<2 Corinthians ᓂᓵᐧᐤ ᑲᕒᐃᐣᑎᔭᓇ 2

[1] ᒫᑲ ᐅᒪ ᓂ ᑭ ᐃᓯ ᐅᔦᔨᑕᒫᓱᐣ, ᐁᑳ ᒥᓇ ᑭᑖᐧᑦ ᒥᑯᐢᑳᑌᔨᑕᒧᐃᐧᐣ ᑭᑕ ᐯ ᑭᑭᔮᐣ ᐁ ᐯ ᓇᑕᐋᐧᐸᒥᑕᑯᐠ.

[2] ᒋᑫᒫ ᑭᐢᐱᐣ ᓂᔭ ᑭ ᒥᑯᐢᑳᑌᔨᑕᒥᐃᑎᓈᐋᐧᐤ, ᐊᐁᐧᓇ ᓂᔭ ᐃᐧᔭ ᑳ ᒪᒪᐦᑖᑯᐃᐟ, ᐱᑯ ᐊᓇ ᓂᔭ ᑳ ᒥᑯᐢᑳᑌᔨᑕᒥᐊᐠ?

[3] ᐁᑯᓯ ᐅᒪ ᑭ ᑭ ᐃᑕᓯᓇᐊᒫᑎᓈᐋᐧᐤ, ᑫᑲ ᓈᐣᑕᐤ ᐃᓯ, ᐃᐢᐱ ᐯ ᐃᑐᐦᑌᔮᓂ, ᑭᑕ ᒥᑯᐢᑳᑌᔨᑕᒥᐃᒋᐠ ᐊᓂᑭ ᓂ ᑲ ᒪᒪᐦᑖᑯᐃᑯᑕᔭᐠ; ᑲᐦᑭᔭᐤ ᐁ ᐃᓯ ᑫᒋᓈᐃᑕᑯᐠ, ᓂ ᒪᒪᐦᑖᑯᓯᐃᐧᐣ ᐁᐊᐧᑯ ᑭᐢᑕᐋᐧᐤ ᑭ ᒪᒪᐦᑖᑯᓯᐃᐧᓂᐋᐧᐤ.

[4] ᒋᑫᒫ ᒥᐢᑕᐦᐃ ᑲᑳᐧᑕᑫᔨᒧᐃᐧᓂᕽ ᒥᓇ ᐃᐧᓴᑭᑌᐁᐃᐧᓂᕽ ᑭ ᑭ ᒪᓯᓇᐦᐊᒫᑎᓈᐋᐧᐤ ᑭᑭ ᒥᐦᒉᐟ ᐅᐦᒋᑲᐋᐧᐱᐃᐧᓇ; ᓇᒪᐃᐧᔭ ᑭᑕ ᐱᑫᐧᔨᑕᒥᐃᑕᑯᐠ, ᒫᑲ ᑭᑕ ᑭᐢᑫᔨᑕᒣᐠ ᐊᓂᒪ ᒥᐢᑕᐦᐃ ᐁ ᐃᓯ ᓵᑭᐦᐃᑕᑯᐠ.

[5] ᒫᑲ ᑭᐢᐱᐣ ᐊᐃᐧᔭᐠ ᑳ ᒥᑯᐢᑳᑌᔨᑕᒥᐃᐁᐧᑫᐧ, ᓇᒪᐃᐧᔭ ᓂᔭ ᑳ ᑭ ᒥᑯᐢᑳᑌᔨᑕᒥᐃᐠ, ᒫᑲ ᐅᓵᑦ ᐱᑯ (ᐁᑳ ᐊᔨᐋᐧᐠ ᑭᑕ ᐹᑕᑫᐧᔨᒧᐃᐁᐧᔮᐣ) ᑭᔭᐋᐧᐤ ᑲᐦᑭᔭᐤ.

[6] ᐁᑯᔨᑯᕽ ᒫᑲ ᐅᒪ ᑲᑫᐢᑭᒧᐦᐃᑯᐃᐧᐣ ᐁᑯᑐᐊᐧ ᑳ ᑭ ᐃᑕᑭᑕᒫᑯᐟ ᒥᐦᒉᐟ;

[7] ᐁᑯᓯ ᓇᐊᐧᐨ ᐁᑲᐧ ᑭ ᑲ ᐳᓀᔨᑕᒪᐋᐧᑖᐋᐧᐤ ᒥᓇ ᑭ ᑲ ᑳᑭᒋᐋᑖᐋᐧᐤ, ᑫᑲ ᓈᐣᑕᐤ ᐃᓯ ᐁᑯᑐᐊᐧ ᒥᑐᓂ ᑭᑕ ᐹᑕᑯᓂᑯᐟ ᐅᓴᑦ ᒥᐢᑕᐦᐃ ᐱᑫᐧᔨᑕᒧᐃᐧᐣ.

[8] ᐁᐊᐧᑯ ᐅᐦᒋ ᑭ ᐸᑯᓭᔨᒥᑎᓈᐋᐧᐤ ᑭᑕ ᐋᔮᑕᐢᑕᒪᐋᐧᔦᐠ ᑭ ᓵᑭᐦᐃᐁᐧᐃᐧᓂᐋᐧᐤ.

[9] ᒋᑫᒫ ᐁᐊᐧᑯ ᐅᒪ ᐅᐦᒋ ᒥᓇ ᑳ ᑭ ᒪᓯᓇᐦᐊᒫᑕᑯᐠ, ᑭᑕ ᑫᒋᓈᐃᑕᑯᐠ, ᒫᐦᑎ ᑭᑕ ᓇᓇᐃᑕᒣᐠ ᒥᓯᐁᐧ ᐃᓯ.

[10] ᒫᑲ ᐊᓇ ᑳ ᐳᓀᔨᑕᒪᐋᐧᔦᐠ ᓈᐣᑕᐤ ᑫᑲᐧᐩ, ᓂᔭ ᒥᓇ ᓂ ᐳᓀᔨᑕᒪᐋᐧᐤ: ᒋᑫᒫ ᑫᑲᐧᐩ ᑳ ᑭ ᐳᓀᔨᑕᒫᑫᔮᐣ, ᑭᐢᐱᐣ ᑫᑲᐧᐩ ᑳ ᐳᓀᔨᑕᒫᑫᐋᐧᓀ, ᑭᔭᐋᐧᐤ ᐅᐦᒋ ᑳ ᑭ ᐳᓀᔨᑕᒫᑫᔮᐣ ᐁ ᑲᓇᐋᐧᐸᒥᐟ ᙭;

[11] ᐁᑳ ᓭᑕᐣ ᑭᑕ ᓵᑯᒋᐃᑯᔭᕽ: ᒋᑫᒫ ᓇᒪᐃᐧᔭ ᑭ ᐸᑯᓇᐋᐧᑖᐋᐧᓇᐤ ᐅ ᑲᑲᔦᓯᐃᐁᐧᐃᐧᓇ.

[12] ᒥᓇ ᒫᑲ ᐃᐢᐱ ᐱᔦ ᐅᑎᑕᒫᐣ ᑕᕒᐅᐋᐢ ᐅ ᒥᔮᐧᒋᒧᐃᐧᐣ ᙭ ᐅᐦᒋ, ᒥᓇ ᐃᐢᐱ ᐃᐢᑳᐧᑌᑦ ᑳ ᔪᑌᓇᒪᐃᐧᐟ ᑳ ᑎᐯᔨᐦᒋᑫᐟ,

[13] ᓇᒪ ᓈᐣᑕᐤ ᓂ ᑭ ᐋᐢᑌ ᐊᔮᐣ ᓂᐟ ᐊᐦᒑᐦᑯᕽ, ᐃᐧᔭ ᐁᑳ ᐁ ᒥᐢᑲᐊᐧᐠ ᑖᐃᑕᐢ ᓂᒋᐋᐧᑦ: ᒫᑲ ᐁ ᐸᐢᑫᐃᐧᔭᑭᐠ, ᓂ ᑭ ᐃᑐᐦᑖᐣ ᒫᓯᑖᓂᔭᐃᕽ.

[14] ᒫᑲ ᑭᑕ ᑭ ᓇᓈᐢᑯᒫᔭᕽ ᑭᓭᒪᓂᑐ, ᐊᓇ ᑲᑭᑫ ᑳ ᑭᐢᑭᓄᑕᐃᑯᔮᕽ ᓵᑯᑖᐧᐃᐧᓂᕽ ᙭ ᐃᓯ, ᒥᓇ ᑳ ᓄᑯᑖᐟ ᓂᔭᓈᐣ ᐅᐦᒋ ᐁ ᐃᓯ ᒥᔮᐧᓯᓂᔨᐠ ᐅ ᑭᐢᑫᔨᑕᒧᐃᐧᐣ ᒥᓯᐁᐧ ᐃᑕ.

[15] ᒋᑫᒫ ᓂᔭᓈᐣ ᐁᐊᐧᑯ ᐅ ᐃᐧᑭᒫᑯᐅᐃᐧᐣ ᙭ ᑭᓭᒪᓂᑐᕽ ᐃᓯ, ᐊᓂᑭ ᑳ ᐱᒫᒋᐃᐦᒋᐠ ᒥᓇ ᐊᓂᑭ ᑳ ᓂᓯᐊᐧᓈᑎᓯᒋᐠ;

[16] ᐊᓂᑭ ᐯᔭᑲᐧᔭᐠ ᓂᔭᓈᐣ ᐅᐦᒋ ᐊᔮᐊᐧᐠ ᓂᐳᐃᐧᐣ ᑫ ᓂᐱᒋᐠ; ᒥᓇ ᐊᓂᑭ ᑯᑕᑲ ᐊᔮᐊᐧᐠ ᐱᒫᑎᓯᐃᐧᐣ ᑫ ᐱᒫᑎᓯᒋᐠ. ᐊᐁᐧᓇ ᒫᑲ ᑎᔦᐸᑫᔨᑖᑯᓯᐢᑕᕽ ᐅᐦᐃ?

[17] ᒋᑫᒫ ᓇᒪᐃᐧᔭ ᓂᔭᓈᐣ ᑖᐱᐢᑯᐨ ᒥᐦᒉᐟ, ᑳ ᓂᓯᐊᐧᓈᒋᑖᒋᐠ ᑭᓭᒪᓂᑐ ᐅᐟ ᐃᑌᐧᐃᐧᐣ: ᒫᑲ ᒥᑐᓂ ᐁ ᐃᑌᔨᑕᒫᕽ, ᑭᓭᒪᓂᑐᕽ ᐁ ᐅᐦᑎᓇᒫᕽ, ᐁ ᑭᑖᐸᒥᑯᔮᕽ ᑭᓭᒪᓂᑐ, ᓂ ᐱᑭᐢᑳᐧᓈᐣ ᙭ ᐃᓯ.