᐋᐧᑎᑯᐟ ᒫᐊᐧᒋ ᑭᐦᒋ ᐅᑭᒫᐊᐧ ᓂ ᑭ ᐃᑌᔨᑌᐣ ᑭᑕ ᐃᓯᑎᓴᐊᐧᐠ.
[26] ᐁᑯᓯ ᓇᒪᐃᐧᔭ ᑫᑲᐧᐩ ᓂᐟ ᐊᔮᐣ ᑫᒋᓈ ᑭᑕ ᑭ ᒪᓯᓇᐦᐊᒪᐊᐧᐠ ᓂᐟ ᐅᑭᒫᑦ. ᐁᐊᐧᑯ ᐅᐦᒋ ᑳ ᐯ ᐅᑎᐢᑲᐃᐧ ᐸᑭᑎᓇᒫᑕᑯᐠ, ᐅᓵᑦ ᒫᑲ ᑭᔭ, ᑭᐦᒋ ᐅᑭᒫᐤ ᐊᐠᕒᐃᐸ, ᐃᐢᐱ, ᑭ ᒥᑐᓂ ᑲᑫᐧᒋᒥᐦᒋ ᑭᑕ ᑭ ᐊᔮᔮᐣ ᑫᑲᐧᐩ ᑭᑕ ᑭ ᒪᓯᓇᐦᐊᒫᐣ.
[27] ᒋᑫᒫ ᐁ ᐃᑌᔨᑕᒫᐣ ᓇᒪᐃᐧᔭ ᓇᐃᓈᑲᐧᐣ, ᐁ ᐃᓯᑎᓴᐅᐦᐟ ᑭᐸᐊᐧᑲᐣ, ᐁᑳ ᑲᓇᑫ ᑭᑕ ᐃᐧᐦᑕᒥᕽ ᑫᑲᐧᐩ ᐊᓂᒪ ᑳ ᐊᑖᒥᒥᐦᐟ.