[1] ᓂ ᒫᒋ ᒥᔪ ᐋᔨᒧᒥᓱᓈᐣ ᒋ ᒥᓇ? ᐊᐦᐳ ᒋ ᓇᑕᐁᐧᔨᑖᑲᐧᐣ ᑭᑕ ᐊᔮᔮᕽ, ᑖᐱᐢᑯᐨ ᐋᑎᐦᐟ, ᒥᔪ ᐋᔨᒧᒥᐁᐧᐃᐧ ᒪᓯᓇᐦᐊᒫᑫᐃᐧᓇ ᑭᔭᐋᐧᐤ ᐁ ᐃᓯᑎᓴᐊᒫᑲᐃᐧᔦᐠ, ᐊᐦᐳ ᑭᔭᐋᐧᐤ ᐁ ᒪᓯᓇᐦᐊᒣᐠ?
[2] ᑭᔭᐋᐧᐤ ᓂ ᒪᓯᓇᐦᐊᒫᑯᐃᐧᓂᓈᐣ, ᐁ ᒪᓯᓇᐃᑳᓱᔦᐠ ᓂᑌᐃᓈᕽ, ᐁ ᑭᐢᑫᔨᑕᐦᑭᐠ ᒥᓇ ᐁ ᐊᔭᒥᑕᒋ ᑲᐦᑭᔭᐤ ᐊᔨᓯᔨᓂᐊᐧᐠ;
[3] ᐃᐧᔭ ᐁ ᓄᑲᐧᕽ ᑭᔭᐋᐧᐤ ᐅ ᒪᓯᓇᐦᐊᒪᑫᐃᐧᐣ ᙭, ᐁ ᐸᒥᑖᔮᕽ ᓂᔭᓈᐣ, ᐁᑳ ᒪᓯᓇᐦᐃᑲᓈᐳ ᐁ ᐅᐦᒋ ᒪᓯᓇᐃᑳᑌᐠ, ᒫᑲ ᐅᐟ ᐊᐦᒑᐦᑲᐧ ᐅᐦᒋ ᑳ ᐱᒫᑎᓯᐟ ᑭᓭᒪᓂᑐ; ᓇᒪᐃᐧᔭ ᓇᐸᑳᐱᐢᑯᕽ, ᒫᑲ ᒪᓯᓇᐦᐃᑫᐃᐧᓂᕽ ᐃᐧᔮᓯᐃᐧ ᒥᑌᐦᐃᕽ.
[4] ᐁᑯᓯ ᐁᓯ ᐊᐢᐯᔨᒧᑐᑕᐋᐧᔮᕽ ᑭᓭᒪᓂᑐ ᙭ ᐅᐦᒋ:
[5] ᓇᒪᐃᐧᔭ ᐁ ᑌᐸᑫᔨᒥᓱᔮᕽ ᓂᔭᓈᐣ, ᓈᐣᑕᐤ ᑫᑲᐧᐩ ᓂᔭᓈᐣ ᐅᐦᒋ ᑭᑕ ᐃᑕᑭᒋᑫᔮᕽ; ᒫᑲ ᓂ ᑌᐸᑫᔨᑖᑯᓯᐃᐧᓂᓈᐣ ᑭᓭᒪᓂᑐᕽ ᐅᐦᒋᒪᑲᐣ;
[6] ᐊᓇ ᒥᓇ ᑳ ᑭ ᑌᐸᑫᔨᑖᑯᐃᑯᔮᕽ ᑭᑕ ᐸᒥᑖᔮᕽ ᐅᐢᑭ ᐃᓯᑖᐧᐃᐧᐣ; ᓇᒪᐃᐧᔭ ᐁ ᐅᔭᓱᐁᐧᐃᐧᓂᐃᐧᐠ, ᒫᑲ ᐁ ᐃᓯ ᐊᐦᒑᐦᑯᐊᐧᕽ: ᒋᑫᒫ ᐁ ᐅᔭᓱᐁᐧᐃᐧᓂᐃᐧᐠ ᓂᐹᒋᑫᒪᑲᐣ, ᒫᑲ ᐁ ᐊᐦᒑᑯᐊᐧᕽ ᐱᒫᑎᓯᐢᑳᑫᒪᑲᐣ.
