[1] Jesus ōmisi itēw okiskinohamawākana, “ohcitaw ispayin māna maci-kīkwaya ē‑wēpihikocik ayisiyiniwak kita-maci-tōtahkik. māka ayiwāk ka‑māyi-tōtamāsow awiyak ē‑tōtamōhāt kotaka kita-maci-tōtamiyit.
[2] nawac kita-miyopayiw ēwako ayisiyiniw kita-tāpiskamōhiht pinipocikan-asiniya ēkwa kita-pakastawēwēpiniht kihcikamīhk ispīhci kita-maci-tōtamōhāt ōhi kā‑apisi-itēyihtākosiyit.
[3] ēkosi aswēyihtamok tānisi ē‑isiyinīhkēyēk! “kīspin kiwīcēwākan maci-tōtam, wīhtamaw ē‑māyi-tōtahk, ēkwa kīspin mihtātam, kika-pōnēyihtamawāw.
[4] kīspin kimāyi-tōtāk tēpakohpwāw pēyak kīsikāw, ēkwa tahtwāw ē‑māyi-tōtahk ē‑pē-wīhtamāsk ē‑mihtātahk, pōnēyihtamaw.”
[5] anihi itisahwākanak kī‑itēwak Jesusa, “wīcihinān ayiwāk kita-tāpowakēyihtamāhk.”
[6] kā‑tipēyihcikēt itēw, “kīspin kitāpwēhtamowiniwāw ispīhcāw iyikohk ē‑māwaci-apisīsisit osāwi-kiscikānis, kika-itāwāw awa misi-āhtik, ‘kwayakipitiso askīhk ohci ēkwa nitawi-kistikahiso kihcikamīhk,’ ta‑tōtam ōma kā‑sīhkimiht.
[7] “kīspin kiyawāw pēyak nikotwāw otatoskēyākana pīkopicikēyiwa ahpō kanawimāyatihkwēyiwa, ispīhk ē‑takohtēt kistikānihk ohci, kika-itāwāw cī ka‑kakwēyāhot kita-pē-mīcisot?
[8] namōya māskōc! mēskoc kika-itāwāw, ‘piminawaso, ēkwa postiska kitaspastākan ēkwa pamihin mīcisoyāni, mwēstas kiya kika-mīcison.’
[9] ana atoskēyākan namōya katāc kita-nanāskomiht ē‑nanahihtawāt ohci otōkimāma.
[10] pēyakwan ēkosi kīstawāw, ispīhk kahkiyaw kīkway ē‑kī-tōtamēk kā‑itikawiyēk, ōmisi kika-itwānāwāw, ‘atoskēyākanak ōma niyanān piko; ē‑mosci-tōtamāhk anima kā‑isi-ātotikawiyāhk.’”
[11] Jesus ē‑ati-itohtēt Jerusalemihk kī‑pimohtēw sisonē tipahaskānihk kā‑pimipayiyik tastawāyihk Samaria askīhk ēkwa Galilee askīhk.
[12] ē‑ati-otihtahk ōcēnāsihk, kētahtawē mitātaht nāpēwa kā‑pē-nakiskākot ē‑kakwātakihikoyit wasakāspinēwin ē‑kostātikwaniyik, wāhyaw nīpawiyiwa.
[13] ēkwa ē‑tēpwātikot, “Jesus! okimāw! kitimākinawinān.”
[14] Jesus ē‑wāpamāt itēw, “niyāk, nitawāpamihkok ayamihēwiyiniwak kita-nitawāpēnikoyēkok.” ē‑ati-sipwēhtēcik kī‑pēhkisiwak ē‑miywāyācik.
[15] pēyak nāpēw ē‑kiskēyihtahk ē‑miywāyāt kī‑pē-nātēw Jesusa ē‑mamihcimāt kisē-manitowa ē‑kisīwēt.
[16] kī‑otihtapipayihow ita ē‑nīpawiyit Jesusa ē‑nanāskomāt. ēwako awa nāpēw Samaria askīhk ohci.
[17] ōmisi itwēw Jesus, “namōya cī mitātaht nāpēwak kī‑iyinīhkahāwak? tāniwēhkāk aniki kēkā-mitātaht?
[18] tānēhki awa pītosiyiniw wiya piko kā‑pē-nanāskomāt kisē-manitowa?”
[19] Jesus itēw, “pasikō ēkwa ati-sipwēhtē, kitāpwēhtamowin ohci kā‑miywāyāyan.”
[20] ātiht Phariseewak kakwēcimēwak Jesusa, tānispīhk otipēyihcikēwin kisē-manitow kita-mācipayiyik. ōmisi itēw, “otipēyihcikēwin kisē-manitow mācipayiki namōya kita-nōkwaniyiw.
[21] namōya awiyak kita-kī-itwēw, ‘wāpahtamok ōmīta!’, ahpō, ‘nēmīta!’ ayisk otipēyihcikēwin kisē-manitow mēkwānohk ayāmakan.”
[22] ōmisi itēw okiskinohamawākana, “kika-akāwātēnāwāw kita-otihcipayik ispīhk ka‑wāpahtamēk ahpō pēyak okīsikāma ayisiyinīwikosisān, māka namōya kika-wāpahtēnāwāw.
[23] kita-ihtakowak aniki kita-itwēcik, ‘nētē itāpik,’ ahpō, ‘ōta itāpik.’ māka ēkāwiya natonamok.
[24] takohtēci ayisiyinīwikosisān kita-nōkwan tāpiskōc kā‑wāsaskotēpayik kīsikohk ēkwa ē‑kīsikāstēpayik misiwē askīhk. ēkosi kita-ihkin anima kīsikāw kā‑takohtēt.
[25] māka nīkān piko mistahi kita-kakwātakihtāt ēkwa anohc kita-ātawēyimikot ayisiyiniwa.
[26] tāpiskōc ispī Noah kā‑pimātisit, pēyakwan ēkosi ayisiyinīwikosisān takohtēci ka‑ispayin.
[27] kahkiyaw ayisiyiniwak āhci piko kī‑mīcisowak mīna kī‑minihkwēwak, ēkwa nāpēwak mīna iskwēwak kī‑wīkihtowak, isko Noah kā‑pōsit nāpihkwānihk, ēkwa kā‑iskipēk ōma askiy, ēkwa kahkiyaw ayisiyiniwak ē‑misiwanācihikocik.
[28] ēkosi pēyakwan kita-ispayiw mēkwāc Lot ē‑pimātisit. kahkiyaw ayisiyiniwak kī‑mīcisowak āhci piko, ē‑minihkwēcik, ē‑atāwēcik, ē‑atāwākēcik, ē‑kistikēcik, ēkwa ē‑wāskāhikanihkēcik.
[29] anima kīsikāw Lot kā‑nakatahk Sodom kī‑pahkihtinwa iskotēw ēkwa iskotēsikan kīsikohk ohci ēkwa kahkiyaw kī‑nipahikwak ayisiyiniwak.
[30] ēkosi kita-ispayiw anima kīsikāw wāpamihci ayisiyinīwikosisān.
[31] “ēwako kīsikāw awiyak tahkohc wāskāhikanihk ē‑ayāt namōya ta‑kī-pīhtikwēt ka‑nitawi-nātahk otipēyihcikanisa; pēyakwan ēkosi awiyak ē‑atoskēt kistikānihk namōya ta‑kī-kīwēt.
[32] kanokiskisik tānisi kā‑kī-isi-ācimiht Lot owīkimākana!
[33] awiyak ē‑kakwē-pimācihtāt opimātisiwin kita-wanihtāw, ēkwa awiyak wanihtāci opimātisiwin kita-pimācihtāw.
[34] kiwīhtamātināwāw, ēwako tipiskāki nīso ayisiyiniwak kita-nīsokwāmiwak nipēwinihk; pēyak kita-otināw, ēkwa ana kotak kita-nakatāw.
[35] nīso iskwēwak kita-pinipohēwak kistikāna; pēyak ana kita-otināw, ēkwa ana kotak kita-nakatāw. [
[36] nīso nāpēwak kita-atoskēwak kistikānihk; pēyak kita-otināw ēkwa ana kotak kita-nakatāw.]”
[37] okiskinohamawākana kakwēcimik, “tānitē ōma kita-ihkihk, kā‑tipēyihcikēyan?” “itē kīkwaya ē‑misiwanātahki, ēkota māwacihitowak kīniwak,” itēw Jesus.