[1] Kitam ngani tagoli wakay piya boway sarig Kiristo, na kantam beeten in mga sa langit in sa pagpamatawan Kiristo agtokkaw sa pamalang agbangen Diyos.
[2] Na pakalakoyen sa kantam remrem in mga sa langit, ayaw in mga sa kobat.
[3] Angkataw kitam mga matay wa. In kantam boway piyagbetang palagem Kiristo sa Diyos.
[4] Kiristo wa daan in kantam boway. No dogayan siyo lomwas wakay, na kitam din batay lomwas kansiyo sarig, kataw din siyo agrawa.
[5] Na benglayen wa in mga ogali piyagkabeet kantam bilog, kataw in agpanggaraw, in marames pag ogali, in agkaamag aglampas sa piyagkailangan, in mga daet pag kantam piyagbeet, in agsolang, na ina agsamba sa mga yewed Diyos.
[6] Panawen asin in Diyos agkabais, batay agparosa sa mga mangyan agsonggar sa kansiyo beet.
[7] Tangona kamo din agkaboway sa mga kataw ina pag ogali.
[8] Kamay ngona kanyo wa benglayen anda pag boo, in agkagalit, in agkabais, in daet remrem, in aglibak, osai in mga makarikoy pag panggisoden.
[9] Ayaw agiplaong baribid angkataw kanyo wa biyenglay in datiyan pag ogali, kadayo in mga daeten pag piyagpangwat.
[10] Kamo omilag wa sa bayo wakay pag ogali. Kitam piyangwat Diyos. Anggan ngona kitam kansiyo kay piyagpangwat piyagpatolad sa kansiyo, matang agistobo in kantam atawanan sa kansiyo.
[11] Na sa bayo pag boway in boo tikkalakoyan osai in Odyo osai in yewed, kamayba toli kamayba yewed, kamayba panyawan, kamayba batang aswangan, kamayba apo kapwan, kamayba agipalpas. Na kay Kiristo boo tikkalakoyan. In Kiristo sa boo.
[12] Na angkataw kitam mga iidang Diyos, mga maalen, kansiyo mga piyagpakayawte, na kantam ogaliyen in agpakayawte, in maalen pag remrem, kabwatte remrem, mabait, osai agbanta.
[13] No apo agpangwat makasirot sa kantam, na agbanta wa kitam. Kataw in Kapwan aglibangaw wa sa kantam mga daet, na kataw din ina kailangan kantam libangawen in sa roma mga daet.
[14] Labi kay sa boo, kitam maybelagan angkataw ina in bekkes matang kitam malageman wa gayed.
[15] Papoonen sa kantam galem in apyaan pag remrem batang kay Kiristo angkataw panawen ina kitam biyerya, piyangwat osai ka bilog. Osai palagi kitam agpakaanggay sa kansiyo.
[16] Pakaknowen sa kantam remrem in barita panawen kay Kiristo. Malsipatoldowan, maysibilinan sa boo kantam katawanan. Agbaren mga awit, mga baren pansamba agkaanggay sa Diyos.
[17] Kamayba nakay in kantam piyagpangwat, kamayba agiplaong, kamayba panawen, na kantam pangwaten pasakop kay Isos in Kapwan. Osai panawen sa kansiyo kitam wa agkaanggay sa Diyos Amang.
[18] Kamo mga babai, kamo pasakop sa kanyo mga lalaki, angkataw ina in beet in Kapwan.
[19] Kamo mga lalaki, kamo agpakayawte sa kanyo mga babai, ayaw matapang sa kansiro.
[20] Kamo mga bodang, kamo palagi maniwala sa kanyo mga koyay, angkataw ina makaanggay sa Kapwan.
[21] Kamo mga amang, kamo ayaw agpangwat in makabais sa kanyo mga bodang, karam siro batay manampo.
[22] Kamo mga sogowan, kamo palagi maniwala sa kanyo mga kapwan atai sa kobat. Kamayba siro yewed agpangkit kamo ayaw aglimbang, ayaw waget makaanggay sa kansiro, dayem agkalimo sa Kapwan sa langit, makaanggay sa kansiyo.
[23] Kamayba nakay in kanyo piyagpangwat ayaw mabyat in remrem angkataw in Kapwan in agsogo sa kanyo, yewed mangyan waget.
[24] Angkataw kanyo atawanan kamo batay kansiyo piyakan in bayad, ina in kansiyo pangako. Kiristo in kanyo Kapwan.
[25] Angkataw in agpangwat daet batay ngani piyarosa Diyos no nangkalakoy in kansiyo piyangwat daet, angkataw in Diyos idbatay agpangidang sa mangyan.