[7] ᑭᐢᐱᐣ ᒫᑲ ᐁ ᐸᒥᐢᑕᒥᕽ ᐊᓂᒪ ᑳ ᓂᐹᒋᑫᒪᑲᕽ, ᐁ ᒪᓯᓇᐃᑳᑌᐠ, ᒥᓇ ᐁ ᒪᓯᓈᐱᐢᑲᐃᑳᑌᐠ ᐊᓯᓂᕽ, ᑭ ᑕᑯᓯᓄᒪᑲᐣ ᑭᑭ ᑭᐢᑌᔨᑖᑯᓯᐃᐧᐣ, ᐁᑯᓯ ᐊᓂᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁᑳ ᐁ ᑭ ᑲᓇᐋᐧᐸᒫᒋᐠ ᒧᓯᓴ ᐅᑳᐧᑲᓂᔨᕽ ᐁ ᐃᓯ ᑭᐦᒋᓈᑯᓯᐟ ᐅᑳᐧᑲᓂᕽ; ᐁᐊᐧᑯ ᒫᑲ ᐃᐧᔭ ᐃᐧᐸᐨ ᑭᑕ ᐳᓂ ᐊᔮᐠ:
[8] ᑖᓂᔨᑯᕽ ᐋᐧᐃᐧᐢ ᐁ ᐸᒥᐢᑖᐦᐟ ᐊᐦᒑᕽ ᑫ ᑭᑭ ᑭᐢᑌᔨᑖᑲᐧᕽ?
[9] ᒋᑫᒫ ᑭᐢᐱᐣ ᐁ ᐸᒥᐢᑕᒥᕽ ᑳ ᓈᓂᐳᒥᐁᐧᐠ ᑭᐢᑌᔨᑖᑲᐧᐣ, ᑖᓂᔨᑯᕽ ᐋᐧᐃᐧᐢ ᐁ ᐸᒥᐢᑕᒥᕽ ᑲᐧᔮᐢᑭᑖᑌᓯᐃᐧᐣ ᑫ ᐊᔨᐋᐧᑭ ᑭᐢᑌᔨᑖᑲᐧᕽ.
[10] ᐃᐧᔭ ᑖᐯᐧ ᐊᓂᒪ ᑳ ᑭ ᑭᐢᑌᔨᑖᑯᑖᕽ, ᓇᒪᐃᐧᔭ ᐁᑯᓯ ᑭ ᐃᓯ ᑭᐢᑌᔨᑖᑯᑕᓂᐊᐧᐣ, ᐊᓂᒪ ᐅᐦᒋ ᑳ ᐊᔨᐋᐧᑭ ᑭᐢᑌᔨᑖᑲᐧᕽ.
[11] ᒋᑫᒫ ᑭᐢᐱᐣ ᐊᓂᒪ ᑳ ᐳᓂᐸᔨᐠ ᑳ ᑭᐢᑌᔨᑖᑲᐧᓄᑫᐧ, ᐋᐧᐃᐧᐢ ᐊᓂᒪ ᑫᔮᐱᐨ ᑳ ᐊᔮᐠ ᑭᐢᑌᔨᑖᑲᐧᓄᕽ ᐊᔮᐤ.
[12] ᐅᒪ ᒫᑲ ᐁ ᐃᓯ ᐊᐢᐯᔨᒧᔮᕽ, ᓵᓱᑭᒧᐃᐧ ᐱᑭᐢᑫᐧᐃᐧᐣ ᓂᐟ ᐋᐸᒋᑖᓈᐣ,
[13] ᓇᒪᐃᐧᔭ ᑖᐱᐢᑯᐨ ᒧᓯᐢ, ᑳ ᑭ ᐊᐢᑖᐟ ᐋᑯᔮᐱᑫᐧᐅᐣ, ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁᑳ ᑭᑕ ᑲᓇᐋᐧᐸᐦᑕᒥᔨᐟ ᐁ ᐊᑎ ᓇᒪᑕᑲᐧᓂᔨᐟ ᐊᓂᒪ ᑳ ᐊᑎ ᐳᓂᐸᔨᔨᐠ:
[14] ᒫᑲ ᑭ ᒪᐢᑲᐋᐧᔨᐊᐧ ᐅ ᒥᑐᓀᔨᒋᑲᓂᐋᐧᐊᐧ: ᒋᑫᒫ ᐱᔨᐢ ᐊᓄᐦᐨ ᑳ ᑭᓯᑳᐠ ᐁ ᐊᔭᒥᑖᕽ ᑲᔮᐢ ᐃᓯᑖᐧᐃᐧᐣ ᐁᐊᐧᑯ ᐋᑯᔮᐱᑫᐧᐅᐣ ᓇᒪᐃᐧᔭ ᐋᑎᓂᑳᑌᐤ; ᐁᐊᐧᑯ ᐋᑯᔭᐱᑫᐧᐅᐣ ᐅᑎᓂᑳᑌᐤ ᙭ ᐁ ᑖᐯᐧᑖᐦᐟ.
[15] ᒫᑲ ᐱᔨᐢ ᐊᓄᐦᐨ ᑳ ᑭᓯᑳᐠ, ᑕᐦᑖᐧᐤ ᒧᓯᐢ ᐅ ᒪᓯᓇᐦᐃᑲᐣ ᐁᔭᒥᑖᑭ, ᐋᑯᔭᐱᑫᐧᐅᐣ ᐊᔮᔨᐤ ᐅᑌᐃᐋᐧᕽ.
[16] ᒫᑲ ᐱᑯ ᐃᑕ ᑫᐧᐢᑭᐢᑕᐋᐧᑖᐧᐃᐧ ᑎᐯᔨᐦᒋᑫᔨᐟ, ᐋᑯᔮᐱᑫᐧᐅᐣ ᐅᑎᓂᑳᑌᐤ.
[17] ᑳ ᑎᐯᔨᐦᒋᑫᐟ ᒫᑲ ᐁᐊᐧᑯ ᐊᐦᒑᕽ: ᐃᑕ ᒫᑲ ᑳ ᑎᐯᔨᐦᒋᑫᐟ ᐅ ᐊᐦᒑᐦᑲᐧ ᐁ ᐊᔮᔨᐟ, ᐁᑯᑕ ᑎᐯᔨᒥᓱᐃᐧᐣ ᐊᔮᐤ.
[18] ᒫᑲ ᑭᔮᓇᐤ ᑲᐦᑭᔭᐤ, ᐁᑳ ᐁ ᐋᑯᔮᐱᑫᐧᐅᔭᕽ ᑖᐱᐢᑯᐨ ᐋᐧᐸᒧᓂᕽ ᐁ ᒋᑳᐢᑌᐢᑳᑯᐋᐧᔭᕽ ᐅ ᑭᐢᑌᔨᑖᑯᓯᐃᐧᐣ ᑳ ᑎᐯᔨᐦᒋᑫᐟ, ᑭ ᑫᐧᐢᑭᓈᑯᐃᑲᐃᐧᓈᓇᐤ ᐁᐊᐧᑯ ᐃᓯᓈᑯᓯᐃᐧᓂᕽ ᑳᐦᑕᑊ ᐊᑎ ᑭᐢᑌᔨᑖᑯᓯᐃᐧᓂᕽ, ᑳ ᑎᐯᔨᐦᒋᑫᐟ ᐅᑎ ᐅᐦᒋ, ᐊᓇ ᐊᐦᒑᕽ